សារព័ត៌មាន​នៅ​អ៊ឺរ៉ុប ចាប់​អារម្មណ៍​នឹង​សម្ដី​របស់ នួន ជា

តើសារព័ត៌មាន នៅបណ្ដាប្រទេសនៅទ្វីបអឺរ៉ូបខាងលិច និយាយពីអ្វីខ្លះ ក្នុងសប្ដាហ៍កន្លងមកនេះ? អ្វីដែល​ពួក​គេ​​ចាប់​អារម្មណ៍ នៅក្នុងសប្ដាហ៍កន្លងទៅ រហូតមកដល់ចុងសប្ដាហ៍នេះ គឺចម្លើយរបស់អតីតមេដឹកនាំជាន់ខ្ពស់ របស់​របប​ខ្មែរ​ក្រហម កម្ពុជាប្រជាធិបតេយ្យ ដែលបានប្រៀបធៀបរបបដែលខ្លួនគ្រប់គ្រង ទៅ​នឹង​«រឿង​និទាន»​សម្រាប់​កុមារ។
Loading...
  • ដោយ: សេក មនោរកុមារ ដោយ សេក មនោរកុមារ (ទាក់ទង៖ [email protected]) - ប៉ារីស​ ថ្ងៃទី១៧ តុលា ២០១៤
  • កែប្រែចុងក្រោយ: October 20, 2014
  • ប្រធានបទ: ខ្មែរក្រហម
  • អត្ថបទ: មានបញ្ហា?
  • មតិ-យោបល់

អ្នករាយការណ៍ព័ត៌មាន របស់​ទស្សនាវដ្ដី​មនោរម្យ.អាំងហ្វូ បាន​អាន​សារព័ត៌មាន​នៅ​អ៊ឺរ៉ុប ចេញ​ផ្សាយ​កាល​ពី​សប្ដាហ៍​កន្លង​ទៅ ដែល​​និយាយ​​​ពី​កម្ពុជា​ ហើយ​សូម​ធ្វើការ​សង្ខេប​ជូន នូវ​ព្រឹត្តិការណ៍​នេះ​ជូន​ដូច​ត​ទៅ។ សារព័ត៌មាន​នោះ​ជា​ច្រើន បាន​ដាក់​អត្ថបទ​ទាំង​ស្រុង ដែល​សរសេរ​ដោយ ទី​ភ្នាក់ងារ​សារព័ត៌មាន​បារាំង អាអេហ្វប៉េ (AFP) និង​ខ្លះ​ទៀត បាន​យក​អត្ថបទ​នេះ​មក​កែ​ឆ្នៃ​ខ្លះៗ​ តែ​នៅ​តែ​មាន​ន័យ​ប្រហាក់​ប្រហែល​គ្នា។

សារព័ត៌មាន​ឆ្វេង​និយម​របស់​បារាំង លីបេរ៉ាស៊ីយ៉ុង (Liberation) បាន​ដាក់​ចំណង​ជើង​ធំៗ​ថា «កម្ពុជា៖ នួន ជា បាន​បរិហារ​ពី​"រឿងនិទាន" នៅ​ក្នុង​សវនាការ​កាត់​ទោស​ខ្លួន»។ លោក នួន ជា​អតីត​បង​ធំ​ទី​ពីរ ក្នុង​សម័យ​កម្ពុជា​ប្រជាធិបតេយ្យ បន្ទាប់​ពី​បង​ធំ​ទី​មួយ ប៉ុលពត ដែល​បាន​ស្លាប់​ទៅ​ហើយ​នោះ។  លោក នួន ជា អាយុ​៨៨​ឆ្នាំ ជា​កម្មាភិបាល​ជាន់​ខ្ពស់​របស់​របប​អាវ​ខ្មៅ មាន​តំណែង​ជា​ប្រធាន​រដ្ឋ​សភា ហើយ​ក៏​ជា​អ្នក​ទទួល​ខុស​ត្រូវ​ខាង​មនោគមន៍​វិជ្ជា​ដ៏​មាន​ឥទ្ធិពល​មួយ​រូប ឲ្យ​របប​បី​ឆ្នាំ​ប្រាំបី​ខែ​ម្ភៃ​ថ្ងៃ​នេះ​ដែរ។

ជនជាប់ចោទម្នាក់ទៀត ដែលត្រូវឡើងសនាវការរបស់សាលាក្ដីវិសមញ្ញានេះដែរ ជាអតីតប្រមុខរដ្ឋអាយុ ៨៣ឆ្នាំ នៃកម្ពុជាប្រជាធិបតេយ្យ លោក ខៀវ សំផន។

