ការថ្លែងជាសាធារណៈ របស់លោកនាយករដ្ឋមន្រ្តី ហ៊ុន សែន បានបង្កជាមន្ទិលឡើងខ្លាំងទៀត ជា​ពិសេស នៅ​ក្រោយការចាប់ចង់ ដាក់ពន្ធនាគារ និងព្រមានថា នឹងមានការចាប់ចងបន្ថែមទៀត។ ព្រឹត្តិការណ៍​ខាងលើនេះ ត្រូវបានតំណាងរាស្ត្រ មកពីគណបក្សសង្គ្រោះជាតិ លោក អ៊ុំ សំអាន វាយតម្លៃថា លោកនាយក​រដ្ឋមន្ត្រី បី​ទសវត្សន៍​របស់កម្ពុជា កំពុងបង្ហាញ​ពីការយក«ច្បាប់»​ជាឧបករណ៍ ក្នុងនាមខ្លួន ជាអ្នកមានអំណាច មក​គម្រាម​កំហែង ព្រោះខ្លាចរអា ពីបញ្ហាព្រំដែន។ តំណាងរាស្រ្តរូបនេះ បានចោទជាសំនួរ ទៅលោកនាយក​រដ្ឋមន្រ្តីថា តើការដែលលោក ហ៊ុន សែន បង្ហាញអំណាច ក្នុងការកំហែងនេះ ជាការធ្វើតាមបញ្ជា របស់បក្សកុម្មុយនីស​វៀតណាម ឬ​យ៉ាង​ណា?

ពីទីក្រុងតាខ្មៅ ខេត្តកណ្តាល កាលពីថ្ងៃទី៣ ខែសីហានេះ លោកនាយករដ្ឋមន្ត្រី ហ៊ុន សែន បាន«បញ្ជា»ជាថ្មី ទៅដល់កម្លាំងមានសមត្ថកិច្ច ឲ្យបន្តស្វែងរកចាប់ខ្លួន អ្នកដែលពាក់ព័ន្ធ ក្នុងអំពើហិង្សាមួយ ដែលបាន​កើត​ឡើង ក្បែរទីលានប្រជាធិបតេយ្យ កាលពីមួយឆ្នាំកន្លងទៅ ក្នុងនោះ ក៏មានការព្រមាន ចាប់តំណាងរាស្រ្ត​ទាំង​៧នាក់ មកពីគណបក្សសង្គ្រោះជាតិនោះដែរ។ ដោយអះអាងមិនលូកដៃ ចូលក្នុងប្រព័ន្ធតុលាការនោះ លោក​នាយក​រដ្ឋមន្ត្រី ហ៊ុន សែន បានថ្លែងតបទៅនឹងការស្វះស្វែង យកវប្បធម៌សន្ទនា មកនិយាយជាមួយលោក ដើម្បី​ដោះ​លែង ជនជាប់ចោទទាំងប៉ុន្មាននោះថា  វប្បធម៌សន្ទនានេះ មិនអាចលប់បំបាត់ នូវទោស​ព្រហ្មទណ្ឌ​​បាន​ឡើយ។

លោក ហ៊ុន សែន បានពន្យល់ក្នុងករណីនេះថា៖ «កុំថារឿងនេះ រឿងនយោបាយ មើលកិច្ចព្រមព្រៀង ថ្ងៃទី២២ ខែកក្កដា ឆ្នាំ២០១៤។ (...) អត់មានកិច្ចព្រមព្រៀងណា​ ទៅត្រួតត្រាបទល្មើសព្រហ្មទណ្ឌ តាមផ្លូវតុលាការបាន​ទេ។ (...) ឥឡូវសន្ទនា នៅតែសន្ទនា។ ប៉ុន្តែរឿងច្បាប់ ទាក់ទងនឹងបទល្មើស ព្រហ្មទណ្ឌ អត់សន្ទនាជាមួយ​ទេ។ បិទផ្លូវតវ៉ាអាហ្នឹង ខ្ញុំអត់មានសិទ្ធិ។ ហើយបញ្ជាតាមចាប់ខ្លួន នៅតែតាមចាប់ខ្លួន ព្រោះអាហ្នឹង វាជារឿង​ព្រហ្មទណ្ឌ លោកឯងមិនតាមចាប់ខ្លួន ប៉ូលិសខុស។ (...) អ្នកទាំង៧នាក់ផ្សេងទៀត ខ្ញុំមិនមែនគំរាមទេ។ តុលាការ​ហៅ សុំអញ្ចើញចូល បើមិនចូលទេ ប្រយ័ត្នគេកាត់កំបាំងមុខ។ មានន័យថា ខ្លួន​បោះបង់សិទ្ធិការពារ​ខ្លួនហើយ។»

ប៉ុន្តែរាល់ការចាប់ចង និងបញ្ជាឲ្យចាប់ចង ដែលអះអាងឡើង ដោយលោកនាយករដ្ឋមន្ត្រីខាងលើនេះ ត្រូវបាន​លោក អ៊ុំ សំអាន ដាក់ការសង្ស័យ ថាអាចជាបញ្ជា របស់របបកុម្មុយនីស នៃក្រុងហាណូយ។ លោក សំអាន បាន​ពន្យល់លើក​ពីមូលហេតុ ប្រាប់ទស្សនាវដ្តីមនោរម្យ.អាំងហ្វូថា  អ្នកដែលត្រូវបានចាប់ខ្លួនទាំងនោះ សុទ្ធតែ​ជាសកម្មជន ដែល​បានចុះមើលបញ្ហាព្រំដែន ក្នុងពេលកន្លងមក ខណៈឯការចាប់ចង ដោយយក​ព្រឹត្តិការណ៍​ថ្ងៃទី១៥ ខែ​កក្កដា ឆ្នាំ២០១៤ មកនិយាយនោះ គឺជា«លេស»។ អ្នកតំណាងរាស្រ្ត អ៊ុំ សំអាន បានបញ្ជាក់ថា៖ «ត្រូវ​ណាស់ ការចាប់ខ្លួនឡើងវិញ អ្នក១១នាក់ កន្លងមកនេះ និងការព្រមានចាប់ខ្លួនបន្តទៀតនោះ ព្រោះតែ​ចង់​ឲ្យការតវ៉ា របស់គណបក្សប្រឆាំង ត្រូវស្ងប់ស្ងាត់ ក្នុងរឿងព្រំដែន។ នេះជាការគម្រាមកំហែងមួយ ឬអាចជាការ​បញ្ជា ពីក្រុងហាណូយមក ដើម្បីឲ្យចាត់ការបំបិទមាត់អ្នកតវ៉ា។»

លោក សំអាន ដែលគេស្គាល់ថា ជាជនសកម្ម ក្នុងការឆ្កឹះកកាយ​បញ្ហាព្រុំដែនរូបនេះ បានលើកយកឧទាហរណ៍​មួយ មកនិយាយថា ដូចបញ្ហា ដែលបង្កឲ្យមានហិង្សា នៅព្រំដែនត្រង់ចំណុចបង្គោល លេខ២០៣នោះ ត្រូវ​បាន​ក្រុងហាណូយ (ប្រទេសវៀតណាម) ធ្វើការថ្គោលទោស និងស្នើមកប្រទេសកម្ពុជា ដើម្បីចាត់ការអ្នកបង្ក​ហិង្សា​ទាំងនោះ។ លោក ថ្លែងឲ្យដឹងថា៖ «យួនអ្នកបង្កហិង្សា ហើយអំពាវនាវឲ្យកម្ពុជា ចាត់ការលើអ្នករងគ្រោះ​ទៅ​វិញ នោះជារឿងអយុត្តិធម៌»។ ឧទាហរណ៍ដោយឡែកមួយទៀត ដូចនៅទីលានប្រជាធិបតេយ្យ (ថ្ងៃទី១៥ ខែ​កក្កដា ឆ្នាំ២០១៤) សន្តិសុខដើរវាយគេតាមចិត្ត តែមិនដែលមានទោសអ្វីសោះ ឯអ្នកដែលត្រូវគេវាយនោះ បែរជាត្រូវ​ជាប់គុកទៅវិញ។ លោកថា៖ «ស្រុកខ្មែរ វាដូច្នេះឯង។ មាត្រា៩ ចោររួចខ្លួន ម្ចាស់ជាប់គុក។ វាអញ្ចឹងឯង ច្បាប់​ស្រុក​ខ្មែរ វាអាស្រ័យទៅលើ តែមេដឹកនាំម្នាក់។»

យ៉ាងណា ទោះជាមានការគម្រាមកំហែង ពីលោកនាយករដ្ឋមន្រ្តីកម្ពុជា លោក ហ៊ុន សែន ក៏ដោយ ក៏ជំហរ​របស់​គណបក្សសង្គ្រោះជាតិ ក្នុងការទាមទារមកវិញ នូវដីខ្មែរដែលលោក សំអាន ថា វៀតណាមបានយក​ទៅ​នោះ នៅ​តែរក្សាដដែល មិនបោះបង់ចោលឡើយ។ អ្នកតំណាងរាស្ត្រ មកពីគណបក្សប្រឆាំង បានពន្យល់ថា បញ្ហា​ព្រំដែននៅ​តែជាបញ្ហាចំបង ក្នុង​ការទាមទាររបស់គណបក្សសង្គ្រោះជាតិ ដើម្បីជាតិ ដើម្បីពលរដ្ឋ និង​ដើម្បី​សង្គមកម្ពុជាទាំងមូល មិនមែន​ដើម្បី​បក្ស ឬបុគ្គលបក្សពួកនោះឡើយ។

សូមបញ្ជាក់ថា តំណាងរាស្រ្តទាំង៧រូប ដែលលោកនាយករដ្ឋមន្រ្តី ហ៊ុន សែន លើកឡើងនោះ ទំនងជាសំដៅ​ទៅ​លោក ហូរ វ៉ាន់, លោក ម៉ែន សុថាវរិន្ទ្រ, អ្នកស្រី មូរ សុខហួរ, លោក រៀល ខេមរិន្ទ្រ, លោក ឡុង រី, លោក កែវ ភារម្យ និងលោក នុត រំដួល។ អ្នកទាំងប្រាំពីរនាក់ ត្រូវបានចាប់ខ្លួនភ្លាមៗ បន្ទាប់ពីមានវត្តមាន នៅទីលាន​ប្រជា​ធិបតេយ្យ ក្រោយអំពើហិង្សាមួយ បានកើតមានឡើង នៅខែកក្កដា ឆ្នាំ២០១៤ ប៉ុន្តែត្រូវបានដោះលែង​វិញ នៅ​បន្ទាប់ពីគណបក្សប្រជាជនកម្ពុជា និងគណបក្សសង្គ្រោះជាតិ បានបង្កើតនូវកិច្ចព្រមព្រៀង «ឈប់ចាប់​ខ្លួន»​មួយ កាលពីថ្ងៃទី២២ ខែកក្កដា ឆ្នាំ២០១៤៕