ហោ ណាំហុង ជា«មេគុកបឹងត្របែក»?
- ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញថ្ងៃទី២១ វិច្ឆិកា ២០១៥
- កែប្រែចុងក្រោយ: November 21, 2015
- ប្រធានបទ: ស្រាវជ្រាវ
- អត្ថបទ: មានបញ្ហា?
- មតិ-យោបល់
-
តាមពិតទៅ ករណីលោក ហោ ណាំហុង មានជាប់ទាក់ទង នឹងគុកបឹងត្របែក ក្នុងរបបខ្មែរក្រហម បានកប់ទៅវិញបាត់ តាំងពីប៉ុន្មានឆ្នាំមុននេះ ទៅវិញហើយ។ ប៉ុន្តែលោក ហោ ណាំហុង ខ្លួនលោក តាមរយៈលោកមេធាវី ការ សាវុត្ថ របស់លោកទេ ដែលបានគាស់រឿងនេះមកវិញ ដោយស្នើរទៅតុលាការសាលាដំបូង ឲ្យអនុវត្តសាលក្រមចូលជាស្ថាពរ របស់សាលាឧទ្ទរណ៍ កាលពីឆ្នាំ២០១៣ នោះគឺសុំឲ្យចេញ ដីកាឲ្យចាប់ខ្លួនលោក សម រង្ស៊ី ដែលជាមេបក្សប្រឆាំងធំជាងគេនៅកម្ពុជា។ ការចេញដីកាឲ្យចាប់ខ្លួន លោក សម រង្ស៊ី នេះ មិនបានធ្វើឲ្យលោក ហោ ណាំហុង ឬគណបក្សប្រជាជនកម្ពុជា ចំណេញប៉ុន្មានឡើយ បើទោះជាក្រុមប្រឆាំង និងអ្នកឃ្លាំមើលឯករាជ្យ មើលឃើញបែបផ្សេងថា មានរូបភាពបែបនយោបាយ ជាជាងការអនុវត្តច្បាប់ក៏ដោយ។
ហេតុអ្វី? ព្រោះលោក សម រង្ស៊ី ដែលបានឈ្នះក្ដី នៅតុលាការកំពូល របស់ប្រទេសបារាំង ទល់នឹងការប្ដឹងពីបទបរិហាកេរ្តិ៍ របស់លោក ហោ ណាំហុង ករណី«មេគុកបឹងត្របែក» បានបន្តធ្វើការវាយលុក មិនសំចៃមាត់ ទៅលើប្រមុខការទូតកម្ពុជា ដែលមានប្រវត្តិយ៉ាងស្រពិចស្រពិល នៅក្នុងរបបខ្មែរក្រហម ជាពិសេសនៅពេលដែលលោក បានវិលត្រឡប់ ចូលមកកម្ពុជាវិញ នៅក្រោយការកាន់អំណាច របស់ក្រុមខ្មែរក្រហមនាឆ្នាំ១៩៧៥។
ក្នុងទំព័រហ្វេសប៊ុករបស់លោក សម រង្ស៊ី កាលពីថ្ងៃទី២០ ខែវិច្ឆិកា ឆ្នាំ២០១៥ ម្សិលម៉ិញនេះ ប្រធានគណបក្សប្រឆាំង បានសរសេរយ៉ាងច្បាស់ជាថ្មី ថាលោក ហោ ណាំហុង ហៅ មិត្តយ៉ែម ជាមេគុកបឹងត្របែក។ លោក សម រង្ស៊ី បានប្រាប់លោក ហោ ណាំហុង ឲ្យធ្វើការសុំទោស ទៅដល់ដួងវិញ្ញាណក្ខន្ធនៃជនរងគ្រោះ ដែលបានស្លាប់ ព្រោះការមួលបង្កាច់ទាំងឡាយ ដើម្បីឲ្យលោក ណាំហុង អាចរស់រួចខ្លួនតែម្នាក់ឯង។
ឯកសារសម្ងាត់...
