បើតាមការពិនិត្យជាក់ស្តែង ឃើញថា សន្តិសុខ និងប្រធានសន្តិសុខសណ្តាប់ធ្នាប់ ក្នុងបរិវេណគំនរសម្រាម នៅភូមិបឹងជើងឯក សង្កាត់ជើងឯក ខណ្ឌដង្កោ រាជធានីភ្នំពេញនោះថា ជាបុគ្គលិករបស់ក្រុមហ៊ុនស៊ិនទ្រី ឯកទេសខាងការប្រមូលសម្រាម និងសំអាតរាជធានី។ តែពេលដែលយុវជនមួយក្រុម ចង់ចូលទៅចែកចាយ អាហារ នៅក្នុងបរិវេណ នៃទីគំនរចាក់សម្រាមនោះ ស្រាប់តែប្រធានសន្តិសុខ​របស់ក្រុមបុគ្គលិកនេះ បាន​បដិសេធ​មិនឲ្យចូល យ៉ាង«ដាច់ខាត»។

ការចុះជួយចែកចាយចំណីអាហារបន្តិបន្តូច ដើម្បីសង្គ្រោះក្រុមកុមារទាំងនេះ បានធ្វើឡើង កាលពីថ្ងៃ​អាទិត្យ​ទី១៦ ខែសីហា ឆ្នាំ២០១៥កន្លងទៅនេះ ដោយយុវជនឯករាជ្យមួយក្រុម ភាគច្រើនជានិស្សិត មកពី​វិទ្យាស្ថាន​ជាតិពាណិជ្ជកម្ម ដែលឈឺឆ្អាលនឹងបញ្ហាសង្គម ជាពិសេសជនក្រីក្រ នៅស្ថិតនៅនឹងច្រមុះ នៃរាជធានី​ភ្នំពេញ។ ប៉ុន្តែការឈឺឆ្អាលនោះ មិនអាចធ្វើទៅបានទេ បើគ្មានការអនុញ្ញាតពី«ថ្នាក់លើ។ នេះបើតាម​សំដី​របស់​សមាជិក​ម្នាក់ នៅក្រុមយុវជន-យុវនារីទាំងនេះ។ សូមទស្សនាកិច្ចសម្ភាសទាំងស្រុង នៅក្នុងវីដេអូខាងក្រោមអត្ថបទ។

ប្រធានសន្ដិសុខ លោក ថន ធា លើកឡើងថា បើគ្មានលិខិតចេញ ពីសាលារាជធានីទេ គ្មានអ្នកណាមាន​សិទ្ធិ​ចូល ក្នុងទីលានរើសសម្រាមនេះឡើយ។លោកបានថ្លែងឡើងថា៖ «ខ្ញុំអត់ហ៊ានឲ្យចូលទេបង បើអត់មាន​លិខិត​អនុញ្ញាត របស់សាលាក្រុងភ្នំពេញ។ ខ្ញុំធ្វើការនេះ នៅក្រោមឱវាទរបស់សាលាក្រុងភ្នំពេញទេ។»

ប្រធានផ្នែកសន្តិសុខសណ្តាប់ធ្នាប់ ប្រចាំច្រកចូលទីលានគំនរសម្រាម បឹងជើងឯក បានថ្លែងទៀតថា លោកចាំ​សហការជានិច្ច នូវរាល់សណ្តានចិត្តសប្បុរស របស់អ្នកមានចិត្ត ចង់ជួយដល់អ្នកក្រខ្សត់ តែលោកមិនអាច​បំពានបានទេ បើគ្មានការអុញ្ញាតនោះ។ ដោយឡែកទស្សនាវដ្តីមនោរម្យ.អាំងហ្វូ មិនអាចសុំការបំភ្លឺ លើករណី​នេះ ពីអ្នកនាំពាក្យសាលារាជធានីភ្នំពេញបានទេ ដោយនៅពេលទូរស័ព្ទហៅចូល លោក ឡុង ឌីម៉ង់ បាន​បដិសេធ ដោយអះអាងថា រវល់។

បន្ទាប់ពីមានកាហាមឃាត់ មិនឲ្យក្រុមអ្នកកាសែត រួមទាំងក្រុមយុវជន ចូលទៅក្នុងទីលានគំនរសម្រាម អ្នក​ទាំងនោះបានធ្វើដំណើរបន្ត ទៅចែកចាយចំណីអាហារ និងសម្ភារៈសិក្សាមួយចំនូន ទៅកាន់អ្នកភូមិ​នៅជិត​នោះ។ ក្រុមគ្រួសារអ្នកភូមិទាំងនោះ ក៏សុទ្ធតែរស់នៅ ទីពឹងនឹងគំនរសម្រាម ដ៏ធំនេះដែរ។ អ្នកខ្លះគ្មាន​សម្លៀក​បំពាក់គ្រប់គ្រាន់ គ្មានចំណីអាហារគ្រប់គ្រាន់ គ្មានជម្រក និងមិនទទួលបានការសិក្សា ជាដើម៕