យុទ្ធសាស្ត្រ​ក្រុមហ៊ុន ទ្រី ភាព ដើម្បី​ឲ្យ​«​កម្ទេច​ព្រៃ​ឈើ» នៅ​ខេត្ត​ព្រះវិហារ

សម្លេងសន្ធឹករបស់គោយន្តដែលផ្ទុកទៅដោយរណារ៉ៃថ្មីៗ បានកំពុងធ្វើដំណើរចេញពីភូមិ នៅពេល​ព្រឹក​ព្រលឹម ដើម្បី​​ទៅ​​កាប់​​និង​​ប្រមូល​ឈើ ដែលបានផ្តួលរួចហើយនៅកណ្តាលព្រៃ ដឹកយកមកដាក់នៅក្នុងភូមិ​ដើម្បី​លក់​ឲ្យ​ឈ្មួញ។ នេះ​គឺ​ជា​យុទ្ធសាស្ត្រ របស់ក្រុមហ៊ុន​លោកឧកញ៉ា ទ្រី ភាព ដែលលើកទឹកចិត្ត​ឲ្យពលរដ្ឋ​ទៅ​កាប់​បំផ្លាញ​ព្រៃ«ឲ្យអស់»​​នៅ​​​ក្នុង​​ខេត្ត​​ព្រះវិហារ។ ខាងក្រោមនេះ ជាបទយកការណ៍​ពីទិដ្ឋភាព​ទាំង​នោះ ដោយ​អ្នកសារព័ត៌មាន​របស់​ទស្សនាវដ្ដី​​មនោរម្យ.អាំងហ្វូ ដែលបានចុះ​ទៅដល់ទីកន្លែង​ដោយ​ផ្ទាល់។
យុទ្ធសាស្ត្រ​ក្រុមហ៊ុន ទ្រី ភាព ដើម្បី​ឲ្យ​«​កម្ទេច​ព្រៃ​ឈើ» នៅ​ខេត្ត​ព្រះវិហារ
ឈើដុំប្រណិតជាច្រើន ត្រូវបានគូសចំណាំដោយអក្សរពណ៌ក្រហម ដាក់លើឡានដឹកចេញទៅ។ (រូបភាព MONOROOM.info/ Kin.G)
Loading...
  • ដោយ: លោក គិន ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី០៨ មេសា ២០១៤
  • កែប្រែចុងក្រោយ: October 14, 2014
  • ប្រធានបទ: ជំនួញឈើ
  • អត្ថបទ: មានបញ្ហា?
  • មតិ-យោបល់

កាប់ឈើខុសច្បាប់ - នៅក្នុងគោយន្ត ដែល​ផ្ទុក​ទៅ​ដោយ​ឈើ​ធ្វើ​ចរាចរណ៍​ដោយ​សេរី នៅ​ក្នុង​ឃុំ​ធ្មា ស្រុក ជ័យសែន លោក មាស សំណាង (ជា​ឈ្មោះ​ដែល​អ្នក​សារព័ត៌មាន​ដាក់​ឲ្យ) ដែល​ជា​ពលរដ្ឋ​ម្នាក់ តែង​តែ​ចេញ​មុខ​ប្រឆាំង​​ជា​មួយ​​ឈ្មួញ​ឈើ​នៅ​ក្នុង​ឃុំ​របស់​លោក បាន​ថ្លែង​ថា មាន​ថៅកែ​រង​របស់​ក្រុមហ៊ុន លោក ឧកញ៉ា ទ្រី ភាព បាន​មក​ក្នុង​ភូមិ ប្រាប់​ប្រជា​ពលរដ្ឋ​ឲ្យ​ដើរ​ទៅ​កាប់​ព្រៃ ហើយ​គេ​មក​ទិញ​នៅ​ទីនេះ​តាម​ផ្ទះ​នៅ​ពេល​​ល្ងាច។ លោក​បាន​ថ្លែង​ឲ្យ​ដឹង​​ទៀត​​ថា ៖ «ថៅកែ​គេ​ដើរ​រក​ទិញ​តាម​ផ្ទះ​ហើយ គេ​បាញ់​ថ្នាំ​សំគាល់ តែ​ខ្ញុំ​មិន​​ដឹង​​ថា​មាន​ន័យ​ថា​ម៉េច​ទេ វា​ជា​អក្សរ​បារាំង។ នៅ​ពេល​យប់ បន្ទាប់​ពី​គេ​ប្រមូល​ឈើ​អស់​ហើយ ទើប​គេ​ដឹក​​ចេញ​ពី​ភូមិ។»។

