៩ វិធីសំខាន់ៗដែលជួយឲ្យកូនរបស់អ្នក «ចម្រើនខាងជំនាញអាន»
គ្មានពានរង្វាន់ការសិក្សាណា ដែលមានសារសំខាន់ ជាងការក្លាយជាអ្នកអាន ដ៏ល្អម្នាក់នោះឡើយ។ ឳពុកម្តាយ ស្គាល់ច្បាស់អំពីចរិតកូនៗ របស់ពួកគេ អាចផ្តល់ការណែនាំ និងការយកចិត្តទុកដាក់ បានគ្រប់ពេល ដែលការធ្វើបែបនេះ នឹងដឹកនាំឲ្យកូនៗ ឈានទៅរកភាពជោគជ័យ នៅក្នុងការអានសៀវភៅ។
ទស្សនាវដ្ដីមនោរម្យព័ងអាំងហ្វូ សូមបង្ហាញពីវិធីមួយចំនួន ដែលអាចជួយឲ្យកូនៗ របស់លោកអ្នក ក្លាយជាអ្នកអាន កាន់តែពូកែជាងមុន។
១. កំនត់យកពេលវេលាជាប្រចាំ ដាច់ដោយឡែកមួយដើម្បីអានសៀវភៅឲ្យកូនលោកអ្នកបានស្តាប់ជារៀងរាល់ថ្ងៃ។
តាមរយៈការសិក្សា បានបង្ហាញថា ការអានឮៗឲ្យកូនៗលោកអ្នកបានស្តាប់ នឹងបង្កើតឲ្យមានផលចំណេញ ជាសំខាន់នៅក្នុងការអាន ដូចជា ការយល់អត្ថបទ វាក្យស័ព្ទ និងអត្ថន័យស៊ីជម្រៅ នៃពាក្យនីមួយៗ។ បើទោះណាជាកូនរបស់លោកអ្នកស្ថិតនៅវ័យ មិនទាន់គ្រប់អាយុ ចូលរៀនកម្រិតមត្តេយ្យ ឬ ស្ថិតក្នុងវ័យជំទង់ក៏ដោយ ក៏ការអាន វានឹងអាចជួយបង្កើនចំណង់ពួកគេ នៅក្នុង ការប្រកបដោយភាពឯករាជ្យ បានដែរ។
២. ត្រូវរៀបចំ ឲ្យមានសៀវភៅអាន នៅជុំវិញខ្លួនកូនៗរបស់លោកអ្នក
ក្មេងៗ ដែលស្ថិតនៅក្នុងបរិស្ថាន ដែលមានសៀវភៅសំបូរបែប សម្រាប់អាននៅឯផ្ទះ គឺតែងតែទទួលបានពិន្ទុខ្ពស់ ពីការប្រលងផ្លូវការម្តងៗ។ ចូរធ្វើការទាក់ទាញ កូនៗរបស់លោកអ្នក ដើម្បីឲ្យអានសៀវភៅ តាមរយៈការបង្កើតឲ្យមាន ការផ្តល់ក្នុងកម្រិតធំមួយ នូវសៀវភៅ និងទស្សនាវដ្តី ដែលបានស្នើសុំ ស្របតាមកម្រិតយល់ដឹង (កម្រិតវប្បធម៌) របស់ពួកគេ។ សូមដាក់ សម្ភារៈអំណានទាំងឡាយ ឲ្យមាននៅក្នុងឡាន បន្ទប់ទឹក បន្ទប់គេង បន្ទប់គ្រួសារ ហើយនិងសូម្បីតែជិតទូរទស្សន៍។
៣. ផ្តល់ឱកាសឲ្យគ្រួសារទាំងមូល បានអានសៀវភៅ
សូមចងក្រងឲ្យមានពេលវេលា ១៥ ទៅ ៣០នាទីជារៀងរាល់ថ្ងៃ ដើម្បីអនុញ្ញាតឲ្យគ្រប់គ្នា បានអានសៀវភៅ ជាមួយគ្នាដោយ ស្ងាត់ស្ងៀម។ ការបានឃើញលោកអ្នកចូលចិត្តអានសៀវភៅ ជាប្រចាំដូចនេះ នោះវានឹងញ៉ាំងឲ្យ កូនៗរបស់លោកអ្នក ចូលចិត្តអានសៀវភៅដូចលោកអ្នកដែរ។ ត្រឹមតែពេល ១៥នាទី នៃការអនុវត្តការអានសៀវភៅ ជាប្រចាំរបស់លោកអ្នក នោះវាគឺជាការគ្រប់គ្រាន់ នៅក្នុងការបង្កើនឲ្យ ជំនាញអានសៀវភៅ កូនៗរបស់លោកអ្នក បានកាន់តែប៉ិនប្រសប់ឡើង។
