ការភ្ញាក់ផ្អើល ដែលធ្វើឲ្យអ្នកស្រុក បាននាំគ្នាស្រង់សាកសព ចេញពីទឹកនេះ បានកើតឡើង នៅវេលាម៉ោង ១៧ និង៤០ នាទី ល្ងាចថ្ងៃទី ២៨ ខែកក្កដា ឆ្នាំ២០១៥ នៅចំណុចកំពង់ទឹក ស្ទឹងត្នោត ភូមិព្រែកតាពៅ១ សង្កាត់​ដើមមាន ក្រុងតាខ្មៅ ខេត្តកណ្តាល។ ប្រភពពីកន្លែងកើតហេតុ ដែលជាក្រុមមិត្តភក្កិ ជនរង​គ្រោះបានប្រាប់​ឲ្យ​ដឹងថា នៅពេលផឹកស្រវឹង ក្រុមអ្នកទាំងនោះ បានបែកគ្នា ហើយជនរងគ្រោះ តម្រង់ទៅកំពង់ទឹក បម្រុងនឹង​ឡើង​ទៅលើទូក ក៏ស្រាប់តែរអិលដាំក្បាល ចូលទៅក្នុងទឹក លង់ស្លាប់ភ្លាមៗ គ្មានអ្នកជួយសង្គ្រោះទាន់។

ស្រ្តីជាម្តាយជនរងគ្រោះ បានប្រាប់ទស្សនាវដ្តីមនោរម្យ.អាំងហ្វូថា ជនរងគ្រោះឈ្មោះ ទិត្យ រ៉ន អាយុ២៨ឆ្នាំ រស់នៅភូមិ ឃុំកើតហេតុខាងលើ ជាមួយគ្រួសារ។ ស្ត្រីរូបនេះ បានបន្តទៀតថា គាត់បានដើររកកូន ឃើញកូន​កំពុង​លង់ទឹក ក៏បានស្រែកឆោឡោ ឲ្យអ្នកភូមិជួយ តែមិនទាន់នោះទេ ព្រោះជនរងគ្រោះ បានស្លាប់បាត់​ទៅ​ហើយ។ ស្រ្តីជាម្តាយបានរៀបរាប់ ទាំងសោកសៅថា កូនអ្នកស្រី លង់ទឹកយូរហើយ ហើយគេទើបនឹង ស្រង់​បាន​មកវិញ ក្នុងពេលមុននេះ។

ភ្លាមៗនោះ ប្រជាពលរដ្ឋអ្នកភូមិ នៅម្តុំស្ទឹងត្នោត បាននាំគ្នាស្រង់សាកសពឡើងគោក រួចប្រគល់ឲ្យសមត្ថកិច្ច​ជំនាញ ដើម្បីធ្វើកោសល្យវិច័យ។ តាមការបញ្ជាក់ របស់សមត្ថកិច្ចជំនាញមួយរូប ឲ្យដឹងថា សាកសពជានរង​គ្រោះ ពិតជាលង់ទឹកស្លាប់ ប្រាកដមែន ដោយសារតែស្រវឹងជោក គ្មានកម្លាំងហែល។ បន្ទាប់ពីធ្វើ​កោសល្យ-​វិច័យ​រួច កម្លាំងជំនាញបានប្រគល់សាកសព ឲ្យទៅគ្រួសារជនរងគ្រោះ យកទៅធ្វើបុណ្យតាមប្រពៃណី៕