លោកបានរៀបរាប់ថា ប្រពលរដ្ឋគ្របទុកឈើនៅតាមផ្ទះរបស់ពួកគេ ហើយនៅពេលល្ងាច ឈ្មួញមកដល់​ទើប​គេ​ប្រមូលថ្លឺង ពុំមានអាជ្ញាធរ​ធ្វើការ​ទប់ស្កាត់នោះទេ ដោយសារតំណាងរបស់ក្រុមហ៊ុន ទ្រី ភាព បាន​រត់ការ​បង់​លុយ​​ឲ្យពួកគេ​រួចទៅហើយ តាំងពីមន្ត្រីថ្នាក់លើ​រហូតដល់​ថ្នាក់មូលដ្ឋាន ប៉ុន្តែពលរដ្ឋទាំងនោះ ​ត្រូវ​តែបង់ឲ្យ​ប៉ូលីសរដ្ឋបាល​២ម៉ឺនរៀល ក្នុងឈើមួយគោយន្ត។ លោកបានថ្លែងថា៖ «ចាប់តាំងពីមុនបោះឆ្នោត និងក្រោយ​លទ្ធផលបោះឆ្នោត ខាងក្រុមហ៊ុនរបស់លោកឧកញ៉ា ទ្រី ភាព​ បានឲ្យតំណាងរបស់​គេម្នាក់​ឈ្មោះ ស្រ៊ៀង ម៉េង ចុះមកឃុំនេះ ដើម្បីលើក​ទឹកចិត្តឲ្យពលរដ្ឋ នៅក្នុងភូមិ ចូលទៅកាប់ព្រៃ​ ដើម្បីលក់ឲ្យ​ពួកគេ»។

លោកបានថ្លែងឲ្យដឹងទៀតថា សព្វថ្ងៃនេះ គឺដោយសារតែចាញ់នូវឥទ្ធិពលប្រាក់ដុល្លារ ធ្វើឲ្យពលរដ្ឋដែល​ធ្លាប់​តែ​ការពារព្រៃ បានក្លាយទៅជាអ្នកបំផ្លាញព្រៃអស់ទៅហើយ លោកស្តាយឈើមែនទែន ប៉ុន្តែមិនដឹង​រក​វិធីសាស្ត្រណា​ទប់ស្កាត់បាន បើពឹងទៅអាជ្ញាធរគេអត់អើពើរ បើប៉ូលីសនៅទីនេះ គេចាំយកលុយពី​គោយន្ត​ដឹកឈើ។ ហើយឈើ ដែលដាក់គរនៅតាមភូមិ គេទិញមួយគីបមួយលាន គឺប្រភេទឈើធ្នង់។ លោកបាន​បញ្ជាក់ទៀតថា ៖«បច្ចុប្បន្ននេះ ប្រជាពលរដ្ឋរកស៊ីឈើស្រួលជាងមុន ពីមុនឡានប៉ូលីស​ទាហានមករកឈើ​ពេញភូមិ ប៉ុន្តែឥឡូវគឺពលរដ្ឋម្តង»។

