ការលក់ដូរនៅលើទ្រូងផ្លូវវេងស្រេង ព្រោះគ្មានជម្រើស
- ដោយ: ក. សោភណ្ឌ ដោយ ក. សោភ័ណ្ឌ (ទាក់ទង៖ [email protected])-ភ្នំពេញ ថ្ងៃទី២០ វិច្ឆិកា ២០១៤
- កែប្រែចុងក្រោយ: November 21, 2014
- ប្រធានបទ: សណ្ដាប់ធ្នាប់
- អត្ថបទ: មានបញ្ហា?
- មតិ-យោបល់
-
ទោះជាមានកាកសំណល់សំរាម ឬការរិះគន់យ៉ាងខ្លាំង ពីសំណាក់អ្នកធ្វើដំណើរ ថាមានភាពរញ៉េរញ៉ៃពិបាកធ្វើចរាចរណ៍ និងដើម្បីចំណូលដ៏តិចតួចរបស់ពួកគេនោះក៏ដោយ តែក្រុមអាជីវករតូចតាចទាំងនោះ បានជំនះដាក់តាំងតូបលក់ធ្វើអាជីវកម្ម ពាសពេញទាំងទ្រូងផ្លូវ ក្នុងភូមិដំណាក់ធំបី នាផ្លូវវេងស្រេង សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ប៉ុន្តែការយកទ្រូងផ្លូវមកប្រើប្រាស់ នៅត្រង់ចំណុចលូប្រាំនេះ វាដូចជាបានក្លាយជារឿងធម្មតាទៅហើយសម្រាប់ពួកគាត់។
អ្នកលក់នៅលើផ្លូវនេះ អ្នកស្រី ឡឹក កុសល់ បាននិយាយប្រាប់ទស្សនាវដ្ដីមនោរម្យ.អាំងហ្វូ ថាការលក់ដូរនៅទីនេះ អ្នកស្រីមិនមានការអនុញ្ញាតណាមួយ ឲ្យលក់នោះទេ។ ប៉ុន្តែអ្នកស្រីគ្មានជម្រើស មិនដឹងបានកន្លែងណា សម្រាប់ប្រកបរបរចិញ្ចឹមជីវិត ទើបនៅរកស៊ីទាំងព្រួយបារម្មណ៍ រួមនឹងភាពភ័យខ្លាច។ ជួនកាលកំពុងលក់ មាននគរបាលសណ្តាប់ធ្នាប់មកដេញ ក៏រត់ទៅហើយ លុះនគរបាលទៅផុត ក៏ត្រឡប់មកលក់វិញ។ អ្នកស្រី បានបន្តថា អ្នកស្រីមកលក់ត្រីនៅទីនេះ ជាច្រើនឆ្នាំមកហើយ ដោយគ្មានរបររកស៊ី នៅឯខេត្តស្វាយរៀងនោះ ទើបអ្នកស្រីនិងគ្រួសារឡើងមកលក់ដូរនៅរាជធានីភ្នំពេញ។
នៅមិនឆ្ងាយពីគ្នានោះដែរ អ្នកស្រី ហ័ង ជាអ្នកលក់ដូរមួយរូបទៀត បាននិយាយថា អ្នកស្រីក៏ជាអ្នករស់នៅក្នុងភូមិដំណាក់ធំបីនេះដែរ។ ហើយការមកដាក់តាំងទីលក់ដូរនេះ ព្រោះតែអ្នកស្រីឃើញគេលក់តៗគ្នា ក៏ចេះតែមកលក់តាមគ្នាទៅ ហើយពេលណាមានសន្តិសុខមកដេញ ក៏នាំគ្នារើឥវ៉ាន់រត់ចេញ។អ្នកស្រីបន្តថា ពួកគាត់អាចលក់មកខាងក្រោយវិញបាន លុះត្រាតែគេរៀបចំផ្លូវលំរួច ព្រោះឥឡូវនេះ ផ្លូវនោះកំពុងជួសជុល។
ករណីនេះ ក៏ត្រូវបានយល់ស្របដោយលោក សេង ឡាញ ចៅសង្កាត់ស្ទឹងមានជ័យ ទាក់ទងនឹងផ្លូវលំនោះដែរ។ លោកបានថ្លែងប្រាប់ទស្សនាវដ្តី ឲ្យដឹងថា លោកបានធ្វើការដោះស្រាយ និងរៀបចំជាមួយអជ្ញាធរខណ្ឌ ដើម្បីដាក់ឲ្យមានកន្លែងលក់ដូរត្រិមត្រូវ នៅពេលផ្លូវថ្នល់ធ្វើរួចរាល់។
ចំណែកលោក ឈុន សារាវី ដែលជាមេភូមិដំណាក់បី នៅសង្កាត់ស្ទឹងមានជ័យនេះវិញ បានបញ្ជាក់ថា លោកបានចុះជួយរៀបចំសណ្តាប់ធ្នាប់ ជាមួយនឹងអាជ្ញាធរខណ្ឌ ក៏ដូចជាសង្កាត់ ដើម្បីរកដំណោះស្រាយឲ្យអាជីវករទាំងនោះ មានកន្លែងលក់ដូរត្រឹមត្រូវមួយ។ ចំពោះករណីដែលដេញអ្នកលក់នេះ លោកបានបញ្ជាក់យ៉ាងច្បាស់ថា លោកបានបិទប្រកាស់ជាសារធាណៈរួច តាំពីរថ្ងៃទី០៤ខែវិច្ឆិកាមកម្លេះថា ត្រូវរើឥវ៉ាន់ចេញ មុនពេលដែលគ្រឿងចក្រធ្វើផ្លូវមកដល់ ហើយថែមទាំងជួនលិខិតផ្សព្វផ្សាយដល់គ្រប់ខ្នងផ្ទះទៀតផង ប៉ុន្តែលោកមិនបានដឹងថា តើអ្នកលក់ដូរទាំងអស់នោះ បានអាន ឬគោរពតាមសេចក្តីប្រកាស់នោះ ឬអត់ទេ៕