ម៉ារ៉ាដូណា៖ មេ​សហព័ន្ធ​បាល់​ទាត់​អន្តរជាតិ​ទាំង​ពីរ គឺ​ជា​«ចោរ»

អតីតកំពូលកីឡាករបាល់ទាត់ របស់ប្រទេសអាហ្សង់ទីន លោក ឌីយ៉េហ្គោ ម៉ារ៉ាដូណា បានបង្ក​ឲ្យ​មាន​សង្គ្រាម​ពាក្យ​សម្ដី​ឡើង ដោយ​លោក​បាន​ពាក់​អាវ មានអក្សរសរសេរថា «ចោរទាំងពីរ» ភ្ជាប់ជាមួយរូបថត របស់ដៃគូសត្រូវ​របស់​លោក ដែល​សុទ្ធ​សឹង​ជា​មេ​ដឹកនាំ សហព័ន្ធ​បាល់ទាត់​អន្តរជាតិ​ល្បីៗ ក្នុង​ពិភព​លោក៖ នោះគឺ​លោក មីឆែល ប្លាទីនី (Michel Platini) ប្រធានសហព័ន្ធបាល់ទាត់អ៊ឺរ៉ុប និង​លោក ស៊េប ប្លាស្ទ័រ (Sepp Blatter) អតីតប្រធាន​សហព័ន្ធ​បាល់ទាត់​​អន្តរជាតិ។
Loading...
  • ដោយ: ជ័យវិបុល អត្ថបទ ៖ ជ័យវិបុល ([email protected]) - ប៉ារីស ថ្ងៃទី១៥ មករា ២០១៦
  • កែប្រែចុងក្រោយ: January 24, 2016
  • ប្រធានបទ: បាល់ទាត់
  • អត្ថបទ: មានបញ្ហា?
  • មតិ-យោបល់

មិនមែនជារឿងថ្មីនោះទេ។ អតីតកំពូលកីឡាករ ឌីយ៉េហ្គោ ម៉ារ៉ាដូណា (Diego Maradona) មិនមែន​ជា​អ្នក​និយម​ មេដឹកនាំពិភពបាល់ទាត់ទាំងពីររូប របស់សហព័ន្ធបាល់ទាត់អ៊ឺរ៉ុប (UEFA) និងរបស់សហព័ន្ធ​បាល់​ទាត់​អន្តរជាតិ (Fifa) នោះឡើយ។ កាលពីថ្ងៃអង្គារកន្លងមកនេះ អតីតតារាល្បីខាងបាល់ទាត់ នា​ទសវត្សន៍​ឆ្នាំ​៨០ បានថតរូបដាក់បង្ហោះមួយសន្លឹក ដោយបានឈរពាក់អាវ មានរូបកាត់តបញ្ចូលគ្នា រវាងប្រធាន​សហព័ន្ធ​បាល់​ទាត់​អ៊ឺរ៉ុប លោក មីឆែល ប្លាទីនី (Michel Platini) និងអតីតប្រធានសហព័ន្ធ​បាល់ទាត់អន្តរជាតិ លោក ស៊ែប ប្លាស្ទ័រ (Joseph Blatter)។

«២៥ឆ្នាំហើយ ដែលខ្ញុំនិយាយ»

បញ្ហាវាទាស់នៅត្រង់ថា ពីលើរូបថតកាត់តនោះ (រូបថតលោក ម៉ារ៉ាដូណា នៅកណ្ដាលខាងលើ) មាន​អក្សរ​សរសេរ​ថា «ចោរទាំងពីរ (Two thieves)»។ រូបថតនេះ ត្រូវបានថតដាក់ផ្សាយ នៅលើទំព័រ​អ៊ីនស្តាហ្គ្រាម ដោយ​លោក «Daniel Arcucci» អ្នក​សារព័ត៌មាន​ជាតិអាហ្សង់ទីន​មួយរូប ដែលបានជួបលោក ម៉ារ៉ាដូណា ដោយ​ផ្ទាល់នៅក្រុង ឌុយបៃ (ប្រទេស​អេមៀរ៉ាអារ៉ាប់)។ នៅអមនឹងរូបថតនេះ អតីតកំពូល​កីឡាករ ត្រូវ​បាន​អ្នក​សារព័ត៌មាន ស្រង់សម្ដីយក​មក​សរសេរថា៖ «២៥ឆ្នាំហើយ ដែល​ខ្ញុំនិយាយ​ពី​រឿង​នេះ»។