លោក សម រង្ស៊ី បានស្រង់ការអះអាង ពីឯកសារផ្ទៃក្នុងមួយ របស់ស្ថានទូតអាមេរិក ប្រចាំកម្ពុជា មកសរសេរបន្ថែមថា៖ «ហោ ណាំហុង បានវិលត្រឡប់មកប្រទេសកម្ពុជាវិញ បន្ទាប់ពីពួកខ្មែរក្រហម ឡើងកាន់អំណាច តែគាត់បានរួចពីការស្លាប់ ពីព្រោះគាត់ធ្លាប់បានរៀនសូត្រ ជាមួយ អៀង សារី។ គាត់បានក្លាយទៅជាមេជំរំ (គុក) បឹងត្របែក ហើយគាត់ព្រមទាំងភរិយាគាត់ បានសហការជាមួយពួកខ្មែរក្រហម ក្នុងការសម្លាប់មនុស្សជាច្រើន ដែលជាប់ឃុំឃាំងនៅទីនោះ។»
គេមិនដឹងថា តើឯកសារផ្ទៃក្នុងនោះ ត្រូវបានលោក សម រង្ស៊ី ទទួលមកដាក់ក្នុងដៃពិតមែន និងតាមរបៀបណានោះឡើយ។ ប៉ុន្តែឯកសារមួយ ដែលទស្សនាវដ្ដីមនោរម្យ.អាំងហ្វូ ស្រាវជ្រាវបានពីគេហទំព័រ វីគីលីគ (WikiLeaks) ដែលល្បីល្បាញខាងការទម្លាយជាសាធារណៈ នូវឯកសារសម្ងាត់ ឬឯកសារការទូត របស់ប្រទេសធំៗក្នុងពិភពលោកនោះ ក៏បានបញ្ជាក់ឲ្យដឹង ដូចការលើកឡើង របស់លោក សម រង្ស៊ី ខាងលើនេះដែរ។ ឯកសារនោះ មានលក្ខណៈជាទូរសារ ដែលត្រូវបានផ្ញើរចេញ ពីស្ថានទូតអាមេរិក ប្រចាំនៅកម្ពុជា (From: Cambodia Phnom Penh) ទៅកាន់រដ្ឋមន្ត្រីការបរទេសអាមេរិក (To: Secretary of State) ក្នុងអំឡុងខែមិថុនា ឆ្នាំ២០០២។ ទស្សនាវដ្ដីសូមអញ្ជើញប្រិយមិត្តអ្នកអាន ចុះទៅអានទូរសារនោះ នៅខាងក្រោមអត្ថបទនេះ ដែលស្ថិតក្នុងសភាពច្បាប់ដើម និងសរសេរជាភាសាអង់គ្លេស។
ឯកសារសារភាព...
ឯកសារមួយទៀត ដែលទស្សនាវដ្ដីទទួលបានដែរនោះ ជាសំបុត្រសារភាពកំហុស ចុះថ្ងៃទី១៧ ខែកុម្ភៈ ឆ្នាំ១៩៧៨ របស់លោក វ៉ាន់ ពីនី គណៈមន្ទីរកែប្រែ ក.១៧ ផែនរណសិរ្យ នៅចំពោះ«អង្គការ (របបខ្មែរក្រហម)» ដែលបានអះអាងក្នុងឃ្លាមួយ ត្រង់ចំណុចលេខរៀងទី៩៤ យ៉ាងដូច្នេះថា៖ «ហោ ណាំហុង សមាជិកគណកម្មាធិការមន្ទីរ ក.១៧ បឹងត្របែក»។ លោក វ៉ាន់ ពីនី នេះ ជាអតីតប្រធានមន្ទីរកែប្រែ «ក.១៧» ឬបឹងត្របែក របស់របបខ្មែរក្រហម ហើយត្រូវបានចាប់ខ្លួន ដោយរបបនេះដដែល នៅថ្ងៃទី២០ ខែវិច្ឆិកា ឆ្នាំ១៩៧៧ មុននឹងលោក ត្រូវបានបញ្ជូនទៅឃុំខ្លួន នៅមន្ទីរកែប្រែ «ស.២១» ឬទួលស្លែង ហើយត្រូវបានសម្លាប់ នៅក្រោយការសារភាពនោះ។ យ៉ាងណាក៏ដោយ ក៏ឯកសារសារភាព របស់លោក វ៉ាន់ ពីនី មិនអាចត្រូវបានបញ្ជាក់ច្បាស់លាស់ ពីប្រភព និងពីច្បាប់ដើមរបស់វា ថាស្ថិតក្នុងទម្រង់បែបនេះ ឬបែបណាឡើយ។
ការលាបពណ៌...