នៅខណៈដែលឈើ ត្រូវបានពង្រាយនៅតាមព្រៃ ដោយមានសរសេរជាអក្សរព័ណក្រហមថា KM និង AF ដែលមាន​មុខកាត់បីតឹកបួនជ្រុង គុណនឹង៤ បណ្តោយប្រវែង២ម៉ែត្រ បានតម្រៀបគ្នាជាដុំនៅតាម ផ្ទះ​និមួយៗ​របស់ប្រជាជន​នៅក្នុងស្រុកចំនួនបីស្រុក នៃខេត្តព្រះវិហារ ដែលដាក់រងចាំឈ្មួញ​មកប្រមួលយក​នៅ​ពេល​ល្ងាចនោះ លោក ឈាង វុទ្ធី ដែលជាសកម្មជនការពារព្រៃឈើ នៅតែប្រកាន់ជំហរ​ ប្រឆាំងជាមួយ​ឈ្មួញ​បំផ្លាញព្រៃឈើនោះ បានថ្លែងឡើងថា បច្ចុប្បន្ននេះ ឈើស្ទើរតែអស់ទៅហើយ។ ដូច្នេះ បើគេទៅ​ព្រៃ​ជូបគល់​យកគល់ ជូបឈើយកឈើ នេះជា​យុទ្ធសាស្ត្រ​ចុងក្រោយ របស់ក្រុមហ៊ុន ក្នុងការបំផ្លាញឈើឲ្យអស់ នៅ​ខេត្ត​ព្រះវិហារ។ លោកបានថ្លែងថា៖ «គេបើកដៃឲ្យ​រកតាម​ចិត្ត គេមិនបានចាប់ចង់អីនោះទេ ពីព្រោះ​ក្រុមហ៊ុន​គេ​បង់​ឲ្យសមត្ថកិច្ច ហើយសកម្មភាពនេះ មានតាំងពីក្រុមហ៊ុន​ចូល​មក។ គេគ្មានចាប់គ្មានចងទេ គឺគេ​បើក​តាម​ចិត្ត​សេរីតែម្តង។ គេរកស៊ី ដូចរកស៊ីដំឡូងអញ្ចឹង។»។

លោកបាននិយាយបន្តថា នៅពេលដែលពលរដ្ឋដឹកឈើមកដល់ភូមិ ពេលល្ងាចគឺខាងតំណាង​ក្រុមហ៊ុន​គេ​មក​ដល់​ផ្ទះ មកទិញភ្លាមតែម្តង ហើយដោយសារតែទង្វើនេះហើយ បណ្តាលឲ្យឈើចាប់ផ្តើមស្បើយ ពីចុងឆ្នាំ ២០១៣មក ហើយខ្លាំងមែនទែន គឺនៅកំឡុងពេលបោះឆ្នោត។ លោកបានថ្លែងឲ្យដឹងទៀតថា៖ «ប្រជាជន​ទៅ​កាប់ឈើទូទៅ នៅ​ក្នុងភូមិនិមួយៗ យ៉ាងហោយណាស់ក៏មាន រណារ៉ៃ ១០០ទៅ ២០០ គ្រឿងដែរ មាន​តិច​តួច​ណាស់​ដែល​ការពារព្រៃ នៅទីនេះលុះត្រាតែគ្មាន ទ្រី ភាព និង ស្រ៊ៀង ម៉េង ទើបព្រៃនៅគង់វង្ស»។


ឈើដុំប្រណិតជាច្រើន ត្រូវបានពលរដ្ឋកាប់ ហើយដឹកចេញដោយគោយន្ដ។ (រូបភាព MONOROOM.info/ Kin.G)

