«មូលនិធិឯកត្តកម្មពិភពលោក (Guinness World Records) មានទុក្ខក្រៀមក្រំ យ៉ាងជ្រាលជ្រៅ ដែលបាន​ទទួល​ដំណឹង ពីមរណភាពរបស់លោក ចាន់ដ្រា ដង់ហ្គី ម្ចាស់ឯកត្តកម្មពិភពលោក ជាមនុស្សតូចជាងគេ ក្នុង​លោក» នេះជាអ្វីដែលគេអាចអានបាន នៅក្នុងសេចក្ដីប្រកាសព័ត៌មាន ចេញផ្សាយថ្ងៃទី០៧ ខែកញ្ញា របស់​ស្ថាប័នផ្ដល់រង្វាន់ឯកត្តកម្ម​មួយ​នេះ។ មូលនិធិបានបង្ហាញ នូវការចូលរួមមរណៈទុក្ខ ទៅកាន់គ្រួសារសព របស់​លោក ចាន់ដ្រា ផងដែរ។

លោក ចាន់ដ្រា បានធ្វើមរណភាពនៅថ្ងៃទី៣ ខែកញ្ញា ឆ្នាំ២០១៥ នៅក្រុង ប៉ាហ្គោ ប៉ាហ្គោ (Pago Pago) ទឹកដី​អាមេរិក កណ្ដាលមហាសាគរប៉ាស៊ីភិក ក្នុងអាយុ៧៥ឆ្នាំ។ មានដើមកំណើត នៅថ្ងៃទី៣០ ខែវិច្ឆិកាឆ្នាំ១៩៣៩ នៅក្រុងកាលីម៉ាទី (Kalimati) លោក ចាន់ដ្រា ត្រូវបានទទួលស្គាល់ដោយ មូលនិធិឯកត្តកម្មពិភពលោក នៅ​ខែ​កុម្ភៈ ឆ្នាំ២០១២ ថាជាមនុស្សដែលមាន មាឌតូចជាងគេ នៅក្នុងពិភពលោក។ លោកមានកំពស់ ៥៤,៦​សង់ទីម៉ែត្រ និងមានទម្ងន់ ១២គីឡូក្រាម។

បុរសជាតិណេប៉ាល់រូបនេះ បានឈ្នះពីមុខលោក ជនរ៉ៃ បាឡាវីន (Junrey Balawing) ជាតិហ្វីលីពីន ដែលត្រូវ​បានទទួលស្គាល់ នៅខែមិថុនា ឆ្នាំ២០១១១ ថាជាមនុស្សតូចជាងគេ ក្នុងពិភពលោក នៅមុនលោក ចាន់ដ្រា។ ភរិយារបស់លោក ចាន់ដ្រា ក៏ជាស្ត្រីដែលមានមាឌតូចជាងគេ នៅក្នុងពិភពលោកដែរ។ អ្នកស្រីជាភរិយា ជាតិ​ឥណ្ឌា មានឈ្មោះ ច័ទី អាមហ្សី (Jyoti Amge) មានកំពស់៦២,៨សង់ទីម៉ែត្រ និងមានទម្ងន់ តែ៥គីឡូក្រាម​ប៉ុណ្ណោះ។

កាលពីខែវិច្ឆិកាកន្លងទៅ គណៈកម្មការឯកត្តកម្មពិភពលោក បានរៀបចំឲ្យលោក ចាន់ដ្រា មនុស្ស​ដែលមាន​មាឌតូចជាងគេ ឲ្យជួបជាមួយមនុស្ស ដែលមានមាឌធំជាងគេ​ក្នុងលោក គឺលោក ស៊ុលតង់ កូសេន (Sultan Kösen) ជាតិទួរគី ដែលមានកំពស់ដល់ទៅ ២,៥១ម៉ែត្រ នៅក្នុងរាជធានី ឡុងដ៍ ប្រទេសអង់គ្លេស។ នៅ​ពេល​នោះ លោក ចាន់ដ្រា ដង់ហ្គី បានថ្លែង ក្នុងសម្លៀកបំពាក់​ប្រពៃណីណេប៉ាល់ ថា៖ «ខ្ញុំត្រេកអរខ្លាំងណាស់ ដែល​បានជួបជាមួយ អ្នកដែលមានកំពស់ ខ្ពស់ជាងគេក្នុងលោក។ ខ្ញុំពិតជាចង់ជួប ជាមួយដៃគូ ដែលបញ្ច្រាស​កំពស់​គ្នា ដ៏ខ្លាំងនេះណាស់។»៕