នៅចំពោះមុខសភាដេញដោល នៃសវនាការសាលាឧទ្ធណ៍ សាក្សីចំនួនបីទៅបួននាក់ ក្នុងចំណោមសាក្សីជាងម្ភៃនាក់ ដែលសុទ្ធសឹងជាសមត្ថកិច្ច ឈរជើងការពារសន្តិសុខបាតុកម្ម របស់កម្មករនៅរោងចក្រកៅវ៉េ បានឆ្លើយថា «ពួកគាត់បាន​ឃើញលោក ឈូក បណ្ឌិត អតីតអភិបាលក្រុងបាវិត ជាអ្នកបាញ់ដោយតម្រង់កាំភ្លើងទៅរកហ្វូងកម្មករ ដែលជាហេតុធ្វើ​ឲ្យកម្មការីបីនាក់រងរបួស»។ សាលដីកាសាលាឧទ្ធរណ៍ ក្នុងសំនុំរឿងនេះ នឹងធ្វើការប្រកាស នៅម៉ោងពីររសៀលថ្ងៃទី៤ ខែមីនាខាងមុខ ។

កម្មការី ជាជនរងគ្រោះទាំងបីនាក់។

ក្នុងបន្ទប់សវនាការទីមួយ ដោយបិទទ្វាកញ្ចក់ អ្នកតាមដានបានសង្កេតមើលពីខាងក្រៅឃើញថា ការសួរដេញដោល លើ​សាក្សីទាំងឡាយ មានដំណើរការលឿនគួរអោយចាប់អារម្មណ៍។ គេក៏មើលឃើញដែរ ក្នុងថ្ងៃសវនាការទីពីរនេះ លោក ឈូក បណ្ឌិត មានសម្លៀកបំពាក់ ជាមន្ត្រីរាជការ កំពុងអង្គុយស្តាប់ក្នុងរង្វង់ក្រចកសេះ យ៉ាងយកចិត្តទុកដាក់ និងប្រកប​ដោយទឹកមុខ«គ្មានកង្វល់»អ្វីសោះ។

ក្នុងចំណោមសាក្សីជាច្រើននាក់ សាក្សីម្នាក់ដែលលេចធ្លោជាងគេ គឺលោក ស ចន្ថា នាយផ្នែកព្រហ្មទណ្ឌនគរបាល​ក្រុង​បាវិត ដែលបានរងនូវការចោទប្រកាន់ ពីសាលាដំបូងខេត្តស្វាយរៀង ពីបទបង្ករបួសស្នាម ដោយអចេតនា ហើយត្រូវបាន​តុលាការ ដាក់ឲ្យស្ថិតនៅក្រោមការឃ្លាំមើលនោះ។ លោកត្រូវបានសាលឧទ្ទរណ៍កោះហៅ អោយចូលមក«ធ្វើជាសាក្សី» ក្នុងសំនុំរឿងដ៏រំជើបរំជួលមួយនេះ។

ដោយឡែកលោក ឡុង ភន នាយរងប៉ុស្តិ៍នគរបាលសង្កាត់ប្រាសាទ ជាសាក្សីម្នាក់ដែលមានការសួរឆ្លើយច្រើន ជាពិសេស​ជាមួយលោក ឈូក បណ្ឌិត ដោយនាយរងនោះឆ្លើយថា «បានឃើញអតីតក្រុងបាវិត ជាអ្នកបាញ់ បណ្តាលឲ្យកម្មការី​រង​របួស»។

ឡុង ភន និយាយពិត?

កម្មការី នុត សាខន ជាជនរងគ្រោះម្នាក់ ក្នុងចំណោមបីនាក់ បានបញ្ជាក់ថា ការឆ្លើយរបស់សាក្សីទាំងអស់ក្នុងសវនាការ មានសាក្សីពីរនាក់បានឃើញ លោក ឈូក បណ្ឌិត បាញ់ ក្រៅពីនោះគ្រាន់តែបញ្ជាក់ថា លោក ឈូក បណ្ឌិត មានកាំភ្លើង​ពិតមែន។ សាក្សីម្នាក់ ពីក្នុងចំណោមនោះ គឺលោក ឡុង ភន នេះឯង។ កម្មការីរូបនេះ បានដកស្រង់សម្ដីរបស់លោក ឡុង ភន មកនិយាយថា គាត់បានឃើញបាញ់ ព្រោះគាត់នៅចម្ងាយប្រាំពីរម៉ែត្រ ពីលោកឈូក បណ្ឌិត។ លោក ឈូក បណ្ឌិត ឆ្លើយទៅលោក ឡុង ភន វិញថា គាត់(ឈូក បណ្ឌិត) «បាញ់ឡើងលើ» តែលោកភន បញ្ជាក់ច្បាស់បន្ថែមទៀតថា គាត់​(ឈូក បណ្ឌិត) «បាញ់សំដៅកម្មករតែម្តង»។

ឯ កែវ នា កម្មការីរងគ្រោះទីពីរ បានតំណាលពីសវនាការនៅពេលនោះដែរថា លោក ឈូក បណ្ឌិត បានប្រកែក ជាមួយ​លោក ឡុង ភន ដោយសួរថា «ម៉េចក៏ឃើញគាត់ បាញ់ច្បាស់ម្លេះ បើមើលតែពីក្រោយ?»

