ជនរងគ្រោះ​ព្រោះអ្នកបើកបរ​រថយន្ដ​ខ្លួនឯង​នេះ ជាលោកវរសេនីយ៍ទោ (សក្ដិ៤កន្លះ) អ៊ុំ ចន្ទណារិទ្ធ មានថានៈ ជានាយការិយាល័យ នៃស្នងការនគរបាលខេត្ត តាកែវ។ លោកត្រូវបានអ្នកបើកបររថយន្តផ្ទាល់ខ្លួន ថយ​រថយន្ត​បុកស្លាប់ នៅផ្ទះរបស់លោក កាលពីយប់ថ្ងៃទី២១ ខែសីហា ឆ្នាំ២០១៥ ក្នុងភូមិ២ សង្កាត់រកាក្នុង ក្រុងដូនកែវ ខេត្តតាកែវ។

ប្រភពពីសមត្ថកិច្ចខេត្ត ក្នុងការស៊ើបអង្កេតជំហានដំបូង ហើយត្រូវបានដកស្រង់ ដោយសារព័ត៌មាន​ក្នុង​ស្រុក ជាច្រើននោះ បានបញ្ជាក់ថា នៅយប់នោះ លោក អ៊ុំ ចន្ទណារិទ្ធ បានជិះរថយន្ដត្រឡប់មកផ្ទះវិញ បន្ទាប់ពី​បាន​ទៅកន្លែងផឹកស៊ី ជាមួយនឹងមិត្តភក្តិ។ លុះមកដល់ផ្ទះ ជនរងគ្រោះ បានចុះពីលើរថយន្ត ដើម្បីមកធ្វើសញ្ញា ឲ្យ​អ្នក​បើក​រថយន្តរបស់លោក ថយរថយន្តចូលផ្ទះ។

ប៉ុន្តែគេនៅមិនទាន់ដឹងថា តើអ្នកបើកបរបានស្រវឹងស្រា ឬជាការធ្វេសប្រហេស ឬអាចជាការប៉ុនប៉ង​ធ្វើ​ឃាត​នោះទេ ប៉ុន្តែជនបង្ករូបនេះ បានថយរថយន្ដបុកលោកសក្ដិ៤កន្លះ ខ្ទប់ទៅនឹងជញ្ជាំងរបង បណ្ដាលឲ្យមន្ត្រី​នគរបាលខេត្ត ស្លាប់ភ្លាមៗនៅនឹងកន្លែង។ អ្នកបើកបរបានរត់គេចខ្លួន មុននឹងក្រុមគ្រួសារលោក អ៊ុំ ចន្ទណារិទ្ធ បានដឹងពីហេតុការណ៍ និងបានផ្អើលឆោឡោឡើង។

សពជនរងគ្រោះ កំពុងត្រូវបានក្រុមគ្រួសារ យកទៅធ្វើបុណ្យតាមប្រពៃណី។ គ្រោះថ្នាក់ចរាចរណ៍ បានកើត​ឡើងជាហូហែរក្នុងប្រទេសកម្ពុជា ដោយសារអ្នកប្រើប្រាស់ទ្រូងផ្លូវភាគច្រើន មិនគោរពច្បាប់ ឬក្រម​ចរាចរណ៍​ផ្លូវគោក។ មួយភាគធំ ពីក្នុងចំណោមគ្រោះថ្នាក់ទាំងនោះ បណ្ដាលមកពីអ្នកបើកបរ បានផឹកស្រវឹង។ ដោយ​ឡែក​ករណី ដូចលោកនាយការិយាល័យ អ៊ុំ ចន្ទណារិទ្ធ ជាករណីមួយកម្រកើតមានណាស់៕