«Gangnam Style» វិដេអូដែលគេមើលច្រើនជាងគេ ក្នុងប្រវត្តិយូធូប
នៅយប់ថ្ងៃសុក្រនេះ បទចំរៀង Gangnam Style បានឆ្លងកាត់ចំនួនអ្នកចូលទៅទស្សនា ច្រើនជាងមួយកោដនាក់ហើយ នៅលើគេហទំព័រចែកផ្សាយវីដេអូ យូធូប តាមអាំងធើណែត។ ជាចំនួនដ៏សម្បើមមួយ ដែលមិនដែលធ្លាប់មានពីមុន។
លោកបាន គី-មូន និងព្សាយ ដែលជួបគ្នារាំ Gangnam Style នៅញ៉ូយក។
ចំនួនអ្នកចូលមកទស្សនាវីដេអូនេះ ជាប្រវត្តិដំបូងបង្អស់ ក្នុងពិភពលោក ដែលបានបង្ហាញពី ភាពល្បីល្បាញដ៏អស្ចារ្យ របស់អ្នកចម្រៀងកូរ៉េខាងត្បូង ព្សាយ (PSY) និងចម្វាក់រាំរបស់អ្នកចម្រៀងរូបនេះ ដែលដូចទៅនឹងការជិះសេះដូច្នេះ។ នៅម៉ោង១៩ម៉០០ ថ្ងៃសៅទី២២ធ្នូនេះ អ្នកដែលចូលទៅទស្សនាវីដេអូ បានឡើងរហូតដល់ ១ ០១៥ ៧២៩ ៤០០ដង ក្រោយពីដាក់ចែកផ្សាយខ្សែរចម្រៀងនេះ នៅលើគេហទំព័រយូធូប កាលពីប្រាំខែមុន។
ចំនួននេះ បានលើសដាច់ឆ្ងាយ និងបានដណ្ដើមបាន ចំណាក់ថ្នាក់លេខមួយ តាំងពីចុងខែវិច្ឆិការមកម្លេះ ពីចម្រៀងរបស់ អ្នកចម្រៀងវ័យក្មេង ដើមកំណើតកាណាដា ជូស្ទីន ប៊េប៊័រ (Justin Bieber) ។
បើទោះជាគេមិនសូវយល់ប៉ុន្មាន ពីទំនុកចម្រៀង ជាភាសាកូរ៉េនោះ តែចង្វាក់រាំ និងចង្វាក់របស់ចម្រៀង បានធ្វើអោយនរណាក៏ដោយ ដែលបានស្ដាប់លឺ អត់ទ្រាំ នឹងមិនយកភ្នែក ក្រឡេកមើលវីដេអូចម្រៀងនេះមិនបាន។ ហើយចំនុចយ៉ាងពិសេសនេះ វាបានធ្វើដំណើរ ហួសចេញឆ្ងាយពីប្រទេសកូរ៉េខាងត្បូង ឬនៅតំបន់អាស៊ី តែបានមកដល់ និងទទួលការនិយមចូលចិត្ត យ៉ាងខ្លាំងនៅអ៊ឺរ៉ុប និងអាមេរិកថែមទៀតផង។ អ្នកចម្រៀងព្សាយ ធ្លាប់បានជួប«រាំ»ចង្វាក់ចម្រៀងរបស់គាត់ ជាមួយអគ្គលេខាធិការអង្គការសហប្រជាជាតិ លោក បាន គី-មូន (Ban Ki-moon) និងបានធ្វើអោយថ្នាក់ដឹកនាំ ល្បីៗក្នុងពិភពលោក និយាយពីចម្រៀងនេះ ដូចយ៉ាងអភិបាលក្រុងឡុងដ៍ លោក បូរីស ចនសុន (Boris Johnson) និង សូម្បីប្រធានាធិបតីអាមេរិក លោកបារ៉ាក់ អូបាម៉ា (Barack Obama) ក៏ដោយ។
ចម្រៀងនេះ ត្រូវបានមនុស្សជាច្រើន ពីគ្រប់ទិសទី ក្នុងពិភពលោក យកមកច្រៀង ឬរាំតាម និងអ្នកខ្លះទៀត យកទៅ បន្ថែមបន្ថយ ទៅតាមចំណង់ចំណូលចិត្តរៀងៗខ្លួន។ នៅទីក្រុងប៉ារីស នៃប្រទេសបារាំង ទីក្រុងរ៉ូម និងមីឡង់ នៃប្រទេសអ៊ីតាលី មនុស្សរាប់សិបពាន់នាក់ បានប្រមូលគ្នាមករាំចង្វាក់ «Gangnam Style» នេះ។
សូមទស្សនាចម្រៀងនេះ ឬបើអ្នកធ្លាប់ឃើញហើយ ក៏អាចទស្សនាឡើងវិញ៖
និងខ្សែរវីដេអូមួយទៀត ដែលនិយាយពី ពេលថតចម្រៀងនេះ៖
-------------------------------------------------
ដោយ ឈូករ័ត្ន - ប៉ារីស ថ្ងៃទី២២ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