ជាមួយនឹងគំនរឈើធ្នង់រាប់រយគូប នៅខាងមុខផ្ទះ ដែលមានបាញ់ថ្នាំក្រហម សំគាល់របស់ក្រុមហ៊ុន​ហើយ​នោះ លោក ផា ដូន ដែលបានប្រកបរបរ ជាអ្នកកាប់ឈើនៅក្នុងតំបន់ស្រែវាល ស្ថិតនៅក្នុងឃុំធ្មា អស់រយៈ​ពេល៤ឆ្នាំ​មក​ហើយ បានថ្លែងឲ្យដឹងថា ពីមុនគេកាប់គររាប់ពាន់កំណាត់ រាប់ពាន់ដើម ហើយបច្ចុប្បន្ននេះ លោកបាន​ចាប់ផ្តើម​បង្វែរ ទៅកាប់ឈើនៅកន្លែងថ្មី នៅខេត្តស្ទឹងត្រែង តាមក្រុមហ៊ុន ទ្រី ភាព បន្ទាប់ពី​ទីតាំង​ឈើនៅក្នុងតំបន់ជិតអស់។ ឈើនៅក្នុងខេត្តព្រះវិហារ ចាប់ផ្តើមសម្រុកកាប់ខ្លាំងមែនទែន មុន​បោះឆ្នោត​មួយខែ ហើយរហូតមកដល់ពេលនេះ ឈើជិតអស់ទៅហើយ។ លោកបានថ្លែងឲ្យដឹងទៀតថា៖ «ឈើនៅ​ទីនេះ​អស់ហើយ ស្ទើរតែជីកគល់ទៀតទៅ​ហើយ វាអស់ទៅហើយ រដ្ឋាភិបាល​មិនដឹងប្រកែកថា គ្មាន​ការកាប់​ឈើ​ម៉េចទេ គេកាប់អស់ហើយនេះ»។

សកម្មភាពនៃការដឹកជញ្ជូនឈើ បានចាប់ផ្តើមស្ទូចឈើ ដែលលាក់ទុកនៅក្នុងព្រៃ នៅពេលល្ងាច​ដែលមាន​រថយន្ត​យ៉ីឌុប​ធំៗ និងរថយន្តស្ទូច របស់ក្រុមហ៊ុនលោកឧកញ៉ា ទ្រី ភាព ស្ថិតនៅក្នុងស្រុកសង្គមថ្មី ចំណែក​ឯ​នៅក្នុង​ស្រុក​​ជ័យសែន នឹងស្រុកឆែប បានចាប់ផ្តើមនាពេលព្រឹកព្រលឹម និងដើរប្រមូលទិញតាមផ្ទះ​នៅ​ពេល​ល្ងាច។ នៅខណៈ​ដែលរថយន្តផ្ទុកទៅដោយឈើ ហើយជាប់ផុងមិនអាចទៅរួច ដែលមានមនុស្ស​មួយ​ក្រុម កំពុង​ព្យាយាម​សណ្តោង​ និងរុញឲ្យទៅមុខ បុរសម្នាក់ដែលបដិសេធមិនបញ្ចេញឈ្មោះ និយាយទាំង​សភាព​រញីរញ័រ ដោយលើកទូរសព័្ទ​ហៅ​ទៅលោក ស៊្រៀង ម៉េង ទាំងញើសជោគខ្លួនបានប្រាប់ឲ្យដឹងថា ឈើ​នោះ​គឺ​ជា​របស់​លោក ជ្រុញ ដែលមានឈ្មោះ​ពេញថា លី គឹមឈួង ជាអតីតបំរើការឲ្យផ្នែកចារកម្ម។ លោក​បាន​ថ្លែង​ថា៖ «ឈើនេះរបស់បងជ្រុញ ហើយយើងដឹក យើងដឹកយកទៅដាក់ឲ្យក្រុមហ៊ុន ឧកញ៉ា ទ្រី ភាព ខ្ញុំគ្រាន់តែ​ដឹក​ឲ្យ​គេ​ប៉ុណ្ណោះ ខ្ញុំមិនដឹងថា គេឲ្យខ្ញុំប៉ុន្មាននោះទេ បើ​យើងប្រព្រឹត្តិបទល្មើស ទើបបាន​លុយ​ច្រើន»។

