តាមការសិក្សានាពេលថ្មីៗនេះ បានបង្ហាញថា ឥរិយាបថមិនល្អ៤យ៉ាង៖ ការជក់បារី ទទួលទានសារធាតុស្រវឹង មិន​បាន​ហាត់ប្រាណ និងការញ៉ាំបន្លែផ្លែឈឺមិនគ្រប់គ្រាន់ អាចធ្វើឲ្យអ្នកឆាប់ស្លាប់ និងអាចកាត់បន្ថយ អាយុអ្នកដល់​ទៅ​១២ឆ្នាំ។ ដូច្នេះ អ្នកគ្រាន់តែធ្វើការផ្លាស់ប្តូរ ក្នុងការរស់នៅរបស់អ្នកបន្តិចបន្តួចប៉ុណ្ណោះ នោះវានឹងអាចជួយអ្នក ឲ្យរស់នៅបានយូរ​អង្វែង។

អ្នកអាចធ្វើអ្វីៗ ដើម្បីជៀសវាងរឿងទាំងនេះ និងកែលំអរ ឥរិយាបថមិនល្អរបស់អ្នកបាន។ អនុវត្តន៏តាមទម្លាប់ទាំង៩នេះ ដើម្បីឲ្យរាង្គកាយរបស់អ្នកស្អាត អ្នកមានអារម្មណ៏ថាក្មេង និងជួយអ្នកឲ្យរស់នៅបានយូរ។

១. កុំទទួលទានលើសកំរិត៖
បើអ្នកចង់រស់នៅបាន ១០០ឆ្នាំ អ្នកគួរតែកាត់បន្ថយអាហារនៅលើចានរបស់អ្នកខ្លះៗ ជារឿងល្អ។ តាមការសិក្សាបង្ហាញថា មនុស្សដែលមានវ័យចំណាស់នៅប្រទេសជប៉ុន ឈប់ទទួលទាននៅពេលដែលពួកគេបរិភោគបាន ៨០%។

២. ការរួមភេទ៖
ការរួមភេទបានស្កប់ស្កល់ ២ទៅ ៣ដងក្នុងមួយសប្តាហ៏ អាចបង្កើនអាយុដល់ទៅ ៣ឆ្នាំបន្ថែមទៀត។ វាធ្វើឲ្យអ្នករំភើប និង​បង្កើតនូវជាតិកាឡូរី។ ការរួមភេទបានទៀងទាត់ អាចជួយឲ្យសម្ពាធឈាមរបស់អ្នកមានកំរិតទាប ជួយឲ្យអ្នកគេងបាន​ស្កប់ស្កល់ ជួយឲ្យអ្នកស៊ាំនឹងរោគ និងការពារជំងឺបេះដូង។

៣. បិទទូរទស្សន៏៖
ការចំណាយពេលច្រើននៅមុខកញ្ចក់ទូរទស្សន៏ មានផលប៉ះពាល់យ៉ាងធ្ងន់ធ្ងរដល់សុខភាពរបស់អ្នក។ តាមការសិក្សា​នៅឆ្នាំ ២០១០ បានបង្ហាញថា មនុស្សដែលមើលទូរទស្សន៏លើសពី ៤ម៉ោង ក្នុងពេលមួយថ្ងៃ មាន៤៦% ស្លាប់ដោយសារ​មូលហេតុផ្សេងៗ ជាងអ្នកដែលមើលតិចជាង ២ម៉ោងក្នុងមួយថ្ងៃ។

៤. ជៀសវាងកម្តៅព្រះអាទិត្យ៖
ការជៀសវាងពីបន្លឺព្រះអាទិត្យបានច្រើន វាជួយឲ្យអ្នកកាត់បន្ថយនូវជំងឺមហារីកស្បែក និងធ្វើឲ្យអ្នកមើលទៅក្មេង ដោយ​សារគ្មានស្នាមជ្រួញ ហើយមានស្បែកស្រស់ស្អាតបែបធម្មជាតិ។កុំបិទបាំងតែផ្ទៃមុខរបស់អ្នក ពេលត្រូវកម្តៅព្រះអាទិត្យ ព្រោះវានៅតែធ្វើឲ្យដើមទ្រូង និងករបស់អ្នកមើលទៅចាស់ដដែល។

៥. ត្រូវមានទំនាក់ទំនងល្អជាមួយអ្នកដទៃ៖
តាមការស្រាវជ្រាវបង្ហាញថា អ្នកដែលមានជំងឺបេះដូង គឺដោយសារតែមិនមានទំនាក់ទំនង ជិតស្និទ្ធជាមួយមិត្តភក្តិ និង​គ្រួសារ។ ភាពឯកាគឺជាមូលហេតុចំបង ហើយភាគច្រើនគឺ កើតមានឡើងទៅលើមនុស្សចាស់ ដែលពួកគាត់តែងតែ​មាន​អារម្មណ៏អស់សង្ឃឹម។

៦. ទទួលទានស្រាកំរិតល្មម៖
ស្រ្តីដែលទទួលទានស្រា ២ ឬច្រើនកែវ និងបុរសដែលទទួលទានស្រា ៣ ឬច្រើនកែវក្នុងមួយថ្ងៃ អាចនឹងមានឥទ្ធិពល​អាក្រក់ដល់បញ្ហាទំនាក់ទំនងរបស់ពួកគេ។ ប៉ុន្តែបើអ្នកទទួលទាន តិចជាងនេះ នោះវាមានភាពប្រសើរសំរាប់អ្នក។ តាម​ការ​សិក្សានៅឆ្នាំ ២០១០ បានឲ្យដឹងថា ស្រ្តីទទួលទានស្រាមួយកែវ ហើយបុរសទទួលទាន ២កែវ ក្នុងមួយថ្ងៃ វាពិតជាមាន​ផល​ប្រយោជន៏ដល់បេះដូងរបស់អ្នក។

៧. ទទួលទានបន្លែ និងផ្លែឈើ៖
ការបរិភោគបន្លែ ឬផ្លែឈើស្រស់ៗ ជាប្រចាំថ្ងៃ វាជួយបង្កើននូវសុខភាពរបស់អ្នក។ អាហារទាំងនេះ វាអាចជួយកាត់​បន្ថយ​ជំងឺមហារីក និងជួយកាត់បន្ថយជំងឺបេះដូងដល់ទៅ ៧៦%។ ជាងនោះទៅទៀត វាជួយឲ្យអ្នកមានកម្លាំងខ្លាំង និងកាត់បន្ថយ​ស្នាមជ្រួញ។

៨. ការហាត់ប្រាណ៖
ការហាត់ប្រាណជាប្រចាំ អាចជារឿងដែលសំខាន់មួយ នៅក្នុងជីវិតរបស់អ្នក។ តាមការសិក្សានៅឆ្នាំ ២០០៨ បានឲ្យដឹងថា ការធ្វើលំហាត់ប្រាណបានទៀងទាត់ ដូចជាការរត់ វាអាចជួយ បង្កើនអាយុរបស់អ្នក ៤ឆ្នាំបន្ថែមទៀត។ វាពិតជាគ្មានការ​ភ្ញាក់ផ្អើលទេ ដោយសារតែវា ជួយ សំរួលដល់បេះដូង អារម្មណ៏ និងជួយសំរួលដល់អាហាររំលាយក្នុងរាង្គកាយរបស់អ្នក។

៩. កុំជក់បារី៖
ការមិនជក់បារី គឺជារឿងដ៏សំខាន់បំផុត ដែលអ្នកអាចធ្វើសំរាប់សុខភាព និងជីវិតរបស់អ្នក។ យោងតាមការសិក្សាពី​សុខភាពជាសាធារណះរបស់សហរដ្ឋអាមេរិក បានឲ្យដឹងថា ស្រ្តីដែលឈប់ជក់បារី នៅវ័យ ៣៥ឆ្នាំ គឺភាគច្រើនអាចរស់​បានត្រឹមតែ ៨ឆ្នាំទៀតប៉ុណ្ណោះក្នុងជីវិតរបស់ពួកគេ។ វាធ្វើឲ្យប៉ះពាល់ដល់សួត និងអាចបង្កឲ្យមានជំងឺមហារីក​សួត​ផង​ដែរ។ ដូច្នេះវាមិនយឺតពេលទេ បើសិនជាអ្នកជក់បារី គឺអ្នកអាចកែទម្លាប់របស់អ្នក ដោយព្យាយាមកាត់បន្ថយ ឬបញ្ឈប់​បានតែម្តងជាការល្អ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៦ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