បាន គី-មូន និង ហ៊ុន សែន ឆ្លើយឆ្លងលិខិតគ្នារឿងផែនទីកម្ពុជា
- ដោយ: ដារា រិទ្ធ អត្ថបទ៖ ដារា រិទ្ធ ([email protected]) - ភ្នំពេញ ថ្ងៃទី០៦ សីហា ២០១៥
- កែប្រែចុងក្រោយ: August 07, 2015
- ប្រធានបទ: ព្រំដែន
- អត្ថបទ: មានបញ្ហា?
- មតិ-យោបល់
-
លិខិតរបស់លោក បាន គី-មូន ចុះថ្ងៃទី០៥ ខែសីហា ឆ្នាំ២០១៥ សរសេរជាភាសាអង់គ្លេស ដែលរដ្ឋាភិបាល បានបកប្រែជាខេមរភាសា ហើយបានផ្សព្វផ្សាយ នៅយប់ថ្ងៃទី០៦ ខែសីហានេះ បានបញ្ជាក់ឲ្យដឹងថា ផែនទីប្រទេសកម្ពុជា ដែលផលិតឡើងនៅចន្លោះ ឆ្នាំ១៩៣៣ ដល់ឆ្នាំ១៩៥៣ អង្គការសហប្រជាជាតិ រកមិនឃើញទេ។ តែលោក បាន គី-មូន បានអះអាងថា មានផែនទីដើមរបស់កម្ពុជាមួយចំនួន ដែលអង្គការសហប្រជាជាតិ ព្រមឲ្យប្រទេសកម្ពុជាខ្ចី ក្នុងរយៈពេលកំណត់មួយជាក់លាក់។
នេះជាលិខិតលើកដំបូងហើយ របស់អគ្គលេខាធិការ នៃអង្គការសហប្រជាជាតិ ដែលបានឆ្លើយតបជាផ្លូវការ ទៅនឹងការស្នើសុំខ្ចីផែនទីរបស់កម្ពុជា។ កាលពីថ្ងៃទី០៦ ខែកក្កដា លោកនាយករដ្ឋមន្ត្រី ហ៊ុន សែន បានសរសេរលិខិតមួយច្បាប់ ទៅលោក បាន គីមូន ដើម្បីសុំខ្ចីផែនទីកម្ពុជា ខ្នាត ១/១០០០០០ ដែលតម្កល់នៅអង្គការប្រជាជាតិ ដោយអះអាងថាយកមកពិនិត្យផ្ទៀងផ្ទាត់ ជាមួយផែនទីដែលរដ្ឋាភិបាល បានប្រើប្រាស់ ដោះស្រាយបញ្ហាព្រំដែន ជាមួយប្រទេសជិតខាង។
លិខិតរបស់អគ្គលេខាធិការ អង្គការសហប្រជាជាតិ បានពន្យល់ថា ផែនទីមួយចំនួននោះ ត្រូវបានរកឃើញ ពីកន្លែងផ្ទុកឯកសារ នៃបណ្ណាល័យ ដាក ហាម៉ាស្ដូហ្សូល របស់ UN ទាំងក្នុងប្រព័ន្ធអេឡិចត្រូនិក និងច្បាប់ចម្លងបោះពុម្ពរួច ដែល UN គិតថា អាចមានប្រយោជន៍ ចំពោះរដ្ឋាភិបាលកម្ពុជា។
លោក បាន គី-មូន បានសរសេរថា អង្គការសហប្រជាជាតិ បានផ្តល់ផែនទី ដែលខ្លួនបានរកឃើញនេះ ជាទម្រង់ឌីជីតាល់ កាលពីថ្ងៃទី២៧ ខែកក្កដា ដល់តំណាងអចិន្ត្រៃយ៍របស់កម្ពុជា ប្រចាំអង្គការសហប្រជាជាតិ លោក ទុយ រី។ លិខិតបន្តថា ជាគោលការណ៍ បណ្ណាល័យដាក ហាម៉ាស្ដូហ្សូល មិនអនុញ្ញាតឲ្យខ្ចីផែនទីដែលស្ថិតក្រោមការថែរក្សារបស់ខ្លួននោះទេ ប៉ុន្តែក្រោយពីមានការពិគ្រោះយោបល់ ដោយឈរលើករណីលើកលែង បណ្ណាល័យអាចឲ្យកម្ពុជាខ្ចីផែនទីទាំងនោះ ក្នុងរយៈពេលមានកំណត់មួយ។
