រូបថតទាំងនេះ ត្រូវបានថត និងបង្ហោះ នាវេលារសៀល ថ្ងៃទី៣១ ខែកក្កដា ចេញពីស្ពានមិត្តភាព​កម្ពុជា-ចិន​តាខ្មៅ ស្ថិតនៅសង្កាត់តាខ្មៅ ក្រុងតាខ្មៅ ខេត្តកណ្តាល។ នៅក្នុងរូប គេឃើញលោក ហ៊ុន សែន កៀកស្មារ ជា​មួយនឹងអ្នកស្រី ប៊ុន រ៉ានី ភរិយារបស់លោក ហើយយកទូរស័ព្ទដៃ មកថតរូប ដោយខ្លួនលោកផ្ទាល់។

កាយវិការរបស់លោក ហ៊ុន សែន បានធ្វើឡើង បន្ទាប់ពីលោក បានអញ្ជើញចូលរួម នៅក្នុងពិធីប្រគេន​ទៀន​ព្រះវស្សា នៅវត្តចំពុះក្អែក កាលពីរសៀលថ្ងៃដដែល។ ក្បួនរថយន្ដរបស់លោក បានឆ្លងកាត់ទីនោះ និងបាន​ឈប់ ដើម្បីអនុញ្ញាត​ឲ្យលោក​បានទស្សនា គយគន់ នូវសំណង់ស្ពានថ្មីមួយនេះ ដែលលោកផ្ទាល់ គ្រោងនឹង​សម្ពោធ ដាក់ឲ្យប្រើប្រាស់ជាផ្លូវការ នៅថ្ងៃទី៣ ខែសីហា ឆ្នាំ២០១៥ ខាងមុខ។

ស្ពានឈ្មោះ ស្ពានមិត្តភាព កម្ពុជា-ចិនតាខ្មៅ នេះ ជាស្ពានឆ្លងកាត់ទន្លេបាសាក់ មានប្រវែង៨៥៥ម៉ែត្រ ស្ថិត​ក្នុង​ភូមិព្រែកសំរោង១ សង្កាត់តាខ្មៅ ក្រុងតាខ្មៅ ឆ្លងទៅត្រើយខាងកើត ភូមិកោះក្របី ចំពុះក្អែក សង្កាត់ព្រែកថ្មី ខណ្ឌច្បារអំពៅ។ ស្ពាននេះ បានចំណាយប្រាក់ ដើម្បីសាងសង់ អស់ប្រមាណជា ៣៣លានដុល្លារ ដែលជាកម្ចី​ពីប្រទេសចិន៕