បុគ្គលិក៥ នាក់ ដែលជាតំណាង របស់បុគ្គលិកកម្មករ ត្រូវបានក្រុមហ៊ុន កាពីតូល បញ្ឈប់ពីការងារ កាលពី​ពេល​​ថ្មីៗនេះ បន្ទាប់ពីបុគ្គលិកទាំង៥នាក់ ត្រូវបានក្រុមបុគ្គលិកកម្មករ ឲ្យដឹងថា តែងបានដឹងទុក្ខធុរៈ ឬជួយ​ដោះ​ស្រាយ​បញ្ហា របស់ក្រុមបុគ្គលិក អ្នកបើកឡានទេសចរណ៍ របស់ក្រុមហ៊ុន។ នៅចំពោះ ការបញ្ឈប់​ពី​ការងារ​​នេះ ក្រុមអ្នកបើកឡាន បានធ្វើការតវ៉ានៅមុខក្រុមហ៊ុន នៅថ្ងៃទី២៧ ខែកក្កដានេះ ដើម្បី​សុំឲ្យ​សម្រប​សម្រួល ទទួល​យកបុគ្គលិកទាំងនោះ ឲ្យចូលធ្វើការធម្មតាវិញ។

ក្រុមអ្នកបើកឡាន ទេសចរណ៍ ដែលមានចំនួន ប្រមាណ១០០នាក់ បានប្រកាសមិនចូលធ្វើការ ហើយបាន​ធ្វើ​កូដកម្មទាមទារនេះ កាលពីវេលាម៉ោង ៨ និង៤០ នាទីព្រឹកថ្ងៃទី ២៧ ខែកក្កដា ឆ្នាំ ២០១៥ នៅតាម​បណ្តោយ​ផ្លូវ ១៨២ កែង ផ្លូវ ១១១ ក្បែរផ្សារអូឬស្សី ក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ។

អ្នកបើកឡានម្នាក់ បានប្រាប់ទស្សនាវដ្តីមនោរម្យ.អាំងហ្វូថា ក្រុមអ្នកបើកឡាន នឹងមិនបញ្ឈប់ការតវ៉ាទេ បើ​ក្រុមហ៊ុន នៅតែមិនដោះស្រាយបញ្ហានេះ។ លោកថា បាតុកម្មលើកនេះ ក៏មិនមែនជាលើកទីមួយដែរ ប៉ន្តែ​នៅ​តែគ្មានដំណោះស្រាយដដែល។

តែផ្ទុយទៅវិញ ខាងភាគីក្រុមហ៊ុន មិនបានបំភ្លឺពីបញ្ហាទាំងនេះទេ ដោយបញ្ជាក់ប្រាប់អ្នកសារព័ត៌មានថា នៅ​កំពុងដោះស្រាយ សម្រួលឲ្យបុគ្គលិក។ គួរំលឹកថា កាលពីថ្ងៃទី២២ ខែកក្កដា កន្លងទៅនៅក្រុមហ៊ុននេះ ធ្លាប់​មានការតវ៉ាម្តងហើយ តែគ្មានដំណាងក្រុមហ៊ុន មកដោះស្រាយជូនបុគ្គលិក លើកនេះជាលើកទីពីរហើយ ចំពោះ​តាតវ៉ា គេនៅមិនទាន់ដឹងថា លទ្ធផលនៃការសម្របសម្រួល អាចទៅរួច ឬយ៉ាងណានោះទេ៕