ឌឺវ័យ្ស៍ (The Voice) កម្មវិធីប្រឡងចម្រៀងអន្តរជាតិ មកដល់កម្ពុជា
«យើងកំពុងសែ្វងរកអ្នកចម្រៀងថ្មី មានសំឡេងល្អ» ជាសារទាក់ទាញថ្មីមួយ បានធ្វើអោយទស្សនិកជនភ្ញាក់ផ្អើល និងរំភើបជាមួយកម្មវិធីទូរទស្សន៍ ឌឺវ័យ្ស៍ (The Voice) ដែលផលិតកម្មហង្សមាស បានទិញសិទ្ធិពីកម្មវិធីមួយនេះ ពីផលិតកម្មផលិតកម្មវិធីមួយ នៅប្រទេសហូឡង់ ដែលមានល្បីល្បាញពេញ និងការគាំទ្រពេញទូទាំងពិភពលោក។ កម្មវិធីនៅកម្ពុជានេះ នឹងចាប់ផ្តើមជម្រុះបេក្ខជនដំបូង នៅថៃ្ងទី៥ ខែមិនា ខាងមុខនេះ។
កម្មវិធីឌឺវ័យ្ស៍ របស់ស្ថានីយ៍ទូរទស្សន៍មួយនៅប្រទេសប៊ែលហ្សិក។ (រូបថត rtbf.be)
តារាចម្រៀង - ថ្មីៗនេះកម្មវិធីទូរទស្សន៍ ឌឺវ័យ្ស៍ (The Voice - សម្លេង) ត្រូវបានផលិតកម្មហង្សមាសទិញសិទ្ធិ និងចាក់ផ្សាយនៅប្រទេសកម្ពុជានាឆាប់ៗនេះ ហើយក៍កំពុងប្រកាសរកអ្នកមានបំណងចង់ក្លាយជាអ្នកចម្រៀងពិតប្រាកដ។ កម្មវិធីដែលមានប្រភពពីប្រទេសហូឡង់នេះ មានភាពល្បីល្បាញ និងទទួលបានការគាំទ្រយ៉ាងខ្លាំងក្លា រហូតត្រូវបានស្ថានីយ៍ទូរទស្សន៍នៅក្នុងប្រទេសដល់ទៅ ៤៨ប្រទេស ជុំវិញពិភពលោក ទិញសិទ្ធិមកផលិតដែរ ក្នុងនោះរួមមានដូចជា ប្រទេសអង់គ្លេស ចិន ថៃ វៀតណាម អូស្រ្តារី កាណាដា សហរដ្ឋអាមេរិកជាដើម។
ចំពោះលក្ខខណ្ឌនៃការប្រឡងចម្រៀង ដែលមិនដូចការប្រកួតចម្រៀងដទៃនោះ គឺត្រូវមានអាយុចាប់ពី១៦ឆ្នាំ ដល់៤៥ឆ្នាំ អាចដាក់ពាក្យម្នាក់ឯង ឬជាគូដែលច្រៀងចម្រៀងល្បីនាំមុខគេ។ ជាពិសេសទៅទៀតនោះ រូបរាងមុខមាត់យ៉ាងណាក៍ដោយ ក៍មិនសំខាន់ដែរ អ្វីដែលកម្មវិធី(The Voice) ចង់បានតែម្យ៉ាងទេ គឺសំឡេងរណ្ដំរបស់បេក្ខជនតែប៉ុណ្ណោះ។
តួយ៉ាងសំរាប់រដូវកាលទីមួយនៃកម្មវិធី (The Voice) នេះ គណៈកម្មការឬគ្រូបង្វឹកដែលនឹងត្រូវចូលមកវិនិច្ច័យ និងដាក់ពិន្ទុនោះ មានចំនួន ៤ រូបគឺកញ្ញា ឱក សុគន្ធកញ្ញា កញ្ញា ពេជ្រសោភា លោក ណុប បាយារិទ្ធិ និង លោក ឆន សុវណ្ណ រាជ សុទ្ធសឹងតែជាកំពូលតារា សម្រៀងដ៏ល្បី របស់ផលិតកម្មហង្សមាស ។ ទនឹ្ទមនឹងនេះ ការជម្រុះបេក្ខជន បេក្ខនារី នៅរដូវកាលទីមួយនេះមានខេត្តចំនួន៥ចូលរូម គឺខេត្តកំពង់ចាម សៀមរាប បាត់ដំបង ព្រះសីហនុ និងចុងក្រោយរាជធានីភ្នំពេញ។
ពាក្យសុំចូលរូមប្រឡងអាចរកបាន នៅក្រុមហ៊ុនហង្សមាស ម៉ូហ្សិន ស្ទួឌីយ៉ូ (Motion Studio) និងតាមស្ថានីយ៍ប្រេងឥន្ធនៈទូទាំងខេត្តក្រុងនៃប្រទេសកម្ពុជា នឹងផុតកំណត់នៅថៃ្ង ២៨ កុម្ភៈ ២០១៤ ខាងមុខ។ ចំនែកឯបេក្ខជន ឬបេក្ខនារី ដែលឈ្នះក្នុងកម្មវិធីនេះនឹងទទួលបាន ប្រាក់រង្វាន់ ១០០ លានរៀល ព្រមទាំងក្លាយជាតារាចម្រៀងមានកិច្ចសន្យាប្រចាំផលិតកម្មទៀតផង ។
គួរម្លឹកដែរថា កម្មវិធីទូរទស្សន៍ (The Voice) ត្រូវបានបង្កើតឡើងដំបូងគេបង្អស់ពីផលិតករជនជាតិហូឡង់ លោក ចន ដេម៉ល (John de Mol) ក្នុងគោលបំណងស្វែងរកអ្នកដែលមានសំឡេងពិតពីកំណើត និងពិរោះដែលអាចអង្រួនបេះដូងអ្នកស្តាប់អោយរំភើបចាប់តាំងពី ឆ្នាំ ២០១០មកម្ល៉េះ។ បច្ចុប្បន្ននេះកម្មវិធីទូរទស្សន៍ ឌឺវ័យ្ស៍ នេះ ជាគូប្រជែងជាមួយកម្មវិធី អាមេរិខេន អាដូល (Pop Idol) និងកម្មវិធីមួយទៀតឈ្មោះ អ៊ិច្ស ហ្វាក់ទ័រ (X Factor) របស់ប្រទេសអង់គ្លេស ដែលសុទ្ធសឹងជាកម្មវិធីប្រឡងចំរៀងដូចគ្នា៕
------------------------------------
ដោយ ក. ស៊ន សុខឃៀង (ទំនាក់ទំនង៖ [email protected]) - ភ្នំពេញ ថ្ងៃទី៣១ ខែមករា ឆ្នាំ២០១៤