ក្នុងសន្និសីទសារព័ត៌មាន រៀបចំឡើង នៅក្នុងទីស្ដីការគណៈរដ្ឋមន្ត្រី ដោយមានការរួមសហកា ពីក្រសួង​ព័ត៌មាន កាលពីព្រឹកថ្ងៃទី១៩ ខេសីហា ឆ្នាំ២០១៥ នេះ លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បាន​លើក​ឡើង​ថា ការចាប់ខ្លួនលោក ហុង សុខហួរ សមាជិកព្រឹទ្ធសភា មកពីគណបក្ស សម រង្ស៊ី ត្រូវបាន​ធ្វើ​ឡើង ក្នុង​គោលបំណងពង្រឹងនីតិរដ្ឋនៅកម្ពុជា ដែលត្រូវតែដើរទន្ទឹមគ្នា រវាងការអនុវត្ត និងការគោរពច្បាប់។ លោក​បាន​ទទួលស្គាល់ថា ប្រទេសកម្ពុជាមិនមែនជាសម្បត្តិទ្រព្យ (កម្មសិទ្ធិ) របស់គណបក្សប្រឆាំង ឬ​គណបក្ស​ប្រជាជន​កម្ពុជា​នោះ​ឡើយ។

មន្រ្តីនាំពាក្យរាជរដ្ឋាភិបាលរូបនេះ បានអះអាងបន្ថែមថា ដូច្នេះរដ្ឋាភិបាលធ្វើអ្វីទៅតាម នីតិរដ្ឋ និងទិដ្ឋភាព​អន្តរជាតិ​ជាក់ស្តែង។ លោកបានពន្យល់ថា៖ «ប្រទេសខ្មែ មិនមែនជាសម្បត្តិទ្រព្យ របស់គណបក្សប្រឆាំង ឬ​គណបក្សប្រជាជន (កម្ពុជា) ទេ។ តែយើងធ្វើអ្វី ទៅតាមនីត្យានុកូលភាព (ធ្វើតាមច្បាប់) នីតិរដ្ឋ និងអ្វីជា​ទិដ្ឋភាព​អន្តរជាតិ ដែលគេមកចូលរួម និងដាច់ខាត យើងត្រូវតម្រូវតាម។ (...) ការងារព្រំដែន មិនមែន​ជា​រឿង​នយោបាយ​ទេ ជារឿងបច្ចេកទេសសុទ្ធសាធ។ ដូច្នេះផលរំពឹងទុក ដែលយកការងារព្រំដែន ជានយោបាយ ដើម្បី​ប្រជា​ប្រិយ​ភាព ដើម្បីការងារសន្លឹកឆ្នោត នោះគិតខុសហើយ។»

លោក ផៃ ស៊ីផាន ដែលជារដ្ឋលេខាធិការ នៃទីស្ដីការគណរដ្ឋមន្រ្តីផងនោះ បានគាំទ្រថា បើគណបក្ស​សង្គ្រោះ​ជាតិ ចង់ចូលរួមធ្ចើការជាមួយរដ្ឋាភិបាល ក្នុងរឿងព្រំដែននោះ គួស្នើសុំ«គណៈរដ្ឋមន្រ្តីចម្រុះ»បាន។ លោក​បាន​បញ្ជាក់ទៀតថា៖ «យើងមិនចង់ឲ្យព្រះរាជជាណាចក្រកម្ពុជា ស្ថិតនៅក្រោមឥទ្ថិពល ពួកប្រឆាំងនោះទេ។»

អ្នកនាំពាក្យទីស្ដីការគណៈរដ្ឋមន្ត្រី បានលើកសារលិខិត របស់លោកនាយករដ្ឋមន្រ្តី ហ៊ុន សែន មកពន្យល់ នូវ​ករណីពីរដាច់ដោយឡែកពីគ្នា៖ «(ចំណុចទី១) លោកចង់បញ្ចប់ ពួកផ្កាប់មុខ ឬពួកជ្រុលនិយម។ ចំណុចទីពីរ លោកចង់ឲ្យមានឯកភាពជាតិ ក្នុងការប្រើប្រាស់ផែនទី។ (...) មានរាជបណ្ឌិតសភា ជាអាជ្ញាកណ្តាល។»

សូមរំលឹកថា មុនការចាប់ខ្លួនលោក ហុង សុខហួរ សមាជិកព្រឹទ្ធិសភា មកពីគណបក្សប្រឆាំងនោះ ទីស្ដីការ​គណៈរដ្ឋមន្ត្រី កាលពីថ្ងៃទី១៨ សីហា បានបញ្ចេញខ្សែអាត់វីដេអូ ដោយបានធ្វើការផ្សាយជាសាធារណៈ ពី​គោលការណ៍ច្បាប់ ពាក់ព័ន្ធនឹងការចាប់ខ្លួនខាងលើនេះ។ ទីស្តីការគណរដ្ឋមន្រ្តី បានចាត់ទុកថាសមាជិក ឬ​សកម្មជនមួយចំនួន នៃគណបក្សប្រឆាំង បាននឹងកំពុងធ្វើការមួលបង្កាច់ បង្ខូចឈ្មោះរដ្ឋាភិបាល ក្នុងរឿង​ព្រំដែន ផ្ទុយពីការពិតទាំស្រុង។ បន្ទាប់មក នៅព្រឹកថ្ងៃទី១៥ ខែសីហា នារាជធានីភ្នំពេញ លោក ហុង សុខហួរ ត្រូវបានសមត្ថកិច្ចចាប់ខ្លួន តាមបញ្ជារបស់លោកនាយករដ្ឋមន្ត្រី ហ៊ុន សែន ពីបទក្លែងឯកសារ​សាធារណៈ៕