នៅក្នុងរណីគ្រោះថ្នាក់ចរាចរណ៍ បង្ករការភ្ញាក់ផ្អើលនេះ មិនមានភាគីណា រងរបួសនោះទេ តែចម្លែកតែម្ចាស់​រថយន្តបង្ក បានបើកទ្វារឡាន ចេញស្របពេល ដែលមានមនុស្សជាច្រើន ចូលមកមើល ហើយបានរត់គេច​ខ្លូន បាត់ស្រមោល បន្សល់ទុករថយន្ត នៅទីតាំងកើតហេតុ ជាមួយភាគីរងគ្រោះ។

គ្រោះថ្នាក់ចររាចរណ៍ បានកើតឡើង កាលពីវេលាម៉ោង ១០យប់ ថ្ងៃទី១៥ ខែកក្កដា ឆ្នាំ២០១៥ នៅតាម​បណ្តោយ​ផ្លូវ សហព័ន្ធរូស្ស៊ី ក្នុងខណ្ឌពោធ៍សែនជ័យ រាជធានីភ្នំពេញ។ រថយន្តបង្ក មានម៉ាក រេងរ៉ូវើ (RONROVER) ស្លាកលេខ ភ្នំពេញ២V-៨៣៧៨ បើកបរ ដោយបុរសម្នាក់ មិនស្គាល់អត្តសញ្ញាណ។ សាក្សី ដែលឃើញហេតុការណ៍នេះ បានឲ្យដឹងថា ដំបូងឡានបង្កខាងលើ បើកបរក្នុងទិសដៅ ពីកើតទៅលិច តាម​បណ្តោយផ្លូវខាងលើ លុះមកដល់កន្លែងកើតហេតុ រថយន្តក៏រ៉េចង្គូត ទៅបុករបងចែកផ្លូវ យ៉ាងពេញទំហឹង បណ្តាលឲ្យបាក់ ជាង៥កំណាត់។

សាក្សីដដែលនោះ បានបន្ថែមទៀតថា បន្ទាប់ពីបានបុក របងខណ្ឌផ្លូវទាំងនេះហើយ ឡានបង្កនៅ មិនទាន់​អស់ល្បឿន នៅឡើយទេ តែបានជ្រុល ទៅបុកឡាន លុចហ្ស៊ីស មួយគ្រឿងទៀតពណ៍ ស ស្លាកលេខ ភ្នំពេញ ២X-២៥១០ ដែលកំពុងបើកបរបញ្ច្រាស់គ្នា បណ្តាលឲ្យរថយន្ត LEXUS រងការខូចខាតផ្នែកខាងមុខ និង​ខាង​ឆ្វេងយ៉ាងដំណំ។

ភ្លាមៗនោះ មន្រ្តីនគរបាលចរចរាចរណ៍ ប្រចាំនៅទីតាំងខាងលើ បានចុះធ្វើអន្តរាគមន៍ និងរើរបងចែកផ្លូវ ដែល​បាក់ជាច្រើនកំណាត់ចេញ ដើម្បីបញ្ចៀសការកកស្ទះ។ បន្ទាប់មក មន្ត្រីមានសមត្ថកិច្ចទាំងនោះ បានស្ទូច​រថយន្ត​ទាំងពីរយកទៅ ការិយាល័យចររាចរណ៍ រាជធានីភ្នំពេញ ដើម្បីទុកធ្វើការដោះស្រាយ៕