ហេតុការណ៍បានកើតឡើង នៅកណ្ដាក្រុងអ៊ីស្តាមប៊ូល នៃប្រទេសទួរគី ហើយវីដេអូ ដែថតជាប់ដោយកាម៉េរ៉ា​សុវត្ថិភាពជាច្រើននេះ បានបង្កឲ្យបណ្ដាជន ពេញទាំងប្រទេស យកមកជជែក និងចែករំលែកបន្តៗគ្នា មិន​ដាច់​សូរ នៅក្នុងសប្ដាហ៍កន្លងមកនេះ។

បើតាមបណ្ដាញផ្សព្វផ្សាយក្នុងស្រុក បានឲ្យដឹងថា ទេសចរណ៍ជាតិអៀឡង់ម្នាក់នេះ មានបំណងចង់ទិញ​ភេសជ្ជៈដើម្បីទទួលទាន តែបានបើកចំទូត្រជាក់មួយ ដែលមិនមានសភាពរឹងមាំ ធ្វើឲ្យដបនិងកំប៉ុងទឹក​ភេសជ្ជៈ​ជាច្រើន បានធ្លាក់ចេញមកលើដី។ ហេតុការណ៍ដោយចៃដន្យនេះ បានបណ្ដាលឲ្យមាន ការតឹង​សរសៃ​ក និងពាក្យសម្ដីផ្ទុះឡើង រវាងទេសចរណ៍ និងអ្នកលក់ ហើយឈានទៅដល់ការវាយតប់គ្នា ពាស​ពេញ​ផ្លូវ។

ក្រុមអាជីវករ បានព្រួតគ្នា ស្រវាយកអ្វីក៏ដោយ ដែលនៅក្បែរ ដូចជាដំបង អំបោស កៅអី... ដើម្បីបើកការវាយ​ប្រហារ លើទេសចរណ៍រូបនោះ។ ប៉ុន្តែ សង្គ្រាមវាយតប់មួយចម្អិនកំពិសនេះ មិនបានផ្ដល់ជ័យជំនះ ឲ្យក្រុម​អាជីវករ​ទាំងនោះឡើយ ដោយហេតុថា អ្នកទេសចរណ៍ម្នាក់នេះ ជាអ្នកប្រដាល់អាជីព របស់ប្រទេសអៀឡង់។ ដូច្នេះ​វាពិតជា មិនពិបាកយល់ឡើង ពីសភាពរបស់អាជីវករម្នាក់ ដែលត្រូវអ្នកប្រដាល់ ព្រលែងមួយ​កណ្ដាប់​ដៃ តបទៅវិញ ចំកណ្ដាលមុខនោះ៕