ក្រោមស្នូររថយន្តដឺកឈើបានបន្លឺឡើង នៅពេលរាត្រីតាមទីប្រជុំជន រវាងចាប់ពីម៉ោង ៨យប់ លោក ឈឹម សាវុធ នាយកប្រតិបត្តិអង្គការការពារ​ធនធានធម្មជាតិ ដែលធ្វើបន្ទាប់ពីសកម្មជនបរិស្ថានដ៏ល្បី លោក ឈុត វុទ្ធី ដែលត្រូវ​គេបាញ់សម្លាប់ នៅពេលចុះអង្កេតបទល្មើសព្រៃឈើ នៅក្នុងខេត្តកោះកុងនោះ បានថ្លែងឲ្យ​ដឹង​ថា បច្ចុប្បន្ននេះ​ គឺ​យុទ្ធសាស្ត្ររបស់ក្រុមហ៊ុន ឧកញ៉ា ទ្រី ភាព បំផ្លាញឈើ ដែលនៅចុងក្រោយ ក្នុងខេត្ត​ព្រះវិហារ​​នេះ​តែម្តង ដោយ​បាន​ឲ្យមេការ​ដើបំផុសបំផុលពលរដ្ឋ ឲ្យចូលព្រៃកាប់ឈើលក់ឲ្យខ្លួន មុននឹងខ្លួន​រើ​ទៅ​​កាន់​​ទីតាំង​ថ្មី ស្ថិតក្នុងខេត្ត​ស្ទឹងត្រែង។

ដោយនៅក្នុងស្រុកឆែប ដែលស្ថិតនៅក្នុងភូមិឆែប២ ត្រង់ចំណុចបំបែកទៅដងផ្លិត មានឈ្មោះ ឈឿន សំណាង ជា​មេឃ្លាំងធំ ហើយអ្នកដើរប្រមូលទិញនៅក្នុងស្រុក សង្គមថ្មី និងជ័យសែន មានឈ្មោះ ហេង គង់ និង តុប វីរ៉ាដា លី គឹមឈួង ហៅជ្រុញ ដែលមានផ្លាក់លេខឈើ KM ប៉ុន្តែពួកគេប្រមូល​យកមកដាក់ នៅក្នុង​ឃ្លាំងនៅ​ឆែបទាំងអស់ ចំនែកឯលោក ស្រ៊ៀង ម៉េង ជាអ្នករត់ការទូរទៅ ជាមួយអាជ្ញាធរនិងមន្ត្រីពាក់ព័ន្ធ។ ហើយអ្នកដែលមើលការ​ខុស​ត្រូវ​ទូទៅ របស់ក្រុមហ៊ុនឧកញ៉ា ទ្រី ភាព នៅខេត្តព្រះវិហារ គឺលោក អ៊ុក គឹមសាន្ត អតីតប្រធានរដ្ឋបាលព្រៃឈើ​ ខេត្ត​ពោធិ៍សាត់។


រថយន្ដដឹកឈើដុំប្រណិត ជាប់ផុងទៅមុខមិនរួច។ (រូបភាព MONOROOM.info/ Kin.G)

លោក ឈឹម សាវុធ បានថ្លែងថា នៅក្នុងស្រុកបី ការនាំឈើចេញទៅវៀតណាម សង្គមថ្មី ឆែប ជ័យសែន ជា​មធ្បម​ក្នុងមួយថ្ងៃគេ​នាំឈើចេញ ប្រមាណជា៦ទៅ៧រថយន្តយ៉ីឌុប ហើយក្នុងមួយរថយន្តអាចផ្ទុក​ឈើបាន​ប្រមាណជា ៣០ម៉ែត្រគូប ដូច្នេះនៅក្នុងមួយថ្ងៃគេដឹកឈើចេញពីស្រុកទាំងបីនោះប្រមាណជា ១៨០ម៉ែត្រ​គូបទៅ ២០០ម៉ែត្រគូប ហើយ​ចរាចរណ៍នេះគេធ្វើចាប់ពីដើមឧសភា រហូតមកដល់សព្វថ្ងៃនេះ។ លោកបាន​ថ្លែង​ឲ្យដឹងថា៖ «ក្រុមហ៊ុន ទ្រី ភាព ទទួលដឹកឈើប្រណិត ចេញឲ្យឈ្មួញទាំងអស់ ទៅវៀតណាម​តាមច្រក​ដូង៧ដើម ស្ថិតនៅក្នុងស្រុកមេមត់ ខេត្ត​កំពង់ចាមដោយគេយកតម្លៃ ១៨០០ដុល្លារ ក្នុងម៉ែត្រគូប សរុបនៅ​ស្រុកទាំងបី នៃខេត្តព្រះវិហារនេះ ក្រុមហ៊ុនអាចរក​លុយបាន ចាប់ពី២៨,៥លានដុល្លារក្នុងមួយខែ នេះ​យើង​មិន​គិតខេត្តផ្សេងនោះទេ»។

