ជាបទពិសោធន៍ជូរចត់មួយ ដែលចេញពីរឿងមួយ ដែលគ្រាន់តែ ជាការលេងសើចសប្បាយប៉ុណ្ណោះ។ បុរស​ជាតិអង់គ្លេស អាយុ៣៦ឆ្នាំ លោក ដានៀល មេដហ្វ័ដ (Daniel Medforth) បានសម្ដែងការលេងសើច ជា​មួយ​មិត្តភ័ក្ររបស់ខ្លួន នៅក្នុងការជប់លៀងមួយ កាលពីសប្ដាហ៍កន្លងទៅ។ ប៉ុន្តែការលេងសើចនោះ បែរជាបាន​បង្ក ឲ្យមានទុក្ខទោស ដល់ខ្លួនឯងទៅវិញ។ លោក ដានៀល បានលេបថ្នាំ សម្រាប់តម្លើងកម្លាំង រួមភេទដ៏ល្បី ឈ្មោះ Viagra អស់មួយកញ្ចប់ ទាំង៣៥គ្រាប់ នៅក្នុងរយៈពេល តែមួយម៉ោងប៉ុណ្ណោះ។

ប្រសិនជាថ្នាំនេះ ជួយតម្លើងឥទ្ធិពល ដល់ការរួមភេទ សម្រាប់មនុស្សបាក់កម្លាំង ឬមនុស្សបស្ចិមវ័យនោះ តែ​ថ្នាំនេះ ក៏មានឥទ្ធិពល ទៅដល់សុខភាពមនុស្ស ដែលបានប្រើវាជ្រុលហួសហេតុ នោះដែរ។ ជាពិសេស ការ​លេបថ្នាំ ទាំង៣៥គ្រាប់នេះ បានធ្វើឲ្យលោក ដានៀល មានអាការៈចង់ក្អួត ឈឺក្បាលវិលមុខ និងបង្កឲ្យភ្នែក មើល​​ឃើញ​រឿងចម្លែកៗជាច្រើន។ លោក ដានៀល ដែលមានប្រពន្ធមានកូនរួចហើយនេះ បានថ្លែងឲ្យ​ដឹង​ថា៖ «ខ្ញុំ​មើល​ឃើញ អ្វីៗល្អទាំងអស់ មានពណ៌បៃតងចម្រុះគ្នា»។

ប៉ុន្តែកម្លាំងរបស់ថ្នាំ Viagra មិនបញ្ឈប់ត្រឹមនេះទេ ព្រោះវាបានបង្ក ឲ្យលិង្គរបស់លោក ដានៀល ងើប​«តម្រង់​ជួរ» មិនដេកមិនពួន... ក្នុងរយៈពេល៥ថ្ងៃ។ លោកបានថ្លែងពីរឿងនេះ ប្រាប់ភរិយារប​ស់លោក។ តែ... អ្នកស្រី​ជាភរិយា បានទូរស័ព្ទហៅរថយន្ដសង្គ្រោះ មកយកលោកពីផ្ទះ ទៅសម្រាកពេទ្យ ដែលធ្វើឲ្យលោក ចាំបាច់​ត្រូវ​រៀបរាប់រឿងនេះ ប្រាប់ក្រុមគ្រូពេទ្យ នៅមន្ទីរពេទ្យជាថ្មីទៀត។ លោក ដានៀល បានថ្លែងប្រាប់សារព័ត៌មាន «Mirror» នៅប្រទេសអង់គ្លេស ឲ្យដឹងថា៖ «គ្រូពេទ្យទាំងនោះ មានឫកពារ ប្រកបដោយវិជ្ជាជីវៈខ្លាំងណាស់។ ខ្ញុំ​បាន​មើលឃើញពួកគេ ខំទប់សំណើច នៅពេលដែលពួកគេ បានស្ដាប់រឿងនេះ។»

នៅពេលចេញពីមន្ទីរពេទ្យ លោក ដានៀល មេដហ្វ័ដ ត្រូវគ្រូពេទ្យបញ្ជា ឲ្យលោកសម្រាក នៅផ្ទះចំនួន​ប៉ុន្មាន​ថ្ងៃបន្ថែម ដើម្បីឲ្យសុខភាពរបស់លោក អាចត្រឡប់មកដូចដើមវិញ។ ផ្ទុយពីហេតុការណ៍ដ៏ហួសចិត្ត ដែល​បង្ក​ជាបញ្ហា ដល់សុខភាពរបស់លោកនោះ បុរសអាយុ៣៦ឆ្នាំរូបនេះ បាននិយាយលេងសើចបន្ត​ទៀត​ថា វាជា​រឿង​គួរឲ្យសោកស្ដាយណាស់ ដែលលិង្គលោក​បានងើបរឹង ក្នុងរយៈពេលដ៏យូរ តែលោកមិនបានប្រើប្រាស់វា ឲ្យ​មាន​ប្រយោជន៍៕