រលះ​រលួយ​ខ្លួន ព្រោះ​ចូល​​ត្រាំ​ទឹក Javel ព្យាបាល​ជំងឺ​សើរ​ស្បែក

ខ្លួនប្រាណរបស់ស្ត្រីវ័យ២៩ឆ្នាំមួយរូប បានរងការរលាករលះរលួយ អស់ប្រមាណជា៩៨% បន្ទាប់ពីនាងបាន​ធ្វើ​តាម​ការ​ណែនាំ​ដ៏​«អស្ចារ្យ»​មួយ របស់​អ្នក​ជំនាញ​ម្នាក់ ដែលដំបូងឡើយ គ្រាន់តែចង់ឲ្យនាងបានជាសះ ពីបញ្ហាសើរស្បែក​មួយ​ចំនួនប៉ុណ្ណោះ។
Loading...
  • ដោយ: ឈូករ័ត្ន អត្ថបទ៖ ឈូករ័ត្ន ([email protected]) - បារីស ថ្ងៃទី៣០ សីហា ២០១៥
  • កែប្រែចុងក្រោយ: August 31, 2015
  • ប្រធានបទ: គ្រោះថ្នាក់
  • អត្ថបទ: មានបញ្ហា?
  • មតិ-យោបល់

នាង សារ៉ា ខូល (Sarah Cole) ជាតិអូស្ត្រាលី អាយុ២៩ឆ្នាំ ត្រូវបានបញ្ជូនទៅមន្ទីរពេទ្យ ជាបន្ទាន់ ហើយនាង​បាន​ស្ថិត​ក្នុងការសង្គ្រោះជីវិត ដែលជាដំណាក់កាលចុងក្រោយ។ ខ្លួនប្រាណរបស់នាង ត្រូវបានរលាក​រលះ​រលួយ អស់​ប្រមាណជា៩៨% បន្ទាប់ពីបានចូលទៅត្រាំ នៅក្នុងចានងូតទឹក ដែលបំពេញដោយទឹក លាយជា​មួយ​នឹង​សារជាតិរាវឈ្មោះ ទឹក ហ្សាវែល (Javel - ជាតិគីមីជាវត្ថុរាវ ដើម្បីដាក់ឲ្យកាត់ស្នឹម ឬស្នាមប្រឡាក់​អ្វី​មួយ ដែល​​ពិបាក​​ដុស) តាមការណែនាំរបស់អ្នកជំនាញម្នាក់ ដែលចង់ឲ្យនាងជាសះ ពីជំងឺសើរស្បែក។

សារព័ត៌មានអូស្ត្រាលី «Daily Telegraph» បានរៀបរាប់ឲ្យដឹងថា នាង សារ៉ា បានទទួលការណែនាំ ឲ្យ​លាយ​ទឹកងូតទឹក ជាមួយនឹងសារជាតិរាវ ហ្សាវែល។ នៅពេលទទួលបានការណែនាំនោះ នាងបានបដិសេធ​វិញ​ដែរ​ថា៖ «មិនដែលធ្លាប់ដឹងទាល់តែសោះ ក្នុងមួយជីវិតនេះ ពីករណីលាយទឹកហ្សាវែល យកមកងូត... វានឹងអាច​ធ្វើ ឲ្យខ្លួនខ្ញុំរលាករលះបាន!» ប៉ុន្តែអ្នកជំនាញនោះ នៅតែឆ្លើយមកទៀតថា៖ «ទាល់តែអ្នកឯងសាក​ល្បង»។

បន្ទាប់ពីបានងូតទឹកលាយហ្សាវែលរួច នាងសារ៉ា ដែលមានកូនតូចបីនាក់ផងនេះ បានទទួលអារម្មណ៍ ហាក់​ដូចជាស្រាលខ្លួន យកអ្វីមកថ្លែងមិនត្រូវ។ ប៉ុន្តែនៅ២ថ្ងៃក្រោយមក ទើបហេតុភេទចាប់ផ្ដើមឲ្យសញ្ញា។ ខ្លួន​នាងបានញ័រគ្រប់កន្លែងទាំងអស់ នាងដើរមិនបាន និយាយក៏លែងរួចដែរ។ ស្វាមីរបស់នាងបានយកនាង ទៅ​កាន់មន្ទីរពេទ្យជាបន្ទាន់។ ដំណឹងដែលគួរឲ្យរន្ធត់ជាងនេះ គឺគ្រូពេទ្យនៅទីនោះ បានកំណត់ថានាងសារ៉ា មិន​អាចនៅរស់ បានប៉ុន្មានថ្ងៃទៀតទេ។ ការកំណត់របស់គ្រូពេទ្យ បានធ្វើឲ្យក្រុមគ្រួសារ ដែលរស់នៅក្នុងក្រុង ដាបតូ (Dapto ភាគអាគ្នេយ៍នៃកោះអូស្ត្រាលី) បានតៀមរៀបចំបុណ្យសាកសព ឲ្យនាង សារ៉ា រួចជាស្រេច។

ប៉ុន្តែក្រុមគ្រូពេទ្យ មិនបានទុកនាង សារ៉ា មិនរវីរវល់ឡើយ។ ក្រោយពីបានស្នាក់សម្រាក នៅក្នុងមន្ទីរពេទ្យ អស់រយៈពេលជាង២សប្ដាហ៍ នាង សារ៉ា ត្រូវបានបញ្ជូនជាបន្ត ទៅកាន់មន្ទីរពេទ្យមួយទៀត ឈ្មោះ Concord Hospital ដែលមានជំនាញខាងស្បែក និងការរលាក នៅក្នុងក្រុង ស៊ីដនី។ នៅទីនោះ អ្នកជំងឺមានទទួល​អាការៈ​​ធូរស្រាលមកវិញ តែត្រូវរងនូវវិបត្តិមួយទៀត នោះគឺស្លាកស្នាម ដែលដៅជាប់ នៅលើខ្លួននាងពាស​ពេញ តាំង​ពីក្បាលរហូតដល់ចុងជើង៕

» នាង សារ៉ា ក្នុងពេលបច្ចុប្បន្ន៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...