លោកបានបន្តការរៀបរាប់ទៀតថា បច្ចុប្បន្ននេះ ស្ថានភាពព្រៃឈើកំពុងតែធ្ងន់ធ្ងរទៅៗ ចំនែកឯរដ្ឋាភិបាល​គ្មានឆន្ទៈ ក្នុងការបង្ក្រាបបទល្មើសព្រៃឈើនោះទេ ប្រសិនបើគេមានឆន្ទៈបង្ក្រាបវា គ្មានការលំបាកនោះទេ ដោយគ្រាន់តែ​អនុវត្ត​ច្បាប់ព្រៃឈើ តាមមាត្រា ៩៦ ដល់ ១០១ គឺធ្វើបានទាំងស្រុង ដោយមិនចាំបាច់ចេញ​បទ​បញ្ជារ​នោះ​ឡើយ ព្រោះ បទបញ្ជារទាំងនោះគ្មានប្រសិទ្ធិភាពទេ។ លោកបានថ្លែងឲ្យដឹងថា ៖«ដោយ​សារ​តែ​ការ​អស់​សង្ឃឹម នៅក្នុង​ការទប់ស្កាត់ បទល្មើសព្រៃឈើនេះហើយ បានជាពលរដ្ឋនាំគ្នាកាប់ឈើ​លក់​ឲ្យ​ក្រុមហ៊ុន ដោយ​គាត់​យល់ថា ប្រសិន​បើពួកគាត់មិនកាប់ ក៏ពួកឈ្មួញទាំងអស់នោះកាប់អស់ដែរ»។

កាលពី ថ្ងៃទី ២២ ខែកុម្ភៈ ឆ្នាំ ២០១៣ លោកនាយករដ្ឋមន្ត្រីហ៊ុន សែន បានចុះហត្ថលេខាលើបទបញ្ជារ ០២ បប ស្តី​ពីវិធានការបង្ការ ទប់ស្កាត់ និងបង្រ្កាបការកាប់ ការដឹកជញ្ជូន ការប្រមូល ការស្តុកទុក និងការនាំឈើ​ក្រញូងចេញ ដោយសម្រេចលើ៩ ចំនុច ដែលនៅក្នុងចំនុចទី១ ក្នុងកថាខណ្ឌទី២ បានលើកឡើងថា ករណី​មានការឆ្លងដែនខុស​ច្បាប់ ក្នុងភូមិសាស្ត្រឈរជើង​របស់អង្គភាពណាមួយ មេបញ្ជារការអង្គភាពនោះ ត្រូវ​មាន​ការទទួល​ខុសត្រូវ ចំពោះ​មុខរដ្ឋាភិបាល។ ហើយកាលពីខែ មករា ឆ្នាំ២០១០ លោកនាយករដ្ឋមន្ត្រី ហ៊ុន សែន ធ្លាប់បាន​ដាក់បទបញ្ជាជា​លើក​ទី១ និងព្រមានខ្លាំងៗម្ដងហើយ ទៅលើមន្ត្រីយោធាទាំងអស់ ឲ្យបញ្ឈប់​សកម្មភាព​កាប់​ព្រៃឈើ និងបញ្ឈប់​សកម្មភាព​ទន្ទ្រាន​កាន់កាប់ដី រឺគាំទ្រអ្នករកស៊ីឈើខុសច្បាប់។