មិនខុសទេ! លោក ម៉ារ៉ាដូណា បានធ្វើសង្គ្រាមពាក្យសំដី ជាច្រើនលើកច្រើនគ្រាមកហើយ ប្រឆាំងនឹង​ប្រធាន​សហព័ន្ធបាល់ទាត់អ៊ឺរ៉ុប លោក មីឆែល ប្លាទីនី  ដែលធ្លាប់ជាអតីតគូប្រកួត នៅក្នុងការប្រកួត​បាល់​ទាត់​នានា កាលពីទសវត្សន៍ឆ្នាំ៨០។ ហើយលោកក៏មិនដែលត្រូវគ្នា ជាមួយនឹងអតីតប្រធាន​សហព័ន្ធ​បាល់ទាត់​អន្តរជាតិ លោក ស៊េប ប្លាស្ទ័រ នោះដែរ ជាពិសេសលោក ម៉ារ៉ាដូណា បានឆ្លៀតឱកាសវាយសន្ធាប់ កាន់តែ​ខ្លាំង​ឡើង បន្ទាប់​ពីរឿងអាស្រូវពុករលួយ នៅក្នុងសហព័ន្ធ​បាល់ទាត់ពិភពលោកមួយនេះ ត្រូវបានបើក​កកាយ ដោយ​ប្រព័ន្ធ​យុត្តិធម៌​អាមេរិក និងស្វីស កាលពីឆ្នាំទៅម៉ិញ។

«ធ្វើឲ្យបាល់ទាត់ មានរឿងអាក្រក់ៗជាច្រើន»

ដូចយ៉ាង កាលពីខែកញ្ញាឆ្នាំកន្លងទៅ លោក ម៉ារ៉ាដូណា បានចោទដោយចំៗ ទៅកាន់លោក ប្លាស្ទ័រ ថា​បាន​បង្រៀនពី​«របៀបលួច» ទៅឲ្យលោក ប្លាទីនី។ លោកបានថ្លែងឡើងថា៖ «តែខ្ញុំមិនមែនជាចោរលួចទេ។ ប្លាស្ទ័រ បានធ្វើឲ្យបាល់ទាត់ មានរឿងអាក្រក់ជាច្រើន។ ហើយជាមួយនឹង ប្លាទីនី ពួកគេបានបង្កើត​ឆាក​ល្ខោន​មួយ។ ពួកគេធ្វើឬក ដូចជាមិនទាក់ទងគ្នាទេ, ម្នាក់នៅហ្វីហ្វា (Fifa) ម្នាក់ទៀត នៅយូអ៊ីហ្វា (UEFA)។ តែ​តាម​ពិត ពួកគេនៅជាមួយគ្នាតាំងពីដើមមក។»

បុរសមានអំណាច ក្នុងពិភពបាល់ទាត់ទាំងពីររូប (លោក ប្លាទីនី និងលោក ប្លាស្ទ័រ) ត្រូវបាន​គណៈកម្មាធិការ​ប្រតិបត្តិ របស់សហព័ន្ធបាល់ទាត់អន្តរជាតិ ហាមឃាត់ក្នុងរយៈពេលច្រើនឆ្នាំ មិនឲ្យប៉ះ​បាល់ ឬធ្វើការងារ​ទាក់​ទង​នឹងកីឡាបាល់ទាត់ ដោយសារអ្នកទាំងពីរ ត្រូវបានរកឃើញ ថាមានជាប់ពាក់ព័ន្ធ នឹងការ«លួច»​បង្វិល​ប្រាក់ ១,៨លានអ៊ឺរ៉ូ ពីសំណាក់​លោក ប្លាស្ទ័រ ទៅឲ្យលោក ប្លាទីនី កាលពីឆ្នាំ២០១១កន្លងមក ដើម្បី​ជា​ថ្នូរ​នឹង​ការងារ ទីប្រឹក្សា​«សម្ងាត់»មួយ ​ដែល​បាន​បញ្ចប់​ទៅ ក្នុងឆ្នាំ២០០២៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...