ហេតុការណ៍ដ៏កម្រ មិនសូវដែលជួបនេះ បានកើតឡើងនៅទីក្រុង ហ្វីឡាដែលហ្វី សហរដ្ឋអាមេរិក កាលពីថ្ងៃ​សៅរ៍ សប្ដាហ៍កន្លងមកនេះ។ នៅខណៈពេលដែលក្បួន របស់សម្ដេចសង្ឃកាតូលីក ហ្វ្រង់ស័រទី១ បានដង្ហែ​នៅ​តាមដងផ្លូវ ដើម្បីជួបជាមួយមនុស្សម្នា នៅក្នុងទីក្រុងនោះ ទារិកាមួយរូបឈ្មោះ គ្វីន ម៉ាដេន (Quinn Madden) ត្រូវបានសម្ដេចសង្ឃយកទៅបីថើប និងឲ្យពរ។

តាមពិតទៅ ទារកជាច្រើននាក់ណាស់ ដែលត្រូវសម្ដេចសង្ឃយកទៅឲ្យពរ ក្នុងពេលកន្លងមក ដូច្នេះតើមានអ្វី គួរឲ្យចាប់អារម្មណ៍ទៅ? មាន! នោះគឺឪពុកម្ដាយរបស់ទារិកា បានរៀបចំស្លៀកពាក់ឲ្យកូនតូចរបស់ខ្លួន ជា​សម្ដេច​សង្ឃដ៏តូចមួយ។ ការធ្វើបែបនេះ ក្នុងបំណងតែមួយគត់ គឺចង់បានការចាប់អារម្មណ៍ ពីសម្ដេចសង្ឃ​កាតូលីក នៅ​ពេល​ដែលក្បូនដង្ហែ របស់សម្ដេចបានមកដល់ ហើយសម្ដេចនឹងយកកូនខ្លួន ទៅថើបឲ្យពរ ដែល​ឪពុក​ម្ដាយ​គ្រឹស្ទ៍សាសនិកណា ក៏ចង់បាន និងធ្វើដូច្នេះដែរ។

តែការស្លៀកពាក់នេះ មិនត្រឹមតែធ្វើឲ្យសម្ដេចសង្ឃ យកទារិការទៅឲ្យពរនោះទេ តែថែមទាំងបាន ធ្វើឲ្យសម្ដេច​សង្ឃផ្ទុះសំណើច កាច់កកាចស្រង់ នៅលើរថយន្ដយ៉ាងខ្លាំង។ សូមទស្សនាវីដេអូខាងក្រោមនេះ ដែលថត​ដោយ​ឪពុករបស់ទារិកា លោក ដានៀល ម៉ាដេន (Daniel Madden) ហើយត្រូវបានប្រព័ន្ធផ្សព្វផ្សាយ នៅ​ពាស​ពេញ​ពិភពលោក យកទៅផ្សាយបន្ត។ លោកឪពុករូបនេះ បានថ្លែងប្រាប់ទូរទស្សន៍អាមេរិក «6ABC» ប្រកបដោយ​មោទនភាព​ថា៖ «សម្ដេចសង្ឃបានយល់ថា យើងមានគំនិតកំប្លែង»។

ប៉ុន្តែរូបភាពបែបនេះ របស់សម្ដេចសង្ឃ មានន័យម្យ៉ាងទៀត នោះគឺការស្រូប​យក​ប្រជាប្រិយភាព ដែលជា​យុទ្ធវិធី​មួយ របស់សម្ដេចសង្ឃ ដើម្បីទាក់ទងជាមួយបណ្ដាជនទាំងឡាយ ក្នុងពិភពលោក៕