នៅចំពោះព្យុះសង្ឃរា ដែលត្រឡប់មកបោកបក់លើរូបលោក ខណៈវាបានស្ងប់ទៅវិញ អស់មួយរយៈពេលទៅហើយនោះ លោក ហោ ណាំហុង បានសម្តែងការឈឺចាប់ នៅលើទំព័រហ្វេសប៊ុករបស់លោក នៅថ្ងៃទី២១ ខែវិច្ឆិកានេះ ចំពោះពាក្យសម្ដី ដែលលោកហៅថា ជាការ«លាបពណ៌»របស់លោក សម រង្ស៊ី មកលើរូបលោក និងគ្រួសារ។ លោកបានរំឭកថា សាច់ញាតិរបស់លោកជិត ៣០នាក់ ត្រូវបានសម្លាប់ជាបន្តបន្ទាប់ នៅក្នុងគុកបឹងត្របែក នាសម័យខ្មែរក្រហម។ បន្ថែមពីលើនេះ រដ្ឋមន្ត្រីការបរទេសកម្ពុជា បានធ្វើការអំពាវនាវ ឱ្យអាជ្ញាធរមានសមត្ថកិច្ច អនុវត្តសាលដីកា តាមចាប់ខ្លួនមេដឹកនាំគណបក្សប្រឆាំង លោក សម រង្ស៊ី ដែលកំពុងគេចខ្លួននៅក្រៅប្រទេស។
សូមរំលឹកជូនដែរថា បន្ទាប់ពីការទម្លាយ ឯកសាសម្ងាត់របស់ស្ថានទូតអាមេរិក ដោយ វីគីលីគ កាលពីថ្ងៃទី ១១ ខែកក្កដា ឆ្នាំ២០១១នោះហើយ លោក ហោ ណាំហុង ខ្លួនលោកបានកោះហៅ លោក «Jeff Daigle» អនុប្រធានបេសកកម្ម និងជាភារធារី នៃស្ថានទូតអាមេរិក ប្រចាំក្នុងរាជធានីភ្នំពេញ ដើម្បីសំដែងការតវ៉ាជំទាស់នឹងរបាយការណ៍នោះ ហើយទាមទារឲ្យមានការកែតម្រូវ។ នេះបើតាមសេចក្ដីថ្លែងការណ៍ របស់ក្រសួងការបរទេសកម្ពុជា កាលពីថ្ងៃទី១៤ ខែកក្កដា ឆ្នាំ២០១១ កន្លងមក។
ដោយឡែក លោក នី ចរិយា មន្រ្តីស៊ើបអង្កេតនៃសមាគមការពារសិទ្ធិមនុស្សអាដហុក ធ្លាប់បានផ្តល់កិច្ចសម្ភាស ជាមួយទស្សនាវដ្តីថា លោក សម រង្ស៊ី បានឈ្នះក្តីជាមួយលោក ហោ ណាំហុង ក្នុងរឿងដដែលនេះ នៅតុលាការកំពូលនៃប្រទេសបារាំង ហើយលោក ហោ ណាំហុង ក៏បានទទួលយកយុត្តាធិការ នៃការសម្រេចសេចក្តីរបស់តុលាការបារាំងនោះដែរ។ បើដូច្នេះ វាដូចជាចម្លែកបន្តិច ដែលលោក ហោ ណាំហុង មកសម្ដែងការឈឺចាប់នៅពេលនេះ ពីក្នុងសំនុំរឿងដដែល និងដែលត្រូវបានទុកចោល រហូតអស់អាជ្ញាយុកាល នៃបណ្តឹងនៅសាលាឧទ្ធរណ៍ ទៅហើយនោះ។ ប៉ុន្តែប្រវត្តិសាស្ត្រ នៅតែមានការកត់ត្រាជាប់រហូត។ បើទោះជាពេលនេះ គេអាចបង្ខំ ឲ្យផ្លាស់ប្ដូរប្រវត្តិសាស្ត្រ ឬយ៉ាងណាក្ដី តែគេមិនអាចមើលឃើញពីអ្វី ដែលនឹងកើតឡើង នៅក្នុងពេលអនាគតនោះឡើយ៕
» ឯកសារ វីគីលីគ និយាយពីរទូរសារសម្ងាត់ របស់ស្ថានទូតអាមេរិកនៅកម្ពុជា ផ្ញើរទៅរដ្ឋមន្ត្រីការបរទេសអាមេរិក៖
» ឯកសារសារភាពកំហុស របស់លោក វ៉ាន់ ពីនី (នឹងត្រូវត្រួតពិនិត្យឡើងវិញ ដើម្បីបញ្ជាក់ពីច្បាប់ដើមរបស់វា)៖
