ខារ៉ាអូខេ​មួយ​កន្លែង រំខាន​ដល់​អ្នក​នៅ​ផ្ទះ​ជួល​ដេក​មិន​បាន​

ស្នូរចំរៀង លាន់រងំរណ្តំត្រជៀក ចាប់ពីថ្ងៃលិច រហូតដល់ពេលរាត្រីស្ងាត់ នៅមិនទាន់ត្រូវបានបិទសម្លេង ទាំងនោះទៀត។ សម្លេងទាំងនេះ ចេញទីតាំងខារ៉ាអូខេមួយកន្លែង នៅក្នុងសង្កាត់ស្រះចក ខណ្ឌដូនពេញ រាជធានីភ្នំពេញ បណ្តាលឱ្យអ្នកមានផ្ទះជួល នៅម្តុំនោះ រអ៊ូរទាំយ៉ាងខ្លាំង ថាមិនបានដេកពូន ដោយសម្លេងដ៏រំខាន។
Loading...
  • ដោយ: ក. សោភណ្ឌ អត្ថបទ៖ ក.សោភ័ណ្ឌ ([email protected]) - ភ្នំពេញថ្ងៃទី ២៨ សីហា ២០១៥
  • កែប្រែចុងក្រោយ: September 03, 2015
  • ប្រធានបទ: សណ្ដាប់ធ្នាប់
  • អត្ថបទ: មានបញ្ហា?
  • មតិ-យោបល់

ការបើកអាជីវកម្មខារ៉ាអូខេ មួយកន្លែង បានបង្កសម្លេងរំខានឲ្យពលរដ្ឋអ្នករស់នៅជុំវិញ សម្ដែងការមិន​ពេញ​ចិត្ត។ ទីកន្លែងបើកអាជីវកម្មនោះ ស្ថិតនៅក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ត្រូវបានពលរដ្ឋ​ឲ្យដឹងថា ទើបនឹងបើកថ្មីៗ ហើយបានបង្ក ឲ្យមានសម្លេងខ្ញៀវខ្ញារអឺងកង ធ្វើឲ្យពលរដ្ឋពិបាកទទួល​ទាន​ដំណេក។

បុរសជួលបន្ទប់ នៅជិតទីតាំងខាងលើម្នាក់ វ័យប្រមាណ៣០ឆ្នាំ បានបញ្ចេញវាចារ ទាំងភាពម៉ូហ្មងក្នុងចិត្តថា៖ «ធ្វើការមួយថ្ងៃ ពេលល្ងាចទៅសាលា មកដល់ផ្ទះសង្ឃឹមថា បានសម្រាកស្រួល តែបែរជាមកស្តាប់សម្លេងរំខាន រហូតដល់យប់ម៉ោង១១ ម៉ោង១២ទៅទៀត»។ បុរសដែលធុញទ្រាន់ នឹងសម្លេងរំខានរូបនេះ បានបន្តទៀតថា លោករស់នៅទីនេះយូរមកហើយ មិនដែលមានរឿងនេះទេ តែសម្លេងរំខាននេះ ទើបតែលឺឡើងប្រមាណ២ បី​យប់ចុងក្រោយនេះប៉ុណ្ណោះ។ ពីមុនមិនធ្លាប់មាននោះទេ ហើយលោកក៏មិនបានដឹង ពីប្រភពនៃសម្លេងនោះដែរ តែអ្នករស់នៅបន្ទប់ជិតគ្នាប្រាប់ថា ជាសម្លេងមកពីកន្លែង ខារ៉ាអូខេមួយកន្លែង ដែលទើបតែបើក នៅក្នុងភូមិ​នេះ។

មេភូមិថាមិនអី?

ស្រ្តីវ័យកណ្តាល សុំមិនបញ្ចេញឈ្មោះម្នាក់ទៀត បានលើកឡើងដែរថា គាត់រស់នៅក្នុងសង្កាត់ស្រះចកនេះ យូរ​មកហើយ ពុំធ្លាប់មានសម្លេងច្រៀងរាំ បែបហ៊ោកញ្រ្ចៀវ រំខានដល់ថ្នាក់នេះនោះទេ។ បច្ចុប្បន្នហាក់ខ្លាំងខុស​ពី​ធម្មតា គ្មានអ្នកណាជួយអន្តរាគមន៍សោះ។ អ្នកស្រីបន្តថា ស្វាមីអ្នកស្រី ធ្លាប់បាននិយាយជាមួយមេភូមិទី៦ ក្នុង​សង្កាត់ស្រះចកនេះដែរ ពីបញ្ហាសម្លេងរំខានអ្នកភូមិ មិនបានដេកពូននេះ ប៉ុន្តែលោកមេភូមិនៅគិតថា វាជាបញ្ហា​មិនទាន់ធំដុំនោះឡើយ។

ម្ចាស់បន្ទប់ជួលម្នាក់ទៀត បានអះអាងថា សម្លេងនេះមិនមែននៅក្នុងភូមិទី៦ សង្កាត់ស្រះចកទេ តែវាជាសម្លេង​មកពីភូមិផ្សេង ដូចច្នេះទាល់តែមេភូមិនោះ ជាអ្នកដោះស្រាយទើបបាន។ អ្នកស្រីបានពន្យល់ថា ដោយសារក្នុង​ចំណោមភូមិទាំង៦ គឺភូមិ៦ របស់អ្នកស្រី នៅក្រោមខ្យល់ដូច្នេះ បើមានបញ្ហាសម្លេង នៅភូមិពីមួយ ដល់ភូមិ៥ ធ្វើឲ្យអ្នករស់នៅ ក្នុងភូមិទី៦ ស្ដាប់ឮទាំងអស់ គ្រាន់តែតិចឬច្រើនប៉ុណ្ណោះ។ អ្នកស្រីក៏បានឱ្យដឹងដែរថា កាលពី​មុន មិនដែលមានសម្លេងបែបនេះ នៅពេលយប់ជ្រៅៗនោះទេ ពេលនេះស្រាប់តែមាន ប្រហែលជាមកពីបញ្ហ​បច្ចេកកទេស របស់ក្លិបខារ៉ាអូខេ ទើបតែបង្តើតនោះហើយមើលទៅ។

ទស្សនាវដ្ដីមនោរម្យ.អាំងហ្វូ នៅមិនអាចសុំការបំភ្លឺ ពីបញ្ហារំខាន នៅក្នុងខារ៉ាអូខេថ្មី ពីការរអ៊ូររបស់អ្នកភូមិ​ខាង​លើបានទេ។ យ៉ាងណាក៏ដោយ នៅយប់ថ្ងៃទី ២៨ ខែសីហា ឆ្នាំ២០១៥ សម្លេងច្រៀងរ៉ាំ នៅតែមានរហូតដល់​ម៉ោង ជាង១១យប់ដដែល៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...