ប្រធានគណបក្សរាជានិយម ហ៊្វុនស៊ិនប៉ិច ព្រះអង្គម្ចាស់ នរោត្តម រណឫទ្ធិ ទ្រង់បានមានបន្ទូល ពាក់ព័ន្ធនឹង​បញ្ហាព្រំដែន​ឬផែនទីថា គណបក្សនយោបាយ ពុំគួរយកករណីនេះ មកធ្វើជាការកេងចំណេញ​នយោបាយ​ឡើយ។

ការលើកឡើង របស់ព្រះអង្គម្ចាស់ខាងលើនេះ ហាក់បានបាញ់ត្រង់ ឆ្ពោះទៅគណបក្សសង្គ្រោះជាតិ ដែល​ជាគណបក្សប្រឆាំង ដែលបានយកបញ្ហាព្រំដែន មកធ្វើការជជែកវែកញ៉ែក យ៉ាងផុលផុស នៅក្នុងរយៈពេល​ចុងក្រោយនេះ។ ព្រះអង្គម្ចាស់ រណឫទ្ធិ ថែមទាំងបានបង្ហាញនូវការគាំទ្រ ចំពោះការផ្ទៀងផ្ទាត់ផែនទី ដោយ​រដ្ឋាភិបាលថា ផែនទីទាំអស់ មានលក្ខណៈដូចគ្នា ទាំងស្រុងនោះផងទៀត។

ថ្លែងក្នុងកិច្ចសម្ភាសជាមួយអ្នកសារព័ត៌មាន ក្រោយបញ្ចប់ការបួងសួង នារមណីយដ្ឋានវត្តភ្នំ កាលពីថ្ងៃទី ១១ ខែកញ្ញា ឆ្នាំ២០១៥ (បួងសួងជូនដល់ អ្នកម្នាង អ៊ុក ផល្លា ដែលទើបតែត្រឡប់ មកពីព្យាបាលខ្លួន នៅប្រទេស​ថៃ) ប្រធានគណបក្ស ហ្វុនស៊ីនប៉ិច បានមានបន្ទូលថា បញ្ហាព្រំដែន ឬផែនទីនោះ លោកមិនគាំទ្រ​ទង្វើ​របស់​មន្រ្តី នៃគណបក្សសង្គ្រោះជាតិឡើយ។ ផ្ទុយមកវិញលោកលើកឡើងថា លោកគាំទ្រ ដល់ការសម្រេចចិត្ត របស់​លោកនាយករដ្ឋមន្រ្តី ហ៊ុន សែន ចំពោះបញ្ហាព្រំដែននេះ។

ព្រះអង្គមានបន្ទូលដូច្នេះថា៖ «ខ្ញុំអត់គាំទ្រសង្គ្រោះជាតិទេ ខ្ញុំគាំទ្រសម្តេចនាយក (រដ្ឋមន្រ្តី)។ ព្រោះគាត់​បាន​ប្រកាសហើយ គាត់ថា គាត់បានទៅថតហើយ ហើយខ្ញុំជួបចៃដន្យ។ (...) ខ្ញុំជួបឯកឧត្តម វ៉ា គឹមហុង ខ្ញុំសួរៗ តើ​ឪពុកខ្ញុំនេះ (នរោត្តម សីហនុ) ព្រោះសម្តេចនាយក មានប្រសាសន៍ ថាសម្តេចតា លោកថាលោកបាន​ប្រគល់​ផែនទី តើលោកបានប្រគល់ផែនទីហ្នឹងមែន ឬមិនមែន?។ (...) ឯកឧត្តម វ៉ា គឹមហុង ខ្សឹបថា សម្តេច​តា​ប្រគល់មែន ប៉ុន្តែទៅសុំគេ គេមិនឲ្យទេ ព្រោះគេថា អានេះជាសម្ងាត់។»

ព្រះអង្គបានទទួលស្គាល់ ក្រោយការផ្ទៀងផ្ទាត់ផែនទីថា ផែនទីដែលអាចយកជាការបាន ជាផែនទីមកពី UN ចំនួន១៨ផ្ទាំង ពិសេសផែនទីមកពីបារាំង ទាំង២៥ផ្ទាំង នោះជាមួយនឹងផែនទី របស់រដ្ឋាភិបាលគឺ​ដូច​គ្នា។ ប្រធានគណបក្សហ្វុនស៊ីនប៉ិច បានលើកឡើងទៀតថា បញ្ហាជាតិ (បញ្ហាព្រំដែន) ជាបញ្ហារបស់​ប្រជា​ពលរដ្ឋ​កម្ពុជាទាំងអស់គ្នា។ ព្រះអង្គម្ចាស់ រណឫទ្ធិ បានថ្លែងថា៖ «ដើម្បីដោះស្រាយបញ្ហាជាតិ វាជារឿងរបស់ខ្មែរ​ទាំង​អស់​គ្នា»៕