នៅថ្ងៃទី ២៨ ខែសីហា ឆ្នាំ២០១៥ វេលាម៉ោងជាង ៩ ករណីគ្រោះចរាចរណ៍មួយ បានកើតឡើងរវាង រថយន្ត​ធុន​ធ្ងន់ របស់ណាកាវើល (Nakaworld)ប៉ះគ្នាជាមួយរថយន្តបាឡែន ដែលធ្វើដំណើរស្របទិសគ្នា នៅតាមផ្លូវ​មុនី​រ៉េត សង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ បណ្តាលឲ្យរថយន្ត បាឡែន ខូចកញ្ចក់ខាង​ឆ្វេង។

រថយន្តបង្កម៉ាក វូ តុន ពណ៍លឿងពាក់ស្លាកលេខ AT15 3.0652 បើកបរដោយលោក វណ្ណ បណ្តូល អាយុ ២៨ឆ្នាំ មានមុខរបរជាអ្នកបើករថយន្ត ឲ្យ ណាកាវើល អស់១០ឆ្នាំ ស្នាក់នៅសង្កាត់ផ្សារដេប៉ូ៣ ខណ្ឌ​ទួលគោក រាជធានី​ភ្នំពេញ។ ចំណែកឯរថយន្ត បាឡែន មានស្លាកលេខភ្នំពេញ 2D 1113 ពណ៍សរ បើកបរ​ដោយ​លោក ជា ចាន់ណាត អាយុ ២៧ ឆ្នាំ ស្នាក់នៅផ្ទះលេខ២៥២ ផ្លូវ២៧១ មាន មុខរបរជានិស្សិត។

ក្រោយពេលកើតហេតុ ម្ចាស់រថយន្តបាឡែន បានទារសំណង ពីអ្នកបើកបររថយន្ត វូ តុន ចំនួន៧០ដុល្លារ ដើម្បី​បញ្ចប់រឿង ប៉ុន្តែភាគីខាងរថយន្ត វូ តុន មិនព្រមឲ្យតាមការទាមទារ បស់ម្ចាស់រថយន្តខូចខាត ឡើយ។ នៅក្នុង​ហេតុការណ៍នេះ ក៏មានសមត្ថកិច្ចចុះ ជួយធ្វើអន្តរាគមន៍ និងសម្របសម្រួលដែរ តែភាគី ទាំងសងខាង នៅតែ​មិន​ព្រម ទោះជាសមត្ថកិច្ចជួយសម្រួលក៏ដោយ។

រីឯអ្នកចុងក្រោយ ដែលអាចសម្របសម្រូល ភាគីទាំងពីរនេះបាន គឺអ្នកតំណាងក្រុមហ៊ុនធានារ៉ាប់រង ដែលបាន​មកពិនិត្យ នូវការខូចខាតរបស់រថយន្ត និងវាយតម្លៃ ចំពោះទឹកប្រាក់ ដែលត្រូវផ្តល់ជាសំណង គឺមានចំនួន ៥០ ដុល្លារ ដល់ម្ចាស់រថយន្តបាឡែន ទើបភាគីទាំងពីរ ព្រមទទួលយក និងបញ្ចាប់រឿងនេះ៕