ផែនទីសព្វថ្ងៃ ដែលរដ្ឋាភិបាលបាន និងកំពុងប្រើប្រាស់ សុទ្ធសឹងជាផែនទី ដែលទទួលស្គាល់ ដោយអង្គ​អតីត​ព្រះមហាក្សត្រ នរោត្ដម សីហនុ និងព្រះមហាក្សត្រសព្វថ្ងៃ ព្រះនរោត្ដម សីហមុនី។ នេះជាការថ្លែងអះអាង របស់​លោក ផៃ ស៊ីផាន អ្នកនាំពាក្យ និងជារដ្ឋលេខាធិការ ទីស្តីការគណរដ្ឋមន្រ្តី ដែលជាសេនាធិការ​ដ៏​សំខាន់​មួយ នៃរដ្ឋាភិបាលរបស់លោក នាយករដ្ឋមន្ត្រី ហ៊ុន សែន។

សរសេរនៅលើ ទំព័រហ្វេសប៊ុកដ៏ល្បីល្បាញ លោក ផៃ ស៊ីផាន បានអះអាងថា៖ «បើយោងតាមឯកសារ របស់​ព្រះករុណា ព្រះបាទសម្តេច ព្រះនរោត្តម សីហនុ (អតីតព្រះមហាក្សត្រកម្ពុជា) ដែលព្រះអង្គបានឡាយ​ព្រះចុត​ហ្មាយផ្ញើជូន ឯកឧត្តម ផាំ វ៉ាន់ដុង នៅថ្ងៃទី២៧ ខែកញ្ញា ឆ្នាំ១៩៩៩ នោះ ព្រះអង្គបានលើកឡើងថា “ផ្អែកតាម​ផែនទីបារាំង” ហើយសាធារណៈជនបានដឹងឮ ពីការផលិតផែនទី របស់ក្រុមភូមិសាស្ត្រឥណ្ឌូចិនផងដែរ»។

មន្ត្រីអ្នកនាំពាក្យ បានស្រង់ព្រះសំណេរមួយ របស់អតីតព្រះមហាក្សត្រ សីហនុ មកបញ្ជាក់ថា៖ «ផែនទី និង​ឯកសារទាំងអស់នោះហើយ ដែលអតីតរាជរដ្ឋាភិបាលរបស់ខ្ញុំ (នរោត្ដម សីហនុ) អតីតរដ្ឋាភិបាលសាធារណៈ​រដ្ឋ​ប្រជាមានិតកម្ពុជា រដ្ឋកម្ពុជា និងរាជរដ្ឋាភិបាលកម្ពុជាបច្ចុប្បន្ន កំណត់ថាជាព្រំដែនបច្ចុប្បន្នរបស់កម្ពុជា»។

លោក ផៃ ស៊ីផាន បានពន្យល់ថា តាមរយៈខ្លឹមសារ នៃព្រះរាជសារនេះ សម្តេច នរោត្តម សីហនុ បានបង្ហាញ​រួចជាស្រេច នូវផែនទីផ្លូវការ និងអធិបតេយ្យភាពរបស់កម្ពុជា ក៏ដូចជាសុពលភាព នៃផែនទីនេះ នៅថ្ងៃទី៣០ ខែវិច្ឆិកា ឆ្នាំ២០០៥។ មន្រ្តីអ្នកនាំពាក្យរូបនេះ បានបន្តថា ព្រះមហាក្សត្រ នរោត្តម សីហមុនី (ព្រះមហាក្សត្រ​បច្ចុប្បន្ន) ព្រះអង្គទ្រង់ក៏បានព្រះរាជប្រទាន ឡាយព្រះហស្ថលេខា អមដោយការទូលថ្វាយ របស់ប្រធាន​ព្រឹទ្ធសភា ប្រធានរដ្ឋសភា និងនាយករដ្ឋមន្ត្រី លើករណីនេះដែរ។

លោកបន្ថែមថា ព្រះមហាក្សត្រទ្រង់ក៏ត្រាស់បង្គាប់ ដល់រាជរដ្ឋាភិបាល ក្នុងកិច្ចប្រកាសឲ្យប្រើបន្តរាល់នីតិវិធី ដើម្បីអនុវត្តសន្ធិសញ្ញាបំពេញបន្ថែម រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ទៅលើសន្ធិសញ្ញា កំណត់ព្រំដែនរដ្ឋ ឆ្នាំ១៩៨៥។

លោក ផៃ ស៊ីផាន បានសរសេរថា៖ «ជាប្រវត្តិសាស្ត្រ ព្រះរាជវង្សានុវង្សមានសម្តេច ស៊ីសុវត្តិ ជិវ័នមុនីរ័ក្ស (អនុ​ប្រធានទី១ព្រឹទ្ធសភា) សម្តេចនរោត្តម សិរីវុឌ្ឍ ឧបនាយករដ្ឋមន្ត្រី (សហរដ្ឋមន្ត្រីក្រសួងមហាផ្ទៃ) និងសម្ដេច ព្រះហិស្សនា នរោត្តម ច័ត្រពង្ស (ទីប្រឹក្សារាជរដ្ឋាភិបាលកម្ពុជា) ក៏បានទូលថ្វាយ ព្រះមហាក្សត្រ “ពីការ​សម្រេច​ចិត្តរបស់ រាជរដ្ឋាភិបាលកម្ពុជា និងរដ្ឋសភាជាតិ ក្នុងការដោះស្រាយ និងពន្យល់បញ្ហាព្រំដែនកម្ពុជា ជា​មួយសាធារណៈរដ្ឋសង្គមនិយមរៀតណាម ជាការត្រឹមត្រូវ ដោយស្ថាប័នជាតិប្រតិបត្តិ និងស្ថាប័ន​នីតិបញ្ញតិ្ត​ទាំងពីរនេះ ជាតំណាងប្រជាជនកម្ពុជា ព្រមទាំងជាអ្នកកាន់អំណាច និងជាអ្នកទទួលខុសត្រូវ ពេញចំពោះ​មុខ​ប្រជាជាតិប្រជារាស្រ្ត នៃមាតុភូមិកម្ពុជា និងប្រវត្តិសាស្រ្តជាតិយើង។»៕