ប៉ារីស រង​ការ​វាយ​ប្រហារ​ច្រើន​កន្លែង យ៉ាង​ហោច​១៨នាក់​ស្លាប់

យ៉ាងហោចមានការផ្ទះអាវុធ ចំនួនបីកន្លែង បានកើតឡើង នៅកណ្ដាលរដ្ឋធានីប៉ារីស ប្រទេស​បារាំង បង្ក​ឲ្យ​មាន​មនុស្ស​ស្លាប់ មាន​ចំនួន​មិន​តិច​ជាង​​១៨នាក់​ឡើយ។ នេះបើតាម​តុល្យភាព ដែលផ្ដល់​ភ្លាមៗ ដោយស្នងការ​នគរបាល នៃ​រដ្ឋធានី​ប៉ារីស។ ប៉ុន្តែ​ប្រភព​ព័ត៌មាន របស់​ទូរទស្សន៍ BFMTV បាន​និយាយ​ថា មនុស្ស​ស្លាប់​បាន​កើន​ឡើង មិន​តិច​ជាង​៦០នាក់។
Loading...
  • ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី១៣ វិច្ឆិកា ២០១៥
  • កែប្រែចុងក្រោយ: November 13, 2015
  • ប្រធានបទ: ភេរវកម្ម
  • អត្ថបទ: មានបញ្ហា?
  • មតិ-យោបល់

កន្លែងទាំងបី ដែលរងការវាយប្រហារនោះ ស្ថិតក្នុងផ្លូវ ប៊ីឆារ (Bichat) ផ្លូវ ឆាររ៉ូន (Charonne) និង​កន្លែង​មួយ​ទៀត នៅនឹងរោងល្ខោន បាតាក្លង់ (Bataclan) នៃសង្កាត់ទី១០ និងទី១១ កណ្ដាលរដ្ឋធានីប៉ារីស។ មនុស្ស​ជា​ច្រើន​នៅ​ក្នុង​រោងល្ខោន បាតាក្លង់ កំពុងត្រូវបានចាប់ ជាចំណាប់ខ្មាំងនៅឡើយ ក្នុង​ពេល​អត្ថបទ​នេះ​កំពុង​សរសេរ។

ស្នូរគ្រាប់បែកចំនួនបីគ្រាប់ ត្រូវបានផ្ទុះឮឡើង នៅក្បែរពហុកីឡាដ្ឋានធំ របស់ប្រទេស (Stade de France) ដែល​មានការប្រកួតកីឡាបាល់ទាត់ ជាលក្ខណៈមិត្តភាព រវាងក្រុមជម្រើសជាតិបារាំង និងអាល្លឺម៉ង់ ក្នុង​យប់​ទី១៣ ខែវិច្ឆិកានេះ។ ប្រធានាធិបតីបារាំង លោក ហ្វ្រង់ស៊័រ ហូឡង់ (François Hollande) ដែល​មាន​វត្តមាន នៅក្នុង​ការប្រកួតកីឡាមិត្តភាពនេះ ត្រូវបានជម្លៀសខ្លួនចេញ ដោយលាក់កំបាំង ដើម្បីបញ្ជៀស​ការ​ភ្ញាក់​ផ្អើល។ នេះ​ បើ​តាម​ការ​ផ្សាយ របស់ទូរទស្សន៍បារាំង iTélé ដែលផ្សាយផ្ទាល់ ពីព្រឹត្តិការណ៍ដ៏រន្ធត់នេះ។

មនុស្សស្លាប់អាចច្រើនជាង ៦០នាក់...

ស្នងការនគរបាល នៃរដ្ឋធានីប៉ារីស បានប្រកាសឲ្យដឹងថា មានមនុស្សយ៉ាងតិច ១៨នាក់ ត្រូវបានសម្លាប់ ក្នុងនោះ ១៥នាក់ នៅរោងល្ខោន បាតាក្លង់ និងបីនាក់ នៅក្បែរពហុកីឡាដ្ឋានធំបារាំង។ ប៉ុន្តែប្រភពព័ត៌មាន របស់ទូរទស្សន៍បារាំង BFMTV បានឲ្យដឹងថា មនុស្សស្លាប់មានមិនតិចជាង ៦០នាក់ ហើយ​ចំនួន​នេះ​អាច​នឹង​កើត​ឡើង នៅក្នុងម៉ោងខាងមុខនេះ។

ភោជនីយដ្ឋានម្ហូបខ្មែរ...

ការវាយប្រហារ នៅផ្លូវ ប៊ីឆារ ត្រូវបានធ្វើឡើង នៅខាងមុខភោជនីយដ្ឋានមួយ ឈ្មោះ ប៉ឺទីកម្ពុជា (Petit Cambodge) ដែលជាភោជនីយដ្ឋានម្ហូបខ្មែរ នៅក្នុងសង្កាត់ទី១១ នៃរដ្ឋធានីប៉ារីស។ បុគ្គលិកបម្រើការម្នាក់ នៅ​ក្នុងភោជនីយដ្ឋាននេះ បានថ្លែងប្រាប់ទូរទស្សន៍ iTélé ថាការវាយប្រហារ បានធ្វើឲ្យមនុស្ស​ម្នាក់​រង​របួស។

អ្នកសារព័ត៌មានមួយរូប របស់សារព័ត៌មានបារាំង «Le Monde» លោក «Daniel Pseny» បានរង​របួស​ត្រង់​ដៃ ដោយគ្រាប់កាំភ្លើង នៅក្នុងការវាយប្រហារ នារោងល្ខោន បាតាក្លង់ ហើយបានរាយការណ៍ប្រាប់ថា មនុស្ស​ជា​ច្រើន​នាក់ ត្រូវបានបាញ់តម្រង់ ហើយបានដួលដេកនៅនឹងដី ជាបន្តបន្ទាប់។ អ្នកសារព័ត៌មានរូបនោះ បាន​និយាយ​ថា ជនខ្មាន់កាំភ្លើង មិនត្រូវបាននគរបាលឃាត់ខ្លួនបានទេ ហើយយ៉ាងហោច ជនខ្មាន់កាំភ្លើងម្នាក់ បាន​គេច​ខ្លួន៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...