ចោរឆក់ជើងថ្មីឈ្មោះ «Wesley Sousa de Araujo» បានជិះម៉ូតូ ជាមួយយុវជនម្នាក់ទៀត ធ្វើសកម្មភាពឆក់ នារី​ពីរនាក់ នៅក្នុងកន្លៀតផ្លូវស្ថាត់មួយ នៃក្រុង «Acailandia» ភាគកណ្ដាលនៃប្រទេសប្រេស៊ីល។ ប៉ុន្តែ​ចោរ​ជើង​ថ្មី មិនបានព្រៀងទុក នូវហេតុការណ៍មួយ ដែលអាចធ្វើឲ្យចោរ ដែលកំពុងរៀនលួចឆក់ទាំងពីរ រាង​ចាល​អស់​មួយ​ជីវិត។ រាងចាល ព្រោះក្នុងចំណោមយុវតី ជាជនរងគ្រោះទាំងពីរ មានម្នាក់ជាកីឡាការិនី​ចំបាប់អាជីព ខ្សែ​ក្រវ៉ាត​ខៀវ ផ្នែក«jujitsu» នៃសហព័ន្ធប្រដាល់សេរី ពិភពលោក ដែលត្រូវបានស្គាល់ឈ្មោះ ម៉ូនិក បាស្តូស៍ (Monique Bastos)។

នាង ម៉ូនិក បាស្តូស៍ អាយុ២៣ឆ្នាំ បានថ្លែងប្រាប់គេហទំព័រ «iG» ក្នុងប្រទេសប្រេស៊ីលថា៖ «ម្នាក់ពីក្នុង​ចំណោម​ចោរទាំងនេះ បានឆក់ទូរស័ព្ទដៃ ដែលខ្ញុំកំពុងកាន់។ ខ្ញុំបានឃើញថា ពួកវាអត់មានកាំភ្លើងទេ។ អញ្ចឹង ខ្ញុំ​ផ្តួល​ម៉ូតូ​ពួកវាតែម្ដង។» ក្នុងជំនាញជាអ្នកចំបាប់ស្រាប់នេះ នាង បាស្តួស៍ បានបោកចោរប្រុសវ័យក្មេងម្នាក់ ផូស​ឲ្យ​ដួលនឹងដី មុននឹងយកជើងនាងទាំងពីរខ្ទាស់គ្នា ដើម្បីគាបក ចោរជើងថ្មី ក្នុងរយៈពេលជាង២០​នាទី។

នាង បាស្ដូស៍ បានថ្លែងឡើងទៀតថា៖ «ខ្ញុំអត់មានភ័យអ្វីទេ ព្រោះខ្ញុំដឹងថា ខ្ញុំអាចបង្ក្រាបម្នាក់នេះបាន»។

រីឯចោរជើងថ្មី យុវជន«Wesley Sousa de Araujo»វិញ ដែលទំនងជាទើបនឹងប្រទះ នូវហេតុការណ៍​ដ៏តក់​ស្លុត​របៀបនេះ ក្នុងជីវិតរបស់ខ្លួន មិនអាចធ្វើអ្វីផ្សេងកើត ក្រៅតែពីស្រែករកជំនួយ ពីម៉ែពីឪខ្លួន។ នៅក្នុងវីដេអូ ដែល​ត្រូវបានយកមកបង្ហោះ កាលពីថ្ងៃពុធសប្ដាហ៍មុន នៅលើគេហទំព័រយូធូប គេបានស្ដាប់ឮពាក្យតម្អូញ របស់​យុវជនដូច្នេះថា៖ «ប៉ាប៉ា! ប៉ាប៉ា! ជួយហៅនគរបាលផង... ប៉ាប៉ា! ជួយផង ព្រះយេស៊ូ។ ជាលើកទីមួយ​ហើយ ដែលខ្ញុំធ្វើដូច្នេះ។ ជួយខ្ញុំផង ព្រះជាម្ចាស់... នរណាក៏បាន សូមជួយខ្ញុំផង! នៅឯណា ម៉ែអើយ?»

នៅពេលនាំខ្លួន ទៅដល់ប៉ុស្ដ៍នគរបាល យុវជន«Wesley Sousa de Araujo» បាន​ស្បថ​ថា ខ្លួន​​មិន​បាន​ព្យាយាម លួចឆក់អ្វីពីនារីទាំងពីរនាក់នេះទេ។ ប៉ុន្តែយ៉ាងណាក៏ដោយ ក៏​នគរបាល​ប្រេស៊ីល បាន​​បើក ការស៊ើប​អង្កេត​មួយ​ឡើង​ហើយ ពីករណីនេះ៕