វ៉ា គឹមហុង ថា អ៊ុំ សំអាន «ញុះញង់»រឿងព្រំដែនត្រូវមានទោស
- ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ ស្រ៊ុន ទិត្យ -ភ្នំពេញថ្ងៃទី២៩ សីហា ២០១៥
- កែប្រែចុងក្រោយ: September 03, 2015
- ប្រធានបទ: ព្រំដែន
- អត្ថបទ: មានបញ្ហា?
- មតិ-យោបល់
-
រសៀលថ្ងៃទី២៨ ខែសីហា ឆ្នាំ២០១៥ ថ្លែងក្នុងសន្និសីទសារព័ត៌មាន ប្រធានគណៈកម្មាធិការកិច្ចការព្រំដែន កម្ពុជា លោក វ៉ា គឹមហុង នៅតែបង្ហាញជំហររបស់ខ្លួន ជាមួយនឹងការចោទប្រកាន់ថា លោក អ៊ុំ សំអាន តំណាងរាស្រ្តគណបក្សសង្រ្គោះជាតិ កំពុងបន្តការ«ញុះញង់» បង្កើតឲ្យមានអស្ថេរភាពសង្គមកម្ពុជា ដែលជាប្រទេសនីតិរដ្ឋ។
សន្និសីទសារព័ត៌មាននេះ ត្រូវបានធ្វើឡើង បន្ទាប់បីលោក អ៊ុំ សំអាន បានអះអាងថា លោក បានរកឃើញនូវផែនទី ចំនួន២៦ផ្ទាំង ដេលជាផែនទី «បោន» គ្មានត្រាប្រទេសវៀតណាម ដែលត្រូវបានយកមកតំកល់ទុក នៅសហរដ្ឋអាមេរិកក្នុងឆ្នាំ១៩៦៤ ដោយអតីតព្រះមហាក្សត្រខ្មែរ ព្រះបរមរតនកោដ្ឋ ព្រះបាទនរោត្តម សីហនុ។ លោកបានបញ្ជាក់ដូច្នេះថា៖ «លោក វ៉ា គឹមហុង កុហកថា គាត់មកយកផែនទីនៅទីនេះ ជាន់ទី៥។ តាមពិតផែនទី នៅជាន់ក្រោមដី (សូមមើលReading Room) មិនមែននៅជាន់ទី៥ ដូចលោក វ៉ា គឹមហុង និយាយឡើយ។ ប្រហែលជាគាត់ មិនបានមករកផែនទី នៅទីនេះទេ ហើយគាត់ប្រើតែផែនទីយួន អមសន្ធិសញ្ញ ឆ្នាំ១៩៨៥ប៉ុណ្ណោះ។»។
តបនឹងការលើកឡើងនោះ ប្រធានគណៈកម្មាធិការ កិច្ចការព្រំដែនកម្ពុជា បានប្រតិកម្មក្នុងសន្និសីទសារព័ត៌មាន ថាលោកអ៊ុំ សំអានថា កំពុងមួលបង្កាច់ទាំងស្រុង។ លោកបានបញ្ជាក់ថា លោកមិនបាននិយាយ ឬថាលោកយកផែនទី នៅអគារណា ឬជាន់ណា នៅសហរដ្ឋអាមេរិកនោះទេ។ អ្វីដែលលោកបាននិយាយ នៅត្រង់ថា ផែនទីដែលយកមកនេះ បានរក្សាទុកនៅជាន់ទី៥ នៃកន្លែងលោកធ្វើការប៉ុណ្ណោះ។ លោកបញ្ជាក់ដូច្នេះថា៖ «ខ្ញុំគ្រាន់តែនិយាយថាអ៊ីចេះទេ ថាផែនទីនេះ យើងមានយូរហើយ។ យើងដាក់នៅទីស្នាក់ការ របស់អាជ្ញាធរជាតិ ទទួលបន្ទុកកិច្ចការព្រំដែន នៃទីស្ដីការគណៈរដ្ឋមន្ត្រី នៅជាន់ទី៥។ ព្រោះជាជាន់ដែលគេរក ខ្ញុំទុកនៅកន្លែងហ្នឹង ហើយគាត់ទៅថា ខ្ញុំរកឃើញនៅបណ្ណាល័យ សភាសហរដ្ឋអាមេរិក នៅជាន់ទី៥ទៅវិញ គាត់និយាយប្រកាច់ប្រកិនអ៊ីចឹង។»
លោក វ៉ា គឹមហុង បានអះអាងងន្ថែមថា លោកបន្តថា ផែនទីរបស់លោក អ៊ុំ សំអាន មាននោះ ការពិតរដ្ឋាភិបាលកម្ពុជា មានតាំងពីជាងដប់ឆ្នាំមុនម្ល៉េះ។ លោកហៅការថ្លែងរបស់លោក អ៊ុំ សំអាន ម្តងជាពីរដង ដោយមិនទទួលស្គាល់ ឬទទួលយកលទ្ធផល នៃការផ្ទៀងផ្ទាត់ផែនទី កន្លងមកនេះថា ជាអំពើញុះញង់ ឲ្យមានអស្ថិរភាពនយោបាយ សង្គមជាតិលើផ្នែកព្រំដែននេះ។ លោកបញ្ជាក់ទៀតថា៖ «ឥឡូវគេថា បាត់ប៉ុន្មានពាន់ម៉ែត្រការ៉េទៀត? គឺថានិយាយផ្ដេសផ្ដាស ជាការញុះញង់ ធ្វើឲ្យគេលែងទុកចិត្ត មកលើរដ្ឋាភិបាល ធ្វើឲ្យចលាចលក្នុងសង្គមជាតិ។ (...) ការញុះញង់នោះ គ្រោះថ្នាក់បំផុត ចំពោះប្រទេសជាតិយើង, ញុះញង់ធ្ងន់ធ្ងរ មិនអាចអត់អោនអោយបានទេ, ញុះញង់ ធ្វើប៉ះពាល់ទំនាក់ទំនងអន្តរជាតិ, ញុះញង់អោយមានអស្ថេរភាព តាមបណ្តោយព្រំដែន និងរំខាន ដល់ការបោះបង្គោលព្រំដែន។ គាត់ចោទថា យើងប្រើ “ផែនទីក្លែងក្លាយ ឬផែនទីចោរ”។»៕