៤. លើកទឹកចិត្ត ឲ្យបានកាន់តែទូលំទូលាយឡើង ទាក់ទងនឹងសកម្មភាព នៃការអានសៀវភៅ
ចូរធ្វើឲ្យការអាន ក្លាយជាចំណែកមួយនៃជីវិតកូនៗ របស់លោកអ្នក។ ចូរទម្លាប់ឲ្យ ពួកគេអានបញ្ជីមុខម្ហូប ស្លាកសញ្ញាចរាចរណ៍ សេចក្តីណែនាំ ពីរបៀបលេងល្បែង កម្សាន្តប្រជាប្រិយ របាយការណ៍ព្យាករណ៍អាកាសធាតុ បញ្ជីពេលវេលាបញ្ចាំងភាពយន្ត ហើយនឹងពត៌មានអនុវត្តប្រចាំថ្ងៃ ផ្សេងៗទៀត។ មិនតែប៉ុណ្ណោះចូរធ្វើឲ្យប្រាកដថា
ជានិច្ចកាល ពួកគេមានអ្វីៗសម្រាប់អាន នៅក្នុងពេលវេលា ទំនេររបស់ពួកគេ សូម្បីតែពេលវេលាណាត់ជួប ការជិះឡាន ការជិះរថភ្លើង ឬការចាំអ្នកផ្សេងចូលផ្សារ ជាដើម។
៥. ចូរធ្វើការអភិវឌ្ឍ ទម្លាប់នៃការចូលអានសៀវភៅ ក្នុងបណ្ណាល័យ
ចូរទាក់ទាញទឹកចិត្តកូនៗរបស់លោកអ្នក ឲ្យអានសៀវភៅឲ្យបានច្រើន តាមរយៈការដឹកនាំពួកគេចូល ក្នុងបណ្ណាល័យ ១ទៅ២ ដងក្នុងមួយសប្តាហ៍ ដើម្បីដូរយកសៀវភៅថ្មីទៀតមកអាន។ បណ្ណាល័យ នីមួយៗ តែងផ្តល់មកនូវកម្មវិធីអាន សម្រាប់មនុស្សគ្រប់វ័យ ការណ៍នេះ អាចនឹងជាការទាក់ទាញ ចំណាប់អារម្មណ៍ កូនៗរបស់លោកអ្នក ឲ្យចូលចិត្តកាន់តែច្រើនឡើង នៅក្នុងការអានសៀវភៅ។
៦. ត្រូវមានការយល់ដឹង អំពីវឌ្ឍនភាពកូនៗ របស់លោកអ្នក
សូមរកឲ្យឃើញ នូវអ្វីដែលជាជំនាញអាន ដែលកូនៗលោកអ្នកសង្ឃឹមទុក តាមកម្រិតថ្នាក់នីមួយៗ។ កម្មវិធីសិក្សា នៅឯសាលា នឹងប្រាប់លោកអ្នក អំពីពត៌មានដែល ទាក់ទងនឹងរឿងនេះ។ សូមលោកអ្នក តាមដានការរីកចម្រើន របស់ពួកគេដែលជាប់ ទាក់ទងនឹងជំនាញអាន ជាមូលដ្ឋានលើប័ណ្ណរបាយការណ៍ និងការប្រលងគំរូទាំងឡាយ។
៧. ចូរស្វែងរកឲ្យឃើញ ពីការលំបាកនានា ដែលទាក់ទង នឹងការអានរបស់កូនៗលោកអ្នក
លោកគ្រូ អ្នកគ្រូ មិនមែនសុទ្ធតែអាចស៊ើបដឹង ពីការលំបាកនៃជំនាញអានសៀវភៅ របស់សិស្សឡើយ លើកលែងតែថា សិស្សនោះមានការ លំបាកខ្លាំងមែនទែន ទាក់ទងនឹងការអានតែប៉ុណ្ណោះ។ សូមស្វែងរកឲ្យឃើញថា តើកូនៗរបស់លោកអ្នក អាចបញ្ចេញសូរសម្លេងច្បាស់ ទៅលើវាក្យស័ព្ទ(ពាក្យ)ឬទេ? តើពួកគេដឹងពីអត្ថន័យ វាក្យស័ព្ទទាំងនោះឬទេ? តើពួកគេ ចេះប្រើបរិបទ វាក្យស័ព្ទទាំងនោះឬទេ? ហើយថា តើពួកគេយល់ច្បាស់ ពីអ្វីដែលពួកគេបាននឹង កំពុងតែអានឬទេ?
