ប្រព័ន្ធយុត្តិធម៌របស់អាមេរិក បានបើកការស៊ើបអង្កេតទៅលើក្រុមហ៊ុនយក្សខាងព័ត៌មានវិទ្យា មីក្រូសូហ្វ៍ (Microsoft) និង​ដៃគូររបស់ក្រុមហ៊ុននេះ ដែលរងការចោទប្រកាន់ពីអំពើរពុករលួយ នៅក្នុងប្រទេសជាច្រើន។

រូបសញ្ញារបស់ក្រុមហ៊ុនមីក្រូសូហ្វ៍ នៅការិយាល័យកណ្ដាលក្នុងប្រទេសអាមេរិក។

កាសែតវល ស្ទ្រីត ជូកណល (Wall Street Journal) បានរាយការណ៍ថា អាជ្ញាធររបស់ប្រទេសអាមេរិក បានបើកការស៊ើប​អង្កេត ទៅលើក្រុមហ៊ុនមីក្រូសូហ្វ៍ និងដៃគូរមួយចំនួនទៀត របស់ក្រុមហ៊ុន ដែលទំនងជាបានប្រព្រឹត្តិអំពើពុករលួយ ចូល​ដៃជើង​ ជាមួយនឹងអ្នកទទួលខុសត្រូវ នៃរដ្ឋាភិបាលរបស់ប្រទេសចិន អ៊ីតាលី និងរ៉ូម៉ានី ដើម្បីទទួលបាននូវកិច្ចសន្យា ឬ​កិច្ចព្រមព្រៀងទាំងឡាយ។

នាយករងទទួលបន្ទុកបញ្ហាយុត្តិធម៌ប្រចាំក្រុមហ៊ុន មីក្រូសូហ្វ៍ លោក ចន ហ្វ្រេខ (John Frank) បានទទួលស្គាល់ នៅក្នុង​អត្ថបទមួយ ផ្សាយក្នុងគេហទំព័រផ្លូវការរបស់ក្រុមហ៊ុន។ លោកបាននិយាយថា «យើងចាត់ទុកយ៉ាងម៉ត់ចត់ នូវរាល់ការ​ចោទប្រកាន់ទាំងឡាយ ដែលបានទាក់ទាញ ការចាប់អារម្មណ៍របស់យើង។ យើងនឹងសហការ យ៉ាងពេញទំហឹងជាមួយ នឹងរាល់ការស៊ើបអង្កេតទាំងឡាយ របស់រដ្ឋាភិបាល។»

បើទោះជាលោកមិនបាននិយាយអោយច្បាស់ ពីការស៊ើបអង្កេតដែលបានកំពុងធ្វើនោះក៏ដោយ ក៏លោកបានបញ្ជាក់ថា «ចំណោទដែលបានលើកឡើងដោយ កាសែតវលស្ទ្រីត ជូកណល សុទ្ធតែសំខាន់។ ដូច្នេះ ឥឡូវនេះ វាជារឿងដែល​រដ្ឋាភិបាល និងមីក្រូសូហ្វ៍ ត្រូវពិនិត្យស្វែងរកភាពលំអិត។»

លុយសំណូក នៅចិន

កាសែតសេដ្ឋកិច្ចដដែលនេះ បានស្រង់ប្រភពដែលស្និតនឹងសំនុំរឿង មកនិយាយថា ការស៊ើបអង្កេតដែលដឹកនាំដោយ នគរបាលផ្នែកទីផ្សារហិរញ្ញវត្ថុអាមេរិក និងការិយាល័យយុត្តិធម៌ បានបើកដំណាក់កាល ដំបូងរបស់ខ្លួន។ ការស៊ើបអង្កេត​ដែលនឹងធ្វើបន្តទៅលើការចោទប្រកាន់ ពី«លុយសំណូក» ជាលក្ខណៈប្រព័ន្ធ រៀបចំដោយអតីតក្រុមហ៊ុនតំណាង របស់​មីក្រូសូហ្វ៍ នៅចិន។ អាជ្ញាធរអាមេរិក នៅមិនទាន់បានធ្វើការចោទប្រកាន់ ដោយចំមុខ ទៅលើក្រុមហ៊ុនមីក្រូសូហ្វ៍ ឬក៏ដៃ​គូររបស់ក្រុមហ៊ុននេះនៅឡើយទេ។

ដោយបញ្ចាក់ហើយបញ្ជាក់ទៀតថា មីក្រូសូហ្វ៍ មិនអាចធ្វើអត្ថាធិប្បាយបានទេ ទៅលើការស៊ើបអង្កេត ដែលកំពុង​ដំណើរ​ការនៅឡើយនេះ លោក ហ្វ្រេខ បានបន្ថែមត្រឹមតែយ៉ាងនេះ «នៅក្នុងក្រុមហ៊ុនដែលមានទំហំដូចយើងនេះ ការចោទ​ប្រកាន់របៀបនេះ តែងកើតមានម្ដងម្កាល»។

លោកទទួលស្គាល់ថា «នៅក្នុងសហគមមួយ ដែលមានមនុស្សដល់ទៅ ៩៨ពាន់នាក់ និង៦៤០ពាន់ដៃគូរ វាមិនអាច​និយាយថា វាមិនដែលជួបបញ្ហាធ្លោះធ្លោយនោះទេ»។ តែថា ក្រុមហ៊ុនយក្សខាងព័ត៌មានវិទ្យានេះ នឹងចាត់វិធានការ​គ្រប់​បែបយ៉ាង ដើម្បីព្រមាន និងដាក់ពិន័យ ទៅលើរាល់ដៃគូរល្មើសទាំងអស់ បើទោះក្នុងកម្រិតណាក៏ដោយ៕

----------------------------------------------------
ដោយ សេក មនោរកុមារ - ប៉ារីស​ ថ្ងៃទី២០ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