យោងតាមរបាយការណ៍​រូបភាពផ្កាយរណប ដែលចេញកាលពីខែធ្នូ ឆ្នាំ ២០១៣ ផែនទីដែលមាន​ចលនា របស់​គេហទំព័រ «Open Development Cambodia (ODC)» បានបង្កើតពីរូបភាពផ្កាយរណបណាស្សា (NASA) បាន​បង្ហាញ​​លម្អិត អំពីការបំផ្លាញខ្លាំងក្លាទៅលើព្រៃឈើរបស់ប្រទេសកម្ពុជា ដែលជាការបំផ្លាញ​ដែល​​បាន​​កើន​ឡើង​​យ៉ាង​ខ្លាំង ក្នុងរយៈកាល៥ឆ្នាំចុងក្រោយនេះ។ គេហទំព័រ «ODC» បានឲ្យដឹងថា ការវិភាគ​​រូបភាព​​ផ្កាយ​រណប​បង្ហាញ​ថា ក្នុងឆ្នាំ​១៩៧៣ ប្រហែល ៧២.១១%នៃប្រទេសកម្ពុជា ត្រូវបានគ្រប់ដណ្តប់​​ដោយ​​ព្រៃឈើ។ រូបភាព​​ថ្មីៗ​​បាន​បង្ហាញថា គម្រប​ព្រៃឈើបច្ចុប្បន្ន មានតិចទៅៗ គឺចំនួន ៤៦,៣៣ ភាគរយ ដោយ​​រួម​​បញ្ចូល​ទាំង​​ចម្ការ​​កៅស៊ូ។

» វីដេអូ របស់​គេហទំព័រ «Open Development Cambodia» ស្ដីពីការវិវឌ្ឍទៅមុខ នៃការបំផ្លាញព្រៃឈើនៅ​កម្ពុជា គិត​​ចាប់​តាំងពីឆ្នាំ១៩៧៣ មកទល់បច្ចុប្បន្ន៖

របាយការណ៍របស់ក្រុមកិច្ចការពិសេសសិទ្ធិមនុស្ស បានរកឃើញឃ្លាំងស្តុកឈើប្រណីត ចំនួន ១៤កន្លែង និង​អាជ្ញាប័ណ្ណ​ទិញឈើ ក្នុងតំបន់ដីសម្បទានសេដ្ឋកិច្ចចំនួន២៧ នៅតាមខេត្តចំនួន១២ ព្រមទាំងមាន​ក្រុមហ៊ុន​សាខា​ដែល​ទទួលបានដីសម្បទាន​សេដ្ឋកិច្ចចំនួន១៥ នៅតាមខេត្តចំនួន១០ ដែលមានផ្ទៃដី​សរុប​ជិត ៧ម៉ឺន​ហិកតារ។ ផែនការកាប់ឈើ ក្រោមផ្លាកអភិវឌ្ឍន៍របស់ក្រុមហ៊ុនលោក ទ្រី ភាព បានប៉ះទង្គិចដល់​ការរស់នៅ​របស់ប្រជាពលរដ្ឋ ចំនួនជិត ១.៥០០គ្រួសារ និងប៉ះពាល់ដល់តំបន់​ការពារ​ធនធានធម្មជាតិ នៃ​ដែន​ជម្រក​សត្វ និងឧទ្យានជាតិចំនួន ២០កន្លែង។ ចំណែកឯ អង្គការឃ្លាំមើលបរិស្ថាន​ពិភពលោក (Global Witness) បាន​រាយការណ៍​​កាលពីឆ្នាំ២០០៨ ថា លោកឧកញ៉ា ទ្រី ភាព ជាអ្នកនៅពីក្រោយ​ក្រុមហ៊ុន​​របស់​វៀតណាម មួយ​ឈ្មោះ ហុងហ្វឺ (Hongfu) ដែលរកស៊ីកាប់​បំផ្លាញព្រៃឈើ រាប់ម៉ឺនហិកតារ នៅកម្ពុជា។ របាយការណ៍​នោះ ក៏​បាន​ឲ្យ​ដឹងផងដែរថា លោកឧកញ៉ា ទ្រី ភាព គឺជា​មនុស្សដែលមានអំណាច និងជា​មនុស្ស​​ពូកែ​រក​លុយ​ឲ្យ​គណបក្ស​​ប្រជាជនកម្ពុជា។