៨. ចូរទទួលយកជំនួយ ឲ្យបានឆាប់រហ័ស សម្រាប់ដោះស្រាយបញ្ហាលំបាកនានា ដែលទាក់ទងនឹងការអានសៀវភៅ
បញ្ហាលំបាកក្នុងការអានសៀវភៅ មិនមែនងាយបាត់ទៅវិញ ដោយមន្តអាគមគាថា ឬតាមពេលវេលានោះឡើយ។ កាលដែលកូនៗលោកអ្នក បានទទួលជំនួយឆាប់រហ័ស ទាក់ទងនឹងជំនាញអានកម្រិតណា នោះពួកគេនឹងក្លាយជាអ្នកអាន ដ៏ពូកែកម្រិតនោះដែរ។ សូមធ្វើឲ្យប្រាកដថាកូនៗលោកអ្នក ពិតជាបានទទួល ជំនួយចាំបាច់ទាក់ទងនឹងជំនាញអាន យ៉ាងឆាប់រហ័សពីលោកគ្រូ អ្នកអ្នកគ្រូ គ្រូបន្ទុកថ្នាក់ ឬក៏មជ្ឈមណ្ឌលរបស់ពួកគេ ព្រោះថា បើបែបនេះមែន លោកអ្នកនឹងងាយស្រួលយល់ដឹង ពីបញ្ហាលំបាកទាក់ទងនឹងការអាននៃកូនៗ របស់លោកអ្នក។
៩. សូមប្រើប្រាស់វិធីសាស្ត្រ ឲ្យបានច្រើន ដើម្បីជួយឲ្យកូនៗលោកអ្នក ឈានទៅដល់អ្នកកម្រិតកំពូល
ដើម្បីជួយកូនៗលោកអ្នក ឲ្យមានការអភិវឌ្ឍការអាន លោកអ្នកអាចប្រើមធ្យោបាយ មួយចំនួនដូចជា ការប្រើប្រាស់សៀវភៅអំណាន ការប្រើប្រាស់ អត្ថបទអំណាន តាមកុំព្យូទ័រ សៀវភៅដែលអាចស្តាប់ខ្សែអាត់សម្លេងបាន និងធនធានអំណានដ៏ទៃទៀត ដូចជារឿងព្រេង រឿងកំប្លែង រឿងប្រវត្តិសាស្ត្រ ចិត្តសាស្ត្រអប់រំ និងរឿង មនោសញ្ចេតនាជាដើម....។ល។ ល្បែងកំសាន្តប្រជាប្រិយ គឺជាជម្រើសដ៏ល្អ សម្រាប់ការអភិវឌ្ឍនេះ ព្រោះថា វាបាន អនុញ្ញាតឲ្យកូនៗលោកអ្នក ទទួលបាននូវភាពសប្បាយរីករាយ នៅពេលដែលពួកគេ អនុវត្តជំនាញទាំងនោះ។ សូមបង្ហាញឲ្យឃើញ នូវទឹកចិត្តអំណរចំពោះអំណានកូនៗរបស់លោកអ្នក ការឆ្លើយតបរបស់លោកអ្នក មានឥទ្ធិពលខ្លាំងក្លាណាស់ ក្នុងការជម្រុញឲ្យកូនៗលោកអ្នក ព្យាយាមនូវការលំបាករបស់ពួកគេ ដើម្បីបានក្លាយ ទៅជាអ្នកអានដ៏ពូកែម្នាក់។ សូមធ្វើឲ្យប្រាកដថា លោកអ្នកពិតជាផ្តល់ការសរសើរ ពិតឥតក្លែងក្លាយសម្រាប់ កិច្ចប្រឹងប្រែងរបស់ពួកគេ។
---------------------------------------------
ដោយ៖ គល់រាំង - ភ្នំពេញ ថ្ងៃទី១៦ ខែមិនា ឆ្នាំ ២០១២
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