ប្រភពពីកន្លែងកើតហេតុ បានបញ្ជាក់ប្រាប់ទស្សនាវដ្តីមនោរម្យ.អាំងហ្វូថា ផ្ទះដែលមានការឆាបឆេះដំបូងគេ គឺមានលេខ០៧៩ ក្នុងភូមិឃ្លាំងសាំង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។ ប្រភពបានបន្ថែមថា ផ្ទះដែលឆេះដំបូងគេ មិនអាចត្រូវបានសង្គ្រោះទាន់ពេលទេ តែត្រូវបានព្រះអគ្គិ ឆាបឆេះអស់មួយរយភាគរយ។ មិនតែប៉ុណ្ណោះ ភ្លើងបានរាលដាល ទៅដល់ផ្ទះពីរខ្នងទៀត នៅក្បែរនោះ។

នៅក្នុងហេតុការណ៍នេះ ប្រភពបញ្ជាក់ទៀតថា ឡានទឹកដែលព្យាយាមសម្រុកមកជួយ ជាច្រើនគ្រឿង មិន​អាច​ចូលទៅដល់កន្លែងកើតហេតុ សូម្បីមួយគ្រឿង ព្រោះផ្ទះទាំងនោះ នៅតាមបណ្តោយផ្លូវលំតូចចង្អៀត ឡាន​ចូល​មិនរួច។

លោក វេទ សុនហេង ម្ចាស់ផ្ទះមានគ្រោះ បានថ្លែងឱ្យដឹងថា ដើមហេតុបណ្តាលមកពីផ្ទុះហ្គាស នៅទីតាំងផ្ទះ ដែលលោកជួលឱ្យរោងចក្រមួយ នៅខាងក្រោយផ្ទះ។ ក្នុងករណីគ្រោះដ៏រន្ធត់នេះ លោកប្រាប់ឱ្យដឹងថា កូន​ស្រី​លោកម្នាក់ អាយុប្រមាណ៣០ឆ្នាំ បានដួលសន្លប់ភ្លាម នៅពេលរត់ចេញពីផ្ទះ ដែលកំពុងត្រូវភ្លើងឆេះ យ៉ាង​សន្ធោសន្ធៅ។ បន្ទាប់មក លោកនិងគ្រួសារ បានបញ្ជូនកូនស្រីរងគ្រោះនោះ ទៅកាន់មន្ទីពេទ្យ​ ទាំង​អារម្មណ៍​តក់ស្លុត។

តាមប្រសាសន៍ របស់អ្នកស្រី លី រ៉ូហ្សាន់ អភិបាលរងខណ្ឌឬស្សីកែវ ដែលកំពុងសស្រាក់សស្រាំ ជាមួយ​កម្លាំង​ចម្រុះ និងអ្នកភូមិ ជួយពន្លត់ផ្ទះពីរខ្នងទៀត បានឱ្យដឹងថា អ្នកស្រីនៅមិនទាន់ ទទួលបានទិន្នន័យសរុប នៃ​ការ​ខូចខាត ក្នុងគ្រោះអគ្គីភ័យមួយនេះទេ។ អ្នកស្រីបានបន្ថែមទៀតថា ឡានទឹកទាំ១៤គ្រឿង ដែលមកជួយ​អន្តរាគមន៍ មិនអាចចូលដល់ ទីតាំងកើតហេតុទេ គឺធ្វើការបាញ់រំលង ពីចម្ងាយ ដើម្បីបញ្ជាស និងទប់ស្កាត់​ផ្ទះ​អ្នក​ផ្សេង​ទៀត។

អ្នកស្រីបន្ថែមថា អគ្គិភ័យ ត្រូវពន្លត់បានជោគជ័យ នៅម៉ោងប្រមាណ១៧ល្ងាច ថ្ងៃដដែល។ តុល្យភាពភ្លាមៗ បានឲ្យដឹងថា ផ្ទះទីមួយ ឆេះអស់មួយរយភាគរយ និងសន្លប់ស្រ្តីម្ចាដ់ផ្ទះម្នាក់ - ផ្ទះទីពីរឆេះអស់ ប្រមាណ​៨០​ភាគយរ និងផ្ទះទីបី ឆេះអស់ប្រមាណ៥០ភាគរយ។ អ្នកស្រី លី រ៉ូហ្សាន់ បានផ្តាំដល់ពលរដ្ឋទាំងអស់ មេត្តាប្រុង​ប្រយ័ត្ន​ឱ្យបានខ្ពស់ ចំពោះអ្វីដែលអាចបង្ក ជាអគ្គីភ័យបាន សូមជួយប្រុងប្រយ័តឱ្យមែនទែន ព្រោះមួយ​រយៈ​ចុង​ក្រោយនេះ មានករណី ឆាប់ឆេះច្រើន នៅរាជធានីភ្នំពេញ ក៏ដូចជានៅតាមបណ្តាខេត្ត៕