ចាក់​ស្រា​វិស្គី​ជាង៥០°ឲ្យ​ទារក​បៅ ព្រោះ​ចង់​ឲ្យ​កូន​បាត់​ឈឺធ្មេញ

ដើម្បីជួយសម្រាលការឈឺចុកចាប់ នៃការដុសធ្មេញដំបូង ឲ្យដល់ទារកអាយុ១០ខែរបស់​ខ្លួន​នោះ ស្ត្រី​ជា​ម្ដាយ​ជាតិ​អាមេរិកាំង​ម្នាក់ បាន​យក​ស្រា​ដែល​មាន​កម្លាំង​ខ្លាំង​មួយ មកដាក់​ក្នុង​ដប ឲ្យ​កូន​បៅ។ ស្ត្រី​វ័យ​២៨ឆ្នាំរូបនេះ ទំនង​ជា​មិន​យល់​ពី​ដំបូន្មាន ដែលផ្ដល់ដោយម្ដាយ​របស់​ខ្លួន (ជីដូន​ទារក) ដោយ​គ្រាន់​តែ​ឲ្យ​លាប នៅ​លើ​អញ្ចាញ​ធ្មេញ​កូន​ប៉ុណ្ណោះ។
Loading...
  • ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី១៥ វិច្ឆិកា ២០១៥
  • កែប្រែចុងក្រោយ: November 16, 2015
  • ប្រធានបទ: សុខភាព
  • អត្ថបទ: មានបញ្ហា?
  • មតិ-យោបល់

ស្ត្រីជាម្ដាយ​ជាតិអាមេរិកាំង​ម្នាក់ អ្នកស្រី ឡូរី សេផាដ (Lori Sheppard) អាយុ២៨ឆ្នាំ ត្រូវបាន​ចោទ​ប្រកាន់ ពី​បទ​ទុកឲ្យកូនរបស់ខ្លួន ប្រឈមនឹងគ្រោះថ្នាក់ដល់ជីវិត។ កាលពីសប្ដាហ៍មុន ស្ត្រីវ័យក្មេង ដែល​រស់​នៅ​ក្នុង​ក្រុង «Little Rock» នៃរដ្ឋ «Arkansas» រូបនេះ ទំនងជាធុញទ្រាន់ នឹងស្ដាប់សម្លេងយំ របស់​ទារក​អាយុ​១០ខែ របស់​ខ្លួនតទៅទៀត ដោយហេតុថា ទារកតូចមួយនេះ ដល់វ័យត្រូវដុះធ្មេញ ហើយថ្នាំបន្ថយ​ការ​ចុក​ចាប់ ដូច​​យ៉ាង «Paracétamol» ជាដើម មិនអាចជួយឲ្យទារកស្រាកស្រាន្ដ ពីការឈឺចុកពើតបានឡើយ។

នៅពេលនោះ ម្ដាយរបស់អ្នកស្រី ឡូរី បានផ្ដល់ដំបូន្មានឲ្យកូនស្រីខ្លួន សាកល្បងទម្លាប់មួយ ក្នុងគ្រួសារ ដែល​បន្សល់ទុក តាំងពីប៉ុន្មានជំនាន់មកហើយ នោះគឺដាក់ស្រា លាបពីលើអញ្ចាញធ្មេញ របស់ទារក ដែល​ជា​ចៅរបស់គាត់ (កំណត់សម្គាល់ របស់ការិយាល័យនិពន្ធ៖ សូមកុំធ្វើតាមឲ្យសោះ ព្រោះគ្មានការអះអាង ថា​ទង្វើ​នេះ​ពិតជាជាសម្រាន្ដការឈឺចាប់ ដែលចេញពីការដុះធ្មេញ របស់ទារកនោះទេ)។ អ្នកស្រី ឡូរី សេផាដ បាន​ឮដូច្នេះហើយ តែប្រហែលជាយល់មិនបានច្បាស់ ក៏បានចាក់ស្រាវីស្គី ដែលមានកម្រិតខ្លាំងជាង ៥០​អង្សា ដាក់ចូលទៅក្នុងដបបំបៅទារក ហើយយកទៅឲ្យកូនអ្នកស្រីបៅ។ នេះបើតាមរបាយការណ៍មួយ របស់​ទូរទស្សន៍​អាមេរិក «FOX 29»។

បន្ទាប់ពីបានបញ្ច្រកកូន និងទុកកូននៅក្នុងសួនច្បារមួយសន្ទុះ ស្ត្រីជាម្ដាយវ័យក្មេង បានត្រឡប់មក​មើល​កូន​វិញ ឃើញទារកដ៏តូចរបស់ខ្លួន លែងកម្រើកដឹងខ្លួនរួចទៅហើយ។ នាងបានស្ទុះស្ទារ យកទារកទៅផ្នែក​សង្គ្រោះ​បន្ទាន់ នៅឯមន្ទីរពេទ្យ។

នៅទីនោះ ក្រុមគ្រូពេទ្យបានរកឃើញ ថានៅក្នុងឈាមរបស់ទារក មានកម្រិតជាតិអាល់កុល ដល់ទៅ០,១៩​ក្រាម។ នៅចំពោះការសាកសួរ របស់អ្នកស៊ើបសួររបស់អាជ្ញាធរ អ្នកស្រី ឡូរី បានទម្លាក់កំហុស ទៅលើកុមារ​ម្នាក់ ដែលជាកូនប្រុសរបស់បងថ្លៃរបស់ខ្លួន។ ប៉ុន្តែនៅទីបំផុត នាងបានសារភាពកំហុស ដែលនាងប្រព្រឹត្តិ​នេះ នៅបន្ទាប់ពីប្ដីរបស់នាង បាននិយាយប្រាប់អ្នកស៊ើបអង្កេតដែរ ថាខ្លួនបានទុកស្រាវីស្គីអាមេរិក​មួយ​ដប នៅក្នុងទូទឹកកក។

ស្ត្រីជាម្ដាយ ត្រូវបានអាជ្ញាធរចាប់ដាក់ឃុំ ហើយថ្លៃប្រាក់កក់ ដើម្បីអាចនៅក្រៅឃុំ​ជា​បណ្ដោះ​អាសន្ន ត្រូវ​បាន​កំហិតរហូតដល់ ១០ ០០០ដុល្លា។ រីឯកូនទាំងបីនាក់របស់នាង ក្នុងនោះមាន​ទាំង​ទារក​រងគ្រោះ ដែល​បានជួយឲ្យរួចជីវិតផង ត្រូវបានប្រគល់ទៅឲ្យផ្នែកសង្គមកិច្ច ដើម្បីបីបាច់ថែរក្សា ក្នុង​រយៈ​ពេល​រងចាំ ការ​សម្រេច​របស់តុលាការ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...