លោក ភន និយាយទៅកាន់លោកឈូក បណ្ឌិត ថា គាត់ឃើញផ្ទាល់ភ្នែក ក្មេងស្រីម្នាក់ដូល ហើយលោក (ឈូក បណ្ឌិត) កាន់កាំភ្លើងនៅនឹងដៃ។ ជាការដកស្រង់សម្ដី មកបញ្ជាក់បន្ថែម របស់កម្មការិនី ប៊ុត ចិន្តា ដែលមានសសៃខ្ចី​ទើបតែបាន​មួយខែ និងជាជនរងគ្រោះទីបី។

មេធាវីការពារឲ្យកម្មការីទាំងបី លោក ជិន លីដា បានឆ្លើយឆ្លងតាមទូរស័ព្ទ ជាមួយអ្នកសារព័ត៌មានមនោរម្យព័ងអាំងហ្វូ​ ថា សាក្សីដែលបានឆ្លើយក្នុងសវនាការ បានបញ្ជាក់ដូចគ្នានេះ ពីលោក ឈូក បណ្ឌិត ដែលឈរកាន់អាវុធតម្រង់ទៅមុខ ហើយមានកម្មករ ដែលនៅខាងមុខគាត់ «របូសដួល»។ លោកមេធាវី ស្នើសុំឲ្យលាសាឧទ្ធណ៍ពិនិត្យ ពិចារណាលើអង្គហេតុ អង្គច្បាប់ ភស្តុតាង ដែលមានក្នុងសំណុំរឿង និងចម្លើយរបស់សាក្សី ដោយផ្តល់នូវយុត្តិធម៌ ជូនជនរងគ្រោះស្លូតត្រង់។

ដោយឡែកអ្នកស្រី ម៉ៅ សំវុទ្ធារី មេធាវីការពារលោក ឈូក បណ្ឌិត មិនទទួលទូរស័ព្ទទេ នៅពេលមនោរម្យព័ងអាំងហ្វូ​ព្យាយាម សុំការបង្ហាញ ពីសំណុំរឿងក្តីបាញ់ប្រហារនៅក្រុងបាវិតនេះ។ ប៉ុន្តែតាមការបញ្ជាក់ របស់ជនរងគ្រោះថា នៅក្នុង​ពេលសវនាការ មេធាវីរបស់លោក ឈូក បណ្ឌិត មិនទទួលស្គាល់ លើចម្លើយរបស់សាក្សី ដែលបានឃើញ«ការបាញ់»​នោះទេ ហើយស្នើរសុំឲ្យសាលាឧទ្ធណ៍ តម្កល់ដីកាសម្រេច របស់តុលាការខេត្តស្វាយរៀងនៅដដែល។

លោក ឈិត សំអាត មន្រ្តីបច្ចេកទេស អង្គការលីការដូ ជាអ្នកតាមដាននូវសវនាការនេះ បានសម្តែងនូវការព្រួយបារម្មណ៍ ជំនួសសាក្សី ដែលហ៊ាន«ឆ្លើយនូវការពិត» ព្រោះជាទម្លាប់នៅកម្ពុជា អ្នកដែលឆ្លើយការពិត តែងតែបារម្មណ៍ពីសុវត្ថិភាព។ ជាមួយគ្នានេះដែរ ប្រធានផ្នែកសិទ្ធិការងារ នៃមជ្ឃមណ្ឌលអប់រំច្បាប់សម្រាប់សហគម លោក មឿង តុលា បានបន្ថែមថា លោកមានសាក្សីបីបួននាក់ សម្រាប់ជួយជនរងគ្រោះ តែដោយជនសង្ស័យមានអំណាច មានគ្នីគ្នាច្រើន និងមិនត្រូវបាន​តុលាការឃុំខ្លួនទៀតនោះ ធ្វើឲ្យសាក្សី«មិនហ៊ានចេញមុខ» និងធ្វើឲ្យជនរងគ្រោះគ្មានសាក្សី។ ការតតាំងក្តីនេះ មិនថាតែ​សាក្សីទេ សូម្បីជនរងគ្រោះ ក៏មានការភ័យខ្លាច ពីសុវត្តិភាពនេះដែរ។

ទោះបីជាយ៉ាងណាក៏ដោយ កម្មការីទាំងបីនាក់ បានប្រាប់មនោរម្យព័ងអាំងហ្វូថា «ពួកខ្ញុំសប្បាយចិត្តណាស់ ដោយសាក្សី​ទាំងនោះ ហ៊ាននិយាយកាពិត។ នេះជាចម្លើយពិត របស់មន្ត្រីប៉ូលីសស្មោះត្រង់។ ចម្លើយនេះអាចធ្វើឲ្យតុលាការជឿជាក់ និងផ្តល់នូវយុត្តិធម៌ពិត។ ទោះជាយ៉ាងណា ក៏ពួកខ្ញុំជឿជាក់ជាង តុលាការស្វាយរៀងដែរ៕»

--------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០១ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