ទស្សនាវដ្ដីបារាំង ឡឺអិចស្ព្រេស (L'express) សរសេរថា សនាការប្រឆាំងនឹងមេដឹកនាំខ្មែរក្រហម​ពីរនាក់​ខាង​លើ ក្នុងចំណោមមេដឹកនាំ៤នាក់ (លោក អៀង សារី ស្លាប់ រីឯលោកស្រី អៀង ធីរិទ្ធិ មានជំងឹវង្វេងរង្វាន់) បាន​ចាប់​ផ្ដើមដំណើរការហើយ នៅក្នុងថ្ងៃសុក្រ ទី១៧ ខែតុលាសប្ដាហ៍កន្លងមកនេះ ពីបទប្រល័យ​ពូជ​សាសន៍។ សវនាការនេះ ជាការកាត់ទោសលើកទីពីរហើយ ទៅលើមេដឹកនាំទាំងពីរ បន្ទាប់ពីពួកលោក ត្រូវ​បាន​​កាត់​ទោសឲ្យជាប់ទោសអស់មួយជីវិត កាលពីខែសីហា ពីបទឧក្រិដ្ឋកម្មប្រឆាំងមនុស្សជាតិ។

សម្រាប់សាលក្រមលើកទីមួយ ដែលបានដាក់ទោសយ៉ាងធ្ងន់ធ្ងរទៅលើរូបគាត់នោះ ត្រូវបានលោក នួន ជា វាយតម្លៃថា ជា«ការលេងសើចនៃប្រព័ន្ធយុត្តិធម៌ដ៏គួរឲ្យខកចិត្ត»។ បើទោះជាលោកបានទទួលស្គាល់ ពីការ​ទទួលខុសត្រូវផ្នែកមនសិការរបស់លោក ក៏ពិតមែន ប៉ុន្តែលោកនៅតែបានប្រកែកថា លោកមិនបានដឹងអ្វី ពី​គម្រោងការប្រល័យពូជសាសន៍ នៅពេលនោះឡើយ។

សវនាការកាលពីថ្ងៃសុក្រ មិនបានប្រព្រឹត្តិទៅដូចការគ្រោងទុកទេ ដោយសារតែការដើរចេញរបស់​មេធាវី​ចុង​ចោទ។ សារព័ត៌មាន ស៊ូដអាំងហ្វូ (Sudinfo) របស់ប្រទេសប៊ែលហ្សិក បានដកស្រង់ប្រភពព័ត៌មាន អាអេហ្វប៉េ (AFP) អេភី (AP) និងប៊ែលហ្គា (Belga) មកសរសេរថា មូលហេតុដែលឈានទៅដល់ការដើរ​ចេញ​ពី​សវនាការ​នេះ ព្រោះក្រុមមេធាវីការពារក្ដីឲ្យចុងចោទ សំអាងថា កូនក្ដីរបស់ពួកគេ កំពុងស្ថិត​ក្នុង​ការ​តតាំង​ឧទ្ទរណ៍​នៅ​ឡើយ។

ក្រុមមេធាវីបានប្រកាសអះអាងកាលពីថ្ងៃសៅរ៍ថា ពួកខ្លួនត្រូវការពេលវេលាបន្ថែមទៀត ដើម្បីដាក់សំនុំ​ឯកសារ ដែលទាក់ទងនឹងការប្ដឹងឧទ្ទរណ៍របស់កូនក្ដី។ ការដើរចេញរបស់ក្រុមមេធាវី អាចនឹងធ្វើ​ឲ្យដំណើរ​ការ​របស់​សាលាក្ដី ដែលកំពុងតែរងការរិះគន់ថាមានយឺតយ៉ាវផងនោះ នឹងកាន់តែយឺតយូរថែមទៀត។

នៅក្នុងសវនាការនៃសំនុំរឿងលើកទីពីរ បានប្រមូលផ្ដុំបទចោទប្រកាន់ ជុំវិញបទប្រល័យពូជសាសន៍ ទៅលើ​ការសម្លាប់រង្គាលជនជាតិវៀតណាម ប្រមាណជា២ម៉ឺននាក់ និងជនជាតិភាគតិចចាម ប្រមាណជា ១សែន​ទៅ​៥សែន​នាក់។ សំនុំរឿងដដែលនេះ ក៏មានជាប់ទាក់ទងនឹងអាពាហ៍ពិពាហ៍ដោយបង្ខំ ការរំលោភ​សេព​សន្ធវៈ ដែល​បានកើតឡើងជាប្រព័ន្ធ ទាំងនៅក្នុងជំរុំពលកម្ម និងទាំងនៅក្នុងពន្ធនាគារ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...