លោកឧកញ៉ា ទ្រី ភាព និងលោក អ៊ុក គឹមសាន្ត តំណាងឲ្យក្រុមហ៊ុន ទ្រី ភាព នៅខេត្តព្រះវិហារ ពុំអាច​ទំនាក់​ទំនង​​ដើម្បីធ្វើការអត្ថាធិប្បាយបានទេ។

រីឯលោក ឆេង គឹមស៊ុន ប្រតិភូរដ្ឋាភិបាល ទទួលបន្ទុករដ្ឋបាលព្រៃឈើ ក៏ពុំអាចទំនាក់ទំនង ដើម្បីធ្វើការ​អត្ថាធិប្បាយ​​ភ្លាមៗនេះបានដែរ។

លោក សាត់ យ៉ន អធិការប៉ូលីស ស្រុកជ័យសែន បានថ្លែងឲ្យដឹងថា លោកពុំដែលដឹងថា មានមន្ត្រី​សមត្ថកិច្ច​​របស់​លោក ស្ទាក់យកលុយពីប្រជាពលរដ្ឋដែលចូលទៅកាប់ឈើនោះទេ ហើយក៏ពុំដែលមាន​ខាង​ក្រុមហ៊ុន​ណា គេមក​ទំនាក់ទំនង ដើម្បីសហការណ៍ជាមួយពួកលោកដែរ។ លោកបានថ្លែង​ឲ្យដឹង​ទៀត​ថា ៖«យើង​បាន​ធ្វើការហាម​ឃាត់​ពួកគាត់ កុំឲ្យទៅកាប់ឈើដែរ តែយើងហាមមិនឈ្នះ»។

កាលពីដើមខែមេសារនេះ សមាគមការពារសិទ្ធិមនុស្សអាដហុក ក៏បានចេញរបាយការណ៍ ស្តីពីព្រៃឈើ ដោយ​​​​បាន​​រិះគន់ភ្នាក់ងាររដ្ឋាភិបាលថា មិនបានយកចិត្តទុកដាក់ធ្វើការស៊ើបអង្កេត និងចាត់វិធានការទាន់​ពេល ចំពោះ​​ជន​ប្រព្រឹត្តបទល្មើសព្រៃឈើ បើទោះជាមានសេចក្ដីរាយការណ៍ពីការកាប់បំផ្លាញ និងជាកន្លែង​ដឹក​ជញ្ជូន​​ឈើ​​ខុសច្បាប់ ច្រើនជាងបណ្ដាប្រទេសនានាក្នុងតំបន់អាស៊ានយ៉ាងណាក៏ដោយ។ ហើយយ៉ាង​ហោច​​​មាន​​​ការ​កត់សម្គាល់​​ក្រុមហ៊ុន​ឯកជនចំនួន ១៨ ដែលទទួលបានដី​សម្បទាន​សេដ្ឋកិច្ចពីរដ្ឋាភិបាល និង​លេច​ធ្លោ​ជាង​គេ​ខាងអាជីវកម្មឈើ នៅក្នុង​ខេត្តចំនួន ១១ ដូចជាតំបន់ព្រៃឡង់ នៅខេត្តកំពង់ធំ តំបន់​ព្រៃឈើ​​នៅ​តាម​ជួរ​ភ្នំក្រវាញ ខេត្តពោធិ៍សាត់ តំបន់ព្រៃ​បឹង​ពែរ ខេត្តព្រះវិហារ សៀមរាប ឧត្តរមានជ័យ បន្ទាយ​មាន​ជ័យ ស្ទឹងត្រែង ក្រចេះ រតនគិរី មណ្ឌលគិរី និងខេត្តកំពង់ស្ពឺ ជាដើម។ ស្របគ្នានោះដែរ គម្រោង​សាងសង់​ទំនប់​​វារី​អគ្គិសនី​ជាច្រើនកន្លែង នៅ​ខេត្តកោះកុង ពោធិ៍សាត់ ស្ទឹងត្រែង និងខេត្តរតនគិរី តាមជួរ​ដងទន្លេបី ក៏​ជា​​ប្រភព​​នៃ​ការ​កាប់​បំផ្លាញព្រៃឈើយ៉ាងខ្លាំងសម្បើមដែរ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...