អ្នកម្ដាយវ័យ២០ឆ្នាំមួយរូប ដែលមានកូនប្រុសអាយុ១១ខែ បានទៅសាក់លើម្រាមដៃ និងជើងរបស់ខ្លួន តែ​មិន​បានប្រាប់ទៅអ្នកសាក់ ឲ្យដឹងថា នាងកំពុងបំបៅកូននោះទេ។ នេះ បើតាមការផ្សាយឲ្យដឹង របស់​សារព័ត៌មាន​អូស្ត្រាលី «Sydney Morning Herald»។

ហាមបំបៅកូន!

ឪពុករបស់ទារក ដែលរស់នៅដោយឡែក ពីម្ដាយ បានប្ដឹងទាមទារគ្រប់គ្រង កូនប្រុសរបស់ខ្លួន ដោយបាន​ចង្អុល ទៅអតីតគូស្នេហ៍ខ្លួន ថានាងមានបញ្ហាផ្លូវចិត្ត និងបញ្ហាគ្រឿងញៀន។ ប៉ុន្តែនាងជាម្ដាយ បានប្ដឹង​ជំទាស់​​វិញ រហូតដល់តុលាការបានសម្រេច កាលពីថ្ងៃទី៥ ខែមិថុនាកន្លងទៅ ផ្ដល់សិទ្ធិទៅឲ្យនាង ជាអ្នក​គ្រប់​គ្រងកូន តែបានហាមនាង មិនឲ្យបំបៅកូនឡើយ។ ចៅក្រម បានគិតថា ម្ដាយទារករូបនេះ ទំនងជាបានទទួល​យក​មេរោគមួយ ដែលឆ្លងតាមការ«សាក់» ដែលមានប៉ះពាល់ ទៅដល់ឈាម។

ការធ្វើការពិនិត្យឈាម ដើម្បីស្វែងរកមេរោគ អេដស៍ (HIV) និងមេរោគថ្លើម ទៅលើស្ត្រីជាម្ដាយ បាន​បង្ហាញ​លទ្ធផល ជាអវិជ្ជមាន។ ម្ដាយវ័យក្មេង បានប្ដឹងឧទ្ទរណ៍ ពីការសម្រេចរបស់តុលាការជាន់ទាប ឡើងទៅ​តុលាការ​ទទួលបន្ទុកផ្នែកសង្គមកិច្ច នៅទីក្រុង ស៊ីដនី ហើយនឹងត្រូវដឹងពីសាលក្រមសម្រេច នៅពេល​ក្រោយ។

«សាលក្រម ដ៏កាច​ឃោឃៅ»

ការសម្រេចរបស់តុលាការជាន់ទាប ត្រូវបានសមាគមគាំពារ​ការបំបៅដោះមួយ វាយតម្លៃថា មានលក្ខណៈ​«កាច​ឃោឃៅ»។ អ្នកស្រីប្រធានសមាគម រ៉ឺបេកា ណៃល័រ (Rebecca Naylor) បានថ្លែងឲ្យដឹងថា៖ «អាជីវកម្ម​សាក់ ត្រូវបានធ្វើ ឲ្យមានក្រិត្យក្រមត្រឹមត្រូវមួយ។ ហើយបើក្រិត្យក្រមនោះ ត្រូវបានគោរព ដោយបណ្ដា​អាជីវកម្មសាក់ យើងសូមជំរុញឲ្យស្ត្រី ដែលបានទៅសាក់លើខ្លួន អាចបំបៅដោះកូនបាន ស្រេចនឹង​ចិត្ត​នាង​ចង់។»

អ្នកស្រីប្រធានសមាគម បានចោទជាសំនួរឡើងថា៖ «តើសាលក្រមនេះ ចង់និយាយថា ស្ត្រីណាក៏ដោយ ដែល​រងការចម្លងរោគ តាមឈាម ត្រូវតែប្រឈម នឹងការហាមឃាត់ មិនឲ្យបំបៅកូនឬ?»៕