អគ្គលេខាធិការ អង្គការសហប្រជាជាតិ បានបញ្ជាក់ទៀតថា៖ «អង្គការសហប្រជាជាតិ មិនត្រូវបានបកស្រាយ ក្នុងការគាំទ្រ ឬយល់ព្រមជាផ្លូវការចំពោះខ្សែបន្ទាត់ព្រំដែន និងឈ្មោះនានា ដែលបានបង្ហាញ នៅលើផែនទីទាំងនោះទេ»។
ផែនទីដែលអង្គការសហប្រជាជាតិ ថានឹងឲ្យកម្ពុជាខ្ចីនោះ ទំនងជាផែនទីទាំង១៨ផ្ទាំង ដែលធ្លាប់ត្រូវបានលើកឡើង ដោយអ្នកនាំពាក្យ របស់អង្គការពិភពលោកមួយនេះ អ្នកស្រី អេរី កាណេកូ (Eri Kaneko)។ អ្នកស្រី បានឲ្យសារព័ត៌មានក្នុងស្រុកដឹងថា អង្គការសហប្រជាជាតិ បានរកឃើញផែនទីរបស់កម្ពុជាចំនួន១៨ផ្ទាំង និងកំពុងស្វែងរកឯកសារផ្សេងៗទៀត។
គណៈកម្មការចំពោះកិច្ចមួយ ត្រូវបានបង្កើត
ភ្លាមៗ បន្ទាប់ពីទទួលបានលិខិតនោះ លោក ហ៊ុន សែន នាយករដ្ឋមន្ត្រីកម្ពុជា ក៏បានតបសំបុត្រមួយទៅវិញដែរ ដើម្បីថ្លែងអំណរគុណ នូវកាយវិការរបស់អគ្គលេខាធិការ អង្គការសហប្រជាតិ ទាក់ទងនឹងការស្នើសុំផែនទី នៃប្រទេសកម្ពុជានេះ។ លោក ហ៊ុន សែន ថែមទាំងបានបង្កើត «គណៈកម្មការចំពោះកិច្ច សម្រាប់សម្របសម្រួល ការងារទទួល ប្រគល់ និងផ្ទៀងផ្ទាត់ផែនទី» មួយទៀត នៅក្នុងយប់ដដែលនេះផង។
គណៈកម្មការចំពោះកិច្ច ដែលត្រូវបានបង្កើតឡើង ក្នុងយប់ថ្ងៃ ០៦ ខែសីហា ឆ្នាំ២០១៥នេះ មានឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ ជាប្រធាន, លោក វ៉ា គឹមហុង ទេសរដ្ឋមន្រ្តី ទទួលបន្ទុកកិច្ចការព្រំដែន ជាអនុប្រធាន និង លោក អ៊ឹម ឈុនលឹម ទេសរដ្ឋមន្រ្តី ក្រសួងរៀបចំដែនដី ជាអនុប្រធាន ព្រមទាំងមន្រ្តីរដ្ឋាភិបាល មួយចំនួនទៀត ជាសមាជិក៕
» ខាងក្រោមនេះ ជាខ្លឺមសារទាំងស្រុង នៃលិខិតរបស់លោក បាន គីមូន និងរបស់លោក ហ៊ុន សែន (ចុចពីលើ ដើម្បីពង្រីកអាន)៖
