លោកនាយករដ្ឋមន្ត្រីហ៊ុន សែនបានគូសបញ្ជាក់ថា បើទោះបីជាប្រទេស ដែលជាអតីតបងប្អូននិងគ្នា កំពុងធ្វើការវាយ​ប្រហារគ្នា ដោយពាក្យសម្តីក្តៅគគុក អំពីការតបទល់គ្នាទៅវិញទៅមក ដែលអាចឈានទៅរក ការកើតសង្គ្រាមក៏ដោយ ក៏កម្ពុជានៅរក្សារភាពស្ងាត់ស្ងៀម មិនទាន់មានផែនការជាក់លាក់ ក្នុងការជម្លៀសពលករកម្ពុជា ប្រមាណជាង២ ម៉ឺននាក់ ដែលកំពុងធ្វើការ នៅប្រទេសកូរ៉េខាងត្បូង ចេញពីប្រទេសនេះនៅឡើយទេ។

លោកហ៊ុន សែន ក្នុងពេលដំណើរទស្សនកិច្ចរបស់លោក បាន គី-មូន អគ្គលេខាធិការ អ.ស.ប នៅកម្ពុជា។ AP Photo/Heng Sinith

ថ្លែងនៅក្នុងពិធីបិទសន្និបាតជាតិវិស័យមីន នៅឯវិមានសន្តិភាព កាលរសៀលថ្ងៃអង្គារ លោកនាយករដ្ឋមន្ត្រី ហ៊ុន សែន បានមានប្រសាសន៍ថា លោកមិនជឿថា មានការផ្ទុះសង្គ្រាម រវាងកូរ៉េខាងជើង និងកូរ៉េខាងត្បូងឡើយ ពីព្រោះការគម្រាម​ដាក់គ្នាខ្លាំងៗបែបនះ មិនមែនទើបតែកើតឡើង ជាលើកទីមួយទេ។ លោកបានថ្លែងថា ៖ «ខ្ញុំមិនជឿថាគេហ៊ានវ៉ៃគ្នាទេ គាត់និយាយឮខ្លាំងៗកាលណា គឺអត់វ៉ៃទេ អាហ្នឹងជាបទពិសោធន៍ ខ្ញុំជឿថាគេមិនវ៉ៃគ្នាទេ»។

«សង្គ្រាមពាក្យសំដី ឬសង្គ្រាមស្លាបប៉ាកា»

ទោះយ៉ាងណាលោកនាយករដ្ឋមន្ត្រី ក៏មិនបណ្តោយឲ្យមន្ត្រីភ្លេចគិតគូរអំពី សុខទុក្ខរបស់ពលករកម្ពុជា ដែលកំពុងធ្វើការ​នៅកូរ៉េខាងត្បូងឡើយ គឺត្រូវតែតាមដានសភាពការណ៍ ជាប់ជាប្រចាំ។ លោកនាយករដ្ឋមន្ត្រីគូសបញ្ជាក់ថា «មិនចាំបាច់ តែក៏មិនត្រូវមើលស្រាលដែរ។ បើមានរឿងអីកើតឡើង យើងត្រូវមានព័ត៌មានភ្លាមៗពីករណីនោះ»។

រីឯក្រសួងការបរទសកម្ពុជា ក៏បានបញ្ជាក់ជំហររបស់កម្ពុជាថា មិនមានវិធានការណ៍ណាមួយ ដើម្បីជម្លៀសពលករកម្ពុជា ពីកូរ៉េខាងត្បូងឡើយ ដោយចាត់ទុកការគម្រាមដាក់គ្នារវាងកូរ៉េខាងត្បូងនិងកូរ៉េខាងជើងគ្រាន់តែជា «សង្គ្រាមពាក្យសំដី ឬសង្គ្រាមស្លាបប៉ាកា»ប៉ុណ្ណោះ។

លោក ហេង សួរ អគ្គនាយក និងជាប្រធានអង្គភាពរដ្ឋបាល និងហិរញ្ញវត្ថុ នៃគណៈកម្មាធិការបណ្តុះបណ្តាល និងបញ្ជូន ពលករទៅបរទេស របស់ក្រសួងការងារបានថ្លែងថា មកទល់ពេលនេះ មានពលករកម្ពុជាស្របច្បាប់ ដែលធ្វើការ​នៅកូរ៉េ​ខាងត្បួងប្រមាណជាង ២ ម៉ឺននាក់។ លោកបានទាក់ទងគ្នារហូត និងមានលេខទំនាក់ទំនងបងប្អូនធ្វើការនៅទីនោះ ក្នុង​ករណីមានបញ្ហាអ្វីមួយ។ លោកបានថ្លែងឲ្យដឹងថា «ខ្ញុំអំពាវនាវ កុំឲ្យបងប្អូនសាច់ញាតិនៅកម្ពុជា មានការបារម្ភ​អំពីសុខ​ទុក្ខកូនចៅរបស់ខ្លួន ដែលកំពុងធ្វើការនៅកូរ៉េ ពីព្រោះក្រុមមន្ត្រីកម្ពុជា នឹងចុះទៅសាកសួរសុខទុក្ខពលករខ្មែរ នៅកូរ៉េ​ខាងត្បូង នៅថ្ងៃទី ១២ ខែមេសាខាងមុខ ដើម្បីចូលរួមអបអរសាទរ ចូលឆ្នាំថ្មីខ្មែរយើងនៅទីនោះ»។

ការបញ្ជាក់ជំហររបស់រដ្ឋាភិបាលកម្ពុជា បានកើតឡើង នៅពេលដែលប្រទេសកូរ៉េខាងជើង បានគំរាមម្តងហើយម្តងទៀត ថាខ្លួននឹងប្រើអាវុធទំនើបច្រើនប្រភេទ ក្នុងករណីចាំបាច់វាយបកទៅលើកូរ៉េខាងត្បូង ដែលជាអតីតជាតិសាសន៍​តែមួយ​រួមគ្នា ដែលមានសហរដ្ឋអាមេរិកគាំទ្រ។

ស្របគ្នានោះដែរអង្គការសហប្រជាជាតិ បានដាក់ទណ្ឌកម្មសេដ្ឋកិច្ច ទៅលើកូរ៉េខាងជើង ដែលអាងអំណាចមហាយក្ស​ចិននៅពីក្រោយខ្នង ដោយសារតែប្រទេសកុម្មុយនីស្តនេះ សាកល្បងអាវុធនុយក្លេអ៊ែ ឆ្លងទ្វីប កាលពីដើមឆ្នាំ ២០១៣ ប្រឆាំងនឹងបម្រាមរបស់អង្គការសហប្រជាជាតិ៕

-----------------------------------------------
ដោយ ៖ គិន ងុយ - ភ្នំពេញ ថ្ងៃទី